Anhte Hpe Tsaw Ra Ai Karai Kasang A Man E Masha Hkum Shagu Tsawm Ai Re Nga Nna Wa Sarabyin Tsun Ai

photo //Vatican news

Wa Sarabyin Francis gaw September 21, bat 1 ya shani, Austria mungdan San Polten kaw na tsi gawk hta tsi tsi hkam la sai myit hkam ja lam nlu ai ma kaji ni hte hkawn ji, brang ji ni hpe Vatican kaw hkap la hkrum shaga lai wa ai.

Dai zawn hkrum shaga ai hta myit hkam ja lam ningra ai ma ni 42 lawm ma ai rai nna, shanhte a kanu kawa ni hte shanhte hpe yu lakawn nga ai ni mung lawm ma ai.

Wa Sarabyin Francis gaw, “Welcom to the Vatican” Vatican kaw na hkap tau la ga ai ngu, hkalum ga hte ga hpaw hpang ai.

“Tsaw ra ai ma ni a tsawm htap ai myi man n sam hpe mu lu ai majaw grai kabu nngai; Tsaw ra ai ma ni mung kabu pyaw nga ma ai hpe nanhte a myi hpe yu dat ai hte ngai hkam sha lu nngai,” ngu matut tsun shapraw wa ai.

Ndai ma ni gaw 1995 shaning hta hpaw hpang ai Ambulatorium Sonenschein (shing nrai) The Sunshine Outpatient Clinic mying ai tsi rung kaji kaw tsi tsi hkam la ai ni re lam chye lu ai. Ndai tsi rung kaji gaw tsi tsi hkam la ma ni a ana zingli hpe sawk sagawn ya ai lam; hpaji jaw ya ai lam hte tsi tsi lajang ya ai lam ni hpe gumprawn nna galaw ya ai re lam mung chye lu ai.

“Nanhte a nta mying gaw “Sunshine,” “Jan Shingkang” i, grai nan tsawm ai mying she rai nga ai, ngu Wa Sarabyin Francis, ma ni hpe shakawn ga tsun da ai. Kaja nan mung ma ni tsi tsi hkam la ai dai tsi rung gaw laklai tsawm htap ai shara re lam chye lu ai. Karai Kasang gaw mungkan ga hpe hpan ai shaloi, nsam hkum nna tsawm htap ai nam pan amyu myu hte hpan da ai; dai nampan ni yawng gaw shi a shi laklai ai hku tsawm ma ai; dai nampan ni gaw shi a shi tsawm ma ai.

Anhte marai hkum shagu mung, Karai Kasang a myi hta tsawm htap ga ai re; Karai Kasang mung anhte hpe tsaw ra ai; dai majaw anhte ni Karai Kasang hpe chyeju dum ra ga ai, ngu Wa Sarabyin ma ni chye na ai ga shadawn ni hte sharin shaga ya ai.

Hpan da hkrum nga yawng nga pra hpe asak jaw ya ai majaw chyeju kaba sai Wa Karai e! Nu yan Wa hpe hpan ya ai majaw chyeju kaba ai! Anhte kun dinghku masha ni a majaw mung chyeju dum ai! Tsi tsi hkam la ai ndai tsi rung kaw na manaw manang ni a matu mung chyeju dum ai! Wa Sarabyin Francis Ma ni a malai Karai Kasang kaw chyeju dum chyeju shakawn akyu hpyi woi la ya ai.

“Yesu Madu gaw ma ni hpe tsaw ra ai. Ma ni a kanu kawa ni a magam bungli hpe mung shaman ya na; ma ni a ah ji ah woi ni a hkam ja lam nga hkra mung shaman ya na; Tsaw ra ai ma ni a mungkan hpe mung shaman ya na re; ma ni e, nanhte a kam sham myit hte karai Karang kaw hpyi mahpyi gaw lu na re” ngu Wa Sarabyin Francis ma ni hpe n gun jaw da ai.

Ndai zawn hkrum shaga ai hta sa du ai ma ni hte seng ang ai ni yawng hpe chyeju dum ai lam tsun let Wa Sarabyin Francis Ma ni hte hkrum shaga ai lamang hpe hpum ding da ai lam Vatican Shiga Dap kaw nna ndau da ma ai.

Ngai nau ni hta na kaji htum ai wa langai mi hpe nahte galaw ai gaw, nanhte ngai hpe galaw manit dai rai ngai ai (Mt 25:40).

Source;Vatican News

Add new comment

13 + 3 =