Mam Hkai Sha Hpang Wa Ai Lam Daw II

SHAWNG NNAN MAM HPE HKAI SHA HPANG WA AI LAM (Daw II)

Wunpawng Htunghking Laika (Laika man 80)

(Hkungga tsawra ai shiga madat Nu Wa Hpu Nau Wunpawng Amyu sha ni , dai ni na htunghking lamang hta gaw, Anhte Shingyim masha ni shawng nnan “Mam” hkai sha hpang wa ai lam hpe machye machyang hku langai hku shapoi ya ai hta na daw II hpe bai tang madun shapoi mayu nngai. Lai wa sai lamang hta n-gu tum hte wulai ni  mungkan ga de gara hku du wa ai ngu ai lam hte N-gu hte wulai ni bai hprang bra mat wa amjaw shinggyim masha ni sha hpa nnga nna jam jau hkrum nga ai lam shapoi mat wa sai rai nga ai. Dai ni na lamang hta N-gu hte wulai ni hpe bai woi la na matu du sat ni ladat amyu myu myu hte shakut nna Mam hkai sha byin wa ai lam matut shapoi mayu nngai.)

Daw I hpe Ndai link kaw na madat la ga.

N-gu hte Wulai ni hprawng mat wa ai shaloi U amyu langai rai nga ai Tinghkik La shawng Mahtum Mahta ga de sa nna wa shaga la yu wu ai raitim, n-gu hte wulai ni gaw nhkan wa hkraw ma ai. Lahkawng ngu na hta Hkatsu, Chyahkan hte Nga ni bai sa woi la ma yang, N-gu ni gaw “ Dai rai yang nanhte gaw, shatmai a matu gaw kade wa karum la na myit ta? ngu san mu ai. Katsu Chyahkan hte nga ni gaw “ Hkashi hkawam hte hkaraw shagu, hkanu hte hpungya hpungnawn shagu, anhte hkrai hpring chyat rai nga na ga ai; shat mai a matu gaw nau wa ntsang nra na re,” ngu mu ai. Aten ladaw shagu nga di ni gaw, hkra mga garep de sen masum, pai mga garep de sen masum, shangai dat dat rai na ga ai; shat mai a matu gaw hkrum tsang manu; anhte yawng jawm karum na ga ai; she yu wa saga” ngu tsun mu ai.

N-gu ni gaw Hkatsu Chyahkan hte Nga ni a ga hpe na ai shaloi, myit loi mi awai let na kam manu ai rai nna, mungkan ga de hkan yu wa na myit hykrum mu ai. N-gu hte wulai ni hpe Mahtum mga ni mung bai tsun mu ai gaw, “Ya nanhte n-gu ni hte wulai ni mungkan ga de bai hkan yu wa nna, shingyim masha ni hpe wa sharin shachying masu; shawng na zawn majoi mi kam mara rai nna, ndi sha lu na matu, N-gu hpe mung kawp shakap dat ya na; wulai ni hpe mung, tsap hte wadu watsa ni majoi nsha lu na matu, kawp hte hpyi shakap dat ya na” ngu tsun let n-gu ni hpe mung kawp shakap dat ya rai nna n-gu hte wulai ni hpe garum dat ya mu ai.

Mungkan ga de bai yu wa ai shaloi n-gu ni hpe makawp garum na matu kaga hkai nmai ni hpe mung bai garum jaw dat ya mu ai. N-gu ni hpe makawp shakap dat ya sai majaw, “ N-gu nngu ai sha” Mam” ngu nna mying bai galaoi da ya wu ai. Mam ni hpe makawp garum na matu, yi shingnawm de hkai mai ai baw Chyagyi, yagyi, Hkauya hte kahkum kagyin ni hpe mung yi ya lam hkan hkai na maut hkainu (n-gawng) ni hpe mung, yi wa htingwung makau grupyin hkan makawp na matu shaku shaman shinglim pan hte shingtawn pan (shaban) ni hpe mung, kahkum bum hkan makawp na matu majap shaba ni hpe mung, yi ya hkan makawp na matu latsan ni hpe mung, N-gu ni hpe makawp garum na matu Mahtum Mahta ni bai jaw dat mu ai.

Yi shingnawm hte wan mang hkang hkan makawp na matu, nai hpaw, nai wang, nai ding, manaw nai, nairawng re ai nai amy my ni hpe mung Mahtum Mahta ni e bai kahtap jaw dat mu ai. Nam na wadu watsa ni hpe makawp na matu, nam de tu mai ai baw nai yu, nai ningbyen, nahkai nai, ndung nai re ai nai amyu ni hpe mung bai kahtap jat ya mu ai.

N-gu ni hte wulai ni hpe lung woi la ai ni grai kabu ai hte maren, hkai nmai ni hte n-gu, wulai ni hpe htaw ai gumra mung, grai kabu nna shkaawng ai hte rai let bai yu hkrat wa ma yang, Shing-ngyen Mare hku ga lai hkrat wa mu ai. Shing-nyen Mare hku lai hkrat wa ma yang, Shing nyen salang wa gaw, gumra lagaw buk buk ai nsen hpe na wu yang, pru wa nna, “ Nanhte n-gu hte wulai ni hpe woi la lung ai lam gaw, gara hku rai sata?” ngu san mu yang, N-gu woi la lung ai ni gaw “ N-gu hte Wulai hta jan nna, kaga hkai nmai ni mung lu wa saga ai” ngu tsun dan mu ai.

Shaloi Shing-ngyeng gaw “ Kaning nga gaw shaman ya dat ma ta? ngu bai san wu yang, “ Mam hpun gaw nga wuloi hputba daram kaba nu ga; mam nsi htingkyang gaw gumra maitsan daram kaba bung nu ga,” nga nna shaman ya dat ma ai” ngu tsun dan mu yang, Shing Nyen salang wa gaw,” E, dai gaw nau wa law re nga ai; mam hpun gaw ndai nye a magyi daram kaba yang ram ai; mam nai htingkyang gaw ndai nye ai maitsan daram kaba bung yang ram ai,’ ngu nna Mahtum Mahta ni a shama ga hpe hkap jahten kau wu ai.

Shing-nyen wa e hkap jahten kau ai majaw, mam hpun ni hte mam nsi htingkyang ni kaji mat ai re ngu nna dia ni hkru Chyurum Wunpawng Jinghpaw sha ni naw kam shajang nga ma ai rai nga ai.  Dai majaw, moi prat kaw nna dai ni du hkra, rai bawng ban ai lam langai ngai hta, bawng ban jahkrup da ai mungga ni hpe htai lai nna tsun shaga chye ai wa hpe” Shing-ngyeng a ga jahten” nga nna ga malai hte naw tsun chye nga ma ai.

Bai, Nat jaw htunghking naw lang ai Jinghpaw ni moi na matsun ga hkan let ya du hkra, mam dan ngut ai hpang, Mam Minla shaga ai ngu lam galaw nga ma ai. Min la shaga ai ngu ai hta Moi N-gu ni nambat langai Mungkan ga de du wa ai shaloi ubyit utsa wadu watsan ni mung sha, malet malet nhprang masha ni mung maret sha rai nna, n-gu ni hprawng bra ai shani, kajawng nna minla dam mat ai n-gu ni hpe shaga ai lam rai nga ai. (Nu wa hpu nau ni, Htunghking laika hta Mam minla hpe gara hku shaga ai ngu lam hkumtsup ai hku ka da ai raitim ya shapoi ai lamang hta ndai hpe ntsun shalawm ai lam chye shangun dat nngai).

Dai ni anhte Hkristan masha ni hta mam minla shaga ai ngu ai hpe n galaw ga ai. Raitim mam nnan sha ai ngu, shawng htu sha ai mam hpe shadu let Sara ni, Mare kahtawng na myitsu Salang ni hte htingbu htingbyen ni hpe shaga let Karai Kasang hpe chyeju dum chyeju shakawn akyu hpyi ai ngu nna nnan sha poi galaw chye ga ai.

Laning mi hta mangai ta du nna Mare kahtawng masha ni jin gnut ai ten hta, Mare shawa masha yawng jawm lahkawn shinggyin nhtawm, “ Mam nnan sha ai” ngu Karai Kasang  hpe chyeju dum ai akyu hpyi hpawng poi shingra kaba mung shaning shagu galaw chye nga ma ai. Dai poi hpe  English hku Thanksgiving Day  ngu nna anhte ni “ Chyeju Dum Poi” Nlung Nnan Sha Poi”  ngu shamying da ga ai.

Ndai poi shingra gaw Chyurum Wungpawng Jinghpaw Mungchyeing sha ni yawng,  shaning shagu galaw chye ai Htunghking Poi Kaba Langai mi rai nga ai. Sinna Mungdan America dan hkan mung ndai poi hpe galaw chye ma ai ngu shapoi let lamang hpe ndai kaw jahkring da sai rai.

Mung Hpan