Mam Hkai Sha Hpang Wa Ai Lam

SHAWNG NNAN MAM HPE HKAI SHA HPANG WA AI LAM

Wunpawng Htunghking Laika (Laika man 78)

(Hkungga tsawra ai shiga madat Nu Wa Hpu Nau Wunpawng Amyu sha ni , dai ni na htunghking lamang hta gaw, Anhte Shingyim masha ni shawng nnan “Mam” hkai sha hpang wa ai lam labau maui mwi machye machyang hku nna tang madun shapoi mayu nngai)

Mungkan ga nnan lat ai ten hta shinggyim masha ni mam hpe rai nchye hkai sha ma ai. Dai ten hta shinggyim masha ni gaw namsi namsaw, lahkru lamai si ni hpe tam di sha, tsi hkrung tsi nan lap ni hpe di sha rai let asak hkrung nna nga ma ai.

Dai prat hta Hkrunang Ningbau hte Hkrunang Ningjau ngu ai yan la mi nga ma ai da. Dai yan la gaw Mahtum Mahta ga de sa sa rai nna hkawm sa ma ai majaw, Mahtum Mahta ni gaw hkai lu hkai sha na matu, n-gu tum hte wulai paw ni hpe jaw dat mu ai.

Shan la gaw Mahtum mahta ni jaw dat ai n-gu tum ni hpe yi hkyen nna hkai nhtawm, wulai ni hpe gaw makau mayang hkan na nam maling hkan hkai da mu ai. Shingrai hkai da ai n-gu tum ni hpe lam hkan lai ai malet nhprang masha ni maret di sha sha rai nna lai wa wa rai ma ai. Nam na ubyit utsa ni hte nam na wa du watsa ni mung sa di sha sha rai mu ai.

Nam maling de hkai da ai wulai ni hpe mung, tsap ni hte wadu watsa ni sa ashep sha sha rai ya mu ai. Hpa majaw nga yang wulai ni mung kawp hte hpyi n lu ai rai nga ma ai. Shingrai, wadu watsa ni hte ubyit utsa ni e kam mara rai nna majoi mi sha shatsang ai majaw, n-gu tum ni hte wulai ni gaw htum wa magang nna ndang hkam sharang wa malu ai.

Shingre ai ten hta Hkrudu yan la mung sa du hkawm hkawm rai mu ai. Dai yan la gaw n-gu ni hpe “Nanhte gaw kadai a n-gu ni rai myit ta?” ngu san mu yang, n-gu ni gaw “Anhte gaw Hkrunang Ningbau yan Hkrunang Ningjau yan a n-gu ni rai ga ai” ngu htan mu ai. N-gu ni mung Hkru du yan la hpe “Nan gaw kadai ni rai myit ta?” ngu bai san mu yang, langai mi gaw, “ Ngai gaw Sutring Sutchying rai nngai,” ngu htan nna, kaga langai mi gaw “ Ngai gaw Suthpung Suthtung rai nnai” ngu htan wu ai da.

Dai hkrudu yan gaw n-gu ni hpe, “ Nanhte hpe ubyi utsa ni mung sha, nam na wadu watsa ni mung sha, masha ni mung maret di sha rai nna grai jam jau nga yak nga myit dai; nanhte hpe an makoi garum made ga” ngu tsun nhtawm, Hkrudu yan la gaw lamu de mada masu let, shan a n-gup de maret bang bang rai mu ai.

Shingre ai lam hpe n-gu ni chye ma yang, Mahtun Mahta ga de wa ai ni gaw wa, nam de hprawng ai ni gaw hprawng, Hpungnawn hpungya de hprawng ai ni gaw hprawng rai nna bra mat wa  shajang mu ai. N-gu hte wulai ni bai hprawng bra mat wa masai majaw shinggyim masha ni gaw sha hpa nnga mat shajang sai rai nna, hku hku hpang gara hkrum let grai nga yak jau jau wa ma ma ai.

Nam na wadu watsa ni hte ubyit utsa ni mung, n-gu wulai ni n nga mat sai majaw kawsi hpang gara hkrum let, ru yak jaj jau hkrum wa shajang manu ai. Hpungnawn hpungta  de hprawng ai n-gu tum ni gaw hpungnawn hpungta shara shagu tu nna nga shajang manu ai. Dai n-gu hte tu ai mam ni hpe “ Jali Mam” ngu shamying da mu ai. Jali mam ni gaw hpungnawn hpungya hkan e sha tu nna, mam hpun hte mam nsi ni gaw, mam kaja hte bung nga malu ai. Rai tim mam hpun hte alap ni gaw mun tu ai majaw lai hprang hkrum ai masha ai hpe gaya chye  ma ai. Mam nai ni hpe baw sha yu yang hka ai namchyim rawng nga ai majaw masha hte nam na ubyit utsa ni mung n sha ma ai.

Dai Jali mam gaw shara shagu tu ai rai tim grau law tu ai shara gaw Myitkyina Mare, Shatapru Kahtawng makau na Njang Dung ngu ai hpungnawn hpungya hta grau law tu nga ai. Dai amjaw, Chyurum Wunpawng Jinghpaw sha ni mam ting na rai jang Njang dung na Jal mam nli la ai ngu mam minla shaga let mam ting sha chye nga ma ai.

N-gu hte wulai ni Mahtum Mahta ga de bai hprawng wa ma yang, Mahtum mahta ni gaw “Ya nanhte hpa rai bai hprawng wa myit ta?” ngu san mu yang, n-gu ni hte wulai ni gaw, “Anhte hpe shinggyim masha ni gaw sha shatai nna mung sha, shatmai shata inna mung sha re ai hta sha n-ga nam na wadu matsa ni, ubyit utsa  ni mung hkrup mara rai di sha, lam e lai hkawm ai malet nhprang  masha ni mung majoi mi maret sha, rai ma ai majaw ndang hkam lu saga ai rai nna, bai hprawng wa ai rai nga ga ai” ngu htan mu ai.

N-gu ni hprawng wa mat ai majaw, Shinggyim masha ni hte wadu watsa ni, ubyit utsa ni gaw kawsi hpang gara hkrum nna grai nga jam jau ruyak hkrum mu ai. Shaloi shingyim masha ni hte dusat dumyeng ni gaw, n-gu ni hte wulai ni hpe bai lung woi na lam bawng jahkrum da mu ai. N-gu ni hte Wulai ni hpe bai lung woi la na masha tam ma yang “ Tinghkrik La ga (Jinglung u kaji) n ngai lung woi’ ngu lit hkam la nhtawm, Mahtum Mahta ga de sa wu ai. Tinghkrik la gaw Mahtum Mahta ga de sa nhtawm, n-gu ni hpe woi la na sa wu ai. Mahtum Mahta ga de du yang N-gu ni hpe”Mungkan ga de bai yu wa saga; Shinggyim masha ni hte dusat dumyeng ni kawsi hpang gara hkrum nna si htum wa magang ma ai” ngu wu yang, N-gu ni gaw “ Dai rai yang nang gaw anhte hpe shat mai a matu gaw kade wa garum lu na nni? Ngu bai san mu yang, Tinghkrik La gaw “ Ngai gaw laning mi hta ngai sha ni marai manga nga gaw garum lu na re” ngu tsun mu ai.

Shaloi n-gu ni gaw, “ Dai hte sha gaw kaning nchye di na re; anhte hpe shat mung shatai, shatmai mung shatai, dusat dumyeng ni mung majoi mi di sha, lam e lai ai ni mung majoi mi maret sha rai ma ai hpe nhkam lu ai majaw n hkan yu wa ai” ngu htan mu ai. Tinghkrik La gaw N-gu hte wulai hpe n lu woi la nu ai rai nna, shi hkrai sha mungkan ga de bai yu hkrat wa wu ai.

Shinggyim masha ni hte dusat dumyeng ni gaw lani hte lani grau grau nna kawsi hpang gara hkrum wa ma yang, Hkatsu, Chyahkan hte Nga ni gaw, “N-gu hte wulai ni hpe n woi la lu yang gaw n mai na re; anhte she bai lung woi wa yu ga” ngu bawng la nhtawm Mahtum Mahta ga de bai sa mu ai.

 ( Shiga madat Nu Wa Hpu Nau ni ni ndai mam hkai sha hpang wa ai lam hpe du na lamang hta matut shapoi mat wa na re majaw hkap ala madat la nga ga ngu tsun let lamang hpe ndai kaw jahkring da sai rai)

Mam Hkai Sha Hpang Wa Ai Lam Daw II hpe Ndai link kaw na madat la ga.

Mung Hpan