“Myit Kahtet Timung, Mara Hkum Galaw Myit, Masin Pawt Ai Hte Jan Hkum Shadu Kau Mu, Nat Tsadan Hpe Shara Hkum Yen Ya”

Ephesian 4: 26 – 27

Ephesu ni kaw shagun dat ai laika 4: 26 – 27 hku nna Kasa Pawlu gaw “Masin pawt timung mara hkum galaw, pawt sindawng ai hte nhtoi hpe hkum jahtum, nat tsadan hpe ahkaw ahkang hkum jaw” nga nna anhte a matu ahkyak dik ai Wenyi hkrun lam tara hpe shingran mu shangun nga ai. Pawt sindawng ai myit hpe anhte a kraw hta aten law law kyem da sai nga jang, anhte a hpyen wa gaw anhte a kraw hta ru jung la mat nna, Karai Kasang jaw da ai shaman chyeju sak prat hpe kashun la kau wa lu ai. Ephesu laika hta kasa Pawlu gaw asan sha tsun da nga ai. Pawt sindawng ai gaw mara n re. Pawt galu taw nga nna mara dat ya n kam ai she Karai Kasang a Tara Kanu hpe tawt lai ai re. Karai Kasang a shaman chyeju hpe malap mali di kau ai re.

Anhte shinggyim masha ni gaw tinang hpe masha wa sa shut ai ten masin pawt mayu ai gaw mara rai nga ai. Hpa n tsang ra ai. Madu Yesu hkum nan pyi pawt lai wa yu sai. Mahte laika 21: 12 hta “ Dai hpang Yesu gaw nawku htingnu de shang nna, htingnu kata e rai dut, rai mari ai ni hpe shaden kau mu ai rai nna, gumhpraw byan sha ai ni a ku ni hte hkru du dut ai ni a punghkum ni hpe kanawng kadawng kau ya ai” nga nna Madu Yesu pawt ai lam ka da nga ai. Madu Yesu gaw Karai Kasang hpe grai chye chyang tsawra ai zawn rai nna, masha ni ntsa mawp lu mawp sha ai ni hpe ayan pawt nga ai. Pharishe zawn re ai ni hpe pawt mayu dik rai nga ai. Raitim Madu Yesu gaw mara dat ya ai kasi kaja madun mat wa ai hpe mung n malap kau ga. “ Barabbas hpe dat ya nna, shi hpe Udang hta jen sat kau u” nga nna jahtau marawn ai ni hpe pawt sindawng nna matai htang na malai tsawra myit hte shanhte a matu shi a asak hpe ap nawng ya lai wa sai hpe myit dum ga.

Kaja wa tsun ga nga yang, masha ni anhte hpe shut ai, galaw ai a majaw masin pawt mayu ai htan anhte kraw kata hta nan byin taw ai hkam sha lam ni, rai dum jaw dum ai myit ni a majaw masin pawt mayu wa ai re hpe dum nga ga. Law malawng gaw anhte a kraw kata hta byin taw ai n shim lum ai hte rai dum, jaw dum ai lam ni a majaw pawt mayu wa ai rai nga ai. Chyum mungga ni hta masin pawt ai hpe hting hkang nna mara raw dat ya lu na, mara hpe koi yen lu na matu sharin matsun da nga ai. Yaku a laika 1: 19 – 20 hta “ Nye a tsawra ai hpu nau ni e, ndai lam hpe nanhte chye nga myit dai. Masha kadai wa rai timung, na la na matu lawan nga u ga, ga tsun na matu hkum tin nga u ga, masin pawt na matu mung hkum tin nga u ga. Kaning rai nme law, masha a masin pawt ai gaw Karai Kasang a dinghpring ai lam hpe shachyen nga lu ai n ra” nga nna ka da ai. Ga shagawp laika 19: 11 hta “Angawk ai wa gaw, shi myit mamyit shapraw dan nga ai, hpaji rawng ai wa gaw, aten n du dingsa ip da nga ai” nga nna ka da ai hpe mu lu ai.

Yawng mayawng hpe madu lu ai Karai wa gaw anhte shaman chyeju hte hpring ai sak prat hpe lu na matu mahkra hpe jaw kau sai re. Yawng a ntsa e arawng sadang lu ai wa gaw Roma hkawhkam ni hte shi hpe rawt malan ai ni a man e shi hkum shi shagrit shanem ai hte shi a asak hpe ap nawng kau ya sai. Dai hte maren sha Madu Yesu gaw anhte a jaw dum, rai dum ai myit ni hpe tawn kau da nna, shagrit shanem ai hte shi a tsawra myit hta maju jung let tsawra daw jau ai magam hta shakut na matu anhte yawng hpe saw shaga nga ai. Kalang marang anhte gaw ndai wa gaw mara raw ya n ging ai ngu myit la hkam sha chye nga ai. Raitim Madu Yesu gaw tsawra myit hte mara raw lama la na saw shaga nga ai. Anhte a kaja ai magam bungli ni a marang e Karai Kasang a mungdan gaw anhte a lapran dik wa lu na hpe ra sharawng nga ai. Anhte a kaja ai magam bungli ni hku nna hkye hkrang la ai lam hpe jaw ya na ra sharawng nga ai. Anhte yawng hpe tinang a masin pawt ai lam hpe myit galu ai hte hting hkang chye ai ni, tara ai lam hta arawng la chye ai ni tai wa nna shaman chyeju hte hpring ai asak prat de hkawm sa wa na ra sharawng nga ai hpe dum nga ga. Kaning re ai masa hta raitim mara rawt dat ya chye ai ni tai nga ga.