Korea Mungdan Na Nawku Hpung Ningbaw Ni Num Shada/ La Shada Dinghku De Ai Lam Hpe Ninghkap

Dingda Korea mungdan kata, Num shada, la shada tara shang dinghku de ai upadi shapraw ya na matu mung shawa masha ni hpyi shawn ai hpe Kahtawlik sasana, dingda Korea mungdan na Nawku Hpung woi ningbaw ni ninghkap da ma ai.

Korea mungdan na Saradaw hpawng daju kaw nna hkuk shapraw ai ndai ndau shapra laika hpe mungdan kata na nawku hpung masha ni myit hkrum ai, hkap la ma ai lam chye lu ai. Ndai zawn ninghkap ai gaw shinggyim ahkaw ahkang hta hkra wa ai majaw re ai ngu mung tsun da ma ai.

Num, La hte seng ai ahkaw ahkang hte seng ai lam yawng hpe manu shadan hkap la ya ai rai nna, num shada, la shada hkungran sakramentu hkam la ai hpe gaw aja awa ninghkap da ma ai.

Num mung nrai, la mung nrai re ai myit rawng ai ni a matu san da ya ai mungdan Asuya a tara upadi hte seng nna myit tsang nga ma ai lam Saradaw ni tsun da ma ai.

“Num ngu ai hte La ngu ai masha myu hpan lahkawng sha nga ai hpe ningdang na matu gaw n mai na re” ngu Saradaw ni htuk shapraw da ai ndau laika hta tsun da ma ai.

Ndai ndau laika gaw Wa Sarabyin Francis a Laika buk rai nga ai “The Joy of Love” hpe lakap nna bawng ban shapraw da ai re lam mung matut tsun da ma ai.

Masha hkum shagu gaw num la hku hpang da hkrum ai sari sadang hpe tinang hkum tinang manu shadan hkap la ra ai. N-jaw n-teng ai lam hku nga ai hpe sadi ra ai, koi yan kau ra ai ngu rawng nga ai.

Num hte la yan a lapran na tsawra myit hte hkungran sakramentu hkam la ai gaw ahkyak dik ai rai nna, kun dinghku ngu ai byin tai nga na matu madung ahkyak ai lam langai mung rai nga ai. Dai majaw shinggyim wuhpung wuhpawng hte Mungdan kaw nna, tsawra ai hte kun dinghku ngu ai hpe manu shadan ra ai rai nna, makawp maga ra ga ai ngu shadum da ma ai.

Saradaw ni a ndau shabra laika hta num hkrang bung shada, la hkrang bung shada hkungran lu ai galoi mung n gun n jaw ai lam tsun da ma ai. Dai zawn hkungran nga lu na matu, Karai Kasang a man e tara shang ai ngu hkam la mayu ai ni law law nga taw masai. Raitim ndai zawn myit ai lam hpe anhte ni ninghkap ga ai, ngu Saradaw ni htuk shapraw ai ndau laika hta hti lu ai lam RVA shiga dap kaw nna ndau da ma ai.

#rvaenglish #rvakachin

Source : Vatican News