Hka Hku Mung De Hkawm Sa Ai Ni Yawng Quarantines 14 Ya Rawng Ra Na 

Hkahku Mung, Mali Nmai Wa Lawng hte Mali Hkrang wa lawng de hkawm sa ai ni yawng ndai September shata 10 ya shani kawn hkamja lam jep joi quarantine rawng ra na re ai lam chye lu ai.

Myanmar Mungdan hta Covid-19 kap bra ana zinli numdaw lahkawng lang hku nna  kalang bai kap bra nga ai hte maren, Jinghpaw mung hta mung ana kap ai masha ni du wa ai majaw, Hka hku mung de ndai ana ndu pru na matu hkawm sa hkawm wa masha ni yawng, hkamja lam jep joi ai shara hta nhtoi 14 ya rawng ngut ai hpang she matut hkawm sa lu na re ai lam chye lu ai.

Mali Nmai Walawng kata hkawm sa hkawm wa ai ni yawng Covid 19 tsin-yam kaw na makawp maga lu na matu Mung Nya Zup Mare hte Zup Mai Yang Mare ni hta  September 8 hte 9 ya shani hkamja lam jep joi dabang lahkawng hpaw da ai rai nna, Hkrang Zup, Sama Bum, Layen, Kinyu Shagawng hte  yawng rai yang Check Point 10 daram galaw da ai” nga nna Dingdung Ginwang Ginjaw, Ningtau Hkamja Du Slg.Nbyen Tu Aawng tsun ai hte maren chye lu ai.

Hka lam hku hkawm sa ai ni gaw  Mung Nya Zup Quarantine dabang hta rawng nna, hka rang lam hku hkawm sa ai ni Zup Mai Yang Mare na Quarantine Center kaw rawng let   14 ya hkamja lam jep hkam la ra na re lam chye lu ai.

“Dai ni du hkra, hka hku mung de Corona Virus ana kap bra ai lam gaw nnga shi ai, lama na Covid-19 ana kap ai ngu n tsen ai ni nga jang mung, hkam ja lam hte seng ai wuhpung wuhpawng ni hte mahkrun tam nna shajin da ai lam ni nga ai re majaw  buga masha ni kaw nna mung grai myit tsang nra ai “

nga nna Slg.Nbyen Tu Awng matut tsun lai wa ai.

Ndai zawn re hkamja lam jep joi ai lam hpe Ginjaw uphkang rung hte Nawku Hpung ni, NGO wuhpung wuhpawng ni hte rau lata hkindun let galaw ai re lam chye lu ai.

Myanmar Mungdan hta,  2020 September 8 ya,  jahpawt hkying 12:00PM du hkra rai yang, Corona Virus ana kap hkrum ai masha marai 3299,  ana a majaw si hkrum ai marai 32, bai mai tsai wa ai masha marai 790 rai nna ndai laman hta ana kap hkrum ai masha 1500 jan jat wa ai lam, ana a majaw si ai masha ni mung htam lahkawng jat wa ai lam, ana lawdik htum kap hkrum ai ginra ni gaw Yangon Mare kaba hta marai 1852 hte Yahkai Mungdaw hta marai 740 re lam Mungdan hkamja lam hte Ginsup Lam Hkringmang Dap kawn tsun shapraw da ai shiga hte maren chye lu ai.

 

Thomas

Add new comment

11 + 5 =