Shiga

Myanmar Mungdan hta COVID-19 Corona Virus ana zinli numdaw lahkawng lang hku nna kapbra wa ai majaw lai wa sai bat mi, sanit ya laman hta asak si sum mat ai marai 100 du sai rai nga ai.

Bat mi laman, ana kap hkrum ai masha marai 3538 jat wa ai rai nna si ai masha 100 du wa ai sai lam, September 14 ya kawn 22 ya shani du hkra ana jep joi hkam ai masha mun mali ram kaw na marai 3538 ana kap hkrum ai ai re majaw jep hkam ai masha ni kaw na tsa lam shading 13% hta ana kap hkrum ai hpe mu lu nga ai.

Dingda Korea mungdan kata, Num shada, la shada tara shang dinghku de ai upadi shapraw ya na matu mung shawa masha ni hpyi shawn ai hpe Kahtawlik sasana, dingda Korea mungdan na Nawku Hpung woi ningbaw ni ninghkap da ma ai.

Korea mungdan na Saradaw hpawng daju kaw nna hkuk shapraw ai ndai ndau shapra laika hpe mungdan kata na nawku hpung masha ni myit hkrum ai, hkap la ma ai lam chye lu ai. Ndai zawn ninghkap ai gaw shinggyim ahkaw ahkang hta hkra wa ai majaw re ai ngu mung tsun da ma ai.

Hkahku Mung, Mali Nmai Wa Lawng hte Mali Hkrang wa lawng de hkawm sa ai ni yawng ndai September shata 10 ya shani kawn hkamja lam jep joi quarantine rawng ra na re ai lam chye lu ai.

Myanmar Mungdan hta Covid-19 kap bra ana zinli numdaw lahkawng lang hku nna  kalang bai kap bra nga ai hte maren, Jinghpaw mung hta mung ana kap ai masha ni du wa ai majaw, Hka hku mung de ndai ana ndu pru na matu hkawm sa hkawm wa masha ni yawng, hkamja lam jep joi ai shara hta nhtoi 14 ya rawng ngut ai hpang she matut hkawm sa lu na re ai lam chye lu ai.

Hong Kong Saradaw Ginwang a apostolic administrator rai nga ai Cardinal John Tong Hon gaw “Jau ni Karai mungga hkaw tsun ai hta tingkyen mu mada ai mung masa lam hkaw tsun shapraw dan ai hpe koi yan ga ngu shadum n gun jaw da ai lam, lai wa sai shata August 28 hta htuk shapraw ai laika hta tsun da ai.

“Karai Kasang a mungga gaw hkaw tsun ai wa a tingkyen ningmu hpe hkaw tsun na matu n re ai; Karai Kasang a mungga hpe hkaw tsun sakse hkam na matu she rai nga ai,”