Lani mi hta sha Covid – 19 ana kap masha grai law jat wa ai lam WHO kaw nna n dau sadi jaw da ai shiga

Lani mi hta sha Covid – 19 ana kap masha grai law jat wa ai lam WHO kaw nna n dau sadi jaw da ai

September 13, laban shani, hkying hkum 24 lapran, Mungkan ting hta coronavirus ana kanu kap masha 307,930 rai sai lam, masat shadang kaba dik hku matsin da ai lam Mungkan Hkam Ja Dap “World Health Organization” (WHO) kaw nna sadi jaw da ai lam Vatican kaw nna ndau da ma ai.

Chyambra ana Covid -19 gaw shinggyim masha mi hte n mu lu ai majaw grai sadi maja ra ga ai. Nnan byin hpang wa ai shata kaw nna, ya ten du hkra Covid -19 ana makawp tsi n lu tam shi ga ai. Dai majaw Coronavirus kanu kap chyambra dingyawng rai nga ai.

Laban shani Covid 19 ana kanu kap masha matsing hpe yu yu yang, India, United States hte Brazil mungdan ni hta kap chyambra ai shadang grau law taw ai.

 India mungdan hta- 94,372, United States - 45,523 hte Brazil - 43,718 rai ma ai.

Si ai masha mung law jat wa ai. Dai shani hta sha, India hte United States hta – 1,000 lahta de si mat sai. Brazil mungdan hta 874 si mat sai lam chye lu ai.

Chyambra ana Coronavirus hta “bawnu n rawng ai; dai ana kanu gaw masha kaji kaba n lata ai yawng hpe jahten sharun ai grai zai ai ana kanu re majaw Ramma ni mung sadi maja ra ai lam WHO kaw nna shadum da ma ai.

Chyambra ana Coronavirus a pandung gaw ana kanu law jat hta law jat na matu rai nga ai. Dai majaw masha shagu sadi maja ra ga ai; nang ngai gara kaw nga taw ai raitim, nang ngai kadai mi rai taw tim, anhte kaw du shang wa chye ai majaw sadi ga ngu mung WHO kaw nna, matut shadum sadi jaw da ma ai lam Vatican kaw nna ndau da ya ma ai.

https://www.vaticannews.va/en/world/news/2020-09/who-reports-record-one-day-rise-in-covid-19-cases.html