Tsawra Myit A N pawt Lung Hkrung

“Hkristu gaw nanhte a kraw lawang e makam masham hte shanu nga lu u ga, shi a n taw n tsang ai hpung shingkang hte maren, nanhte hpe chyeju gam jaw na hte, tsawra ai hta ru jung nna, pawt gaw da let, de a nda de, dingdung de, tsaw de, sung de, kaning rai rai nga ai gaw, chyoi pra ai ni yawng hte rau atsawm sha myit shakup lu nna, Karai Kasang a hkum tsup ai lam ting hte hkum tsup lu myit ga, chye chyang ai myit hte n dang chye ai Hkristu a tsawra ai lam hpe, nanhte chye na lu na, ngai hpyi nga nngai”

Eph 3:17-19

Karai Kasang a tsawra ai masin salum hpe chye chyang ai a marang e lu la ai chyeju gaw, masha ni a tsawra manu shadan la ai lam hta asak hkrung nga lu la ai.  Masha ni a tsawra manu shadan ai lam hpe lu la na matu shani shagu anhte a aten ahkying hte n gun atsam law law hpe anhte jai lang jahtum nga ga ai.  Tinang a dum nta masha ni a hkungga tsawra manu shadan ai lam, hku hkau ai manaw manang ni a hkungga tsawra manu shadan ai lam ni hpe anhte lu la mayu ai, tinang hte tsep kawp n hkau n chye ai jasam masha ni a manu shadan la ai lam hpe pyi anhte lu la mayu nga ga ai. Anhte yawng gaw tsawra manu shadan la ai lam hpe aten shagu ra kadawn nga ai.

Raitimung, anhte gaw kam sham ai masha ni rai ga ai majaw, sumsing lamu na Kawa Karai Kasang hte jawm pawng gahkyin nga nna Madu a tsawra manu shadan la ai lam hpe anhte lu la nga ga ai. Dai Madu a tsawra manu shadan la ai lam hpe lu la hkra anhe hpa mung n galaw ra ga ai, galaw lu ai lam mung n nga ga ai, shi Madu a tsawra ai lam gaw npawt nhpang rai nga ai. Shi a tsawra manu shadan la ai lam gaw anhte a myit mang lam, shamu shamawt lam, hkam sha lam ni hpe byin pru shangun ai. Dai re majaw, shi Madu a tsawra ai lam hta, maju jung da na matu, npawt jung da na matu anhte hpe shi saw shaga nga ai rai nga ai.

 Eph 3:17-19 hta,  “Hkristu gaw nanhte a kraw lawang e makam masham hte shanu nga lu u ga, shi a n taw n tsang ai hpung shingkang hte maren, nanhte hpe chyeju gam jaw na hte, tsawra ai hta ru jung nna, pawt gaw da let, de a nda de, dingdung de, tsaw de, sung de, kaning rai rai nga ai gaw, chyoi pra ai ni yawng hte rau atsawm sha myit shakup lu nna, Karai Kasang a hkum tsup ai lam ting hte hkum tsup lu myit ga, chye chyang ai myit hte n dang chye ai Hkristu a tsawra ai lam hpe, nanhte chye na lu na, ngai hpyi nga nngai”

nga nna Kasa Pawlu anhte hpe shadum ai.

Karai Kasang a shadawn shadang n nga ai tsawra lam hpe anhte lu la ga ai shaloi, hkrit tsang lam n nga, shim lum ai lam hpe anhte hkam sha lu ga ai. Karai Kasang a tsawra ai lam hpe anhte mu tam la ga ai rai yang, dai tsawra ai lam gaw anhte hkan tam la lu mai ai tsawra ai lam hta grau hkyik hkam kaba dik ai tsawra ai lam rai nga ai majaw, kaga masha ni a tsawra manu shadan la ai lam ni hpe hkan tam shara n nga, anhte a masin salum hta myit dik myit pyaw ai lam ni hpe hpring tup nga lu ai.

Yawhan a shagun dat ai laika 1, daw kaba 4 kaji 16 (1Jn 4:16) hta, “Tsawra ai lam hta e anga nga ai wa gaw, Karai Kasang hta e anga nga ai rai nna, Karai Kasang mung shi hta e anga nga ai.”

Sumsing lamu na anhte a Kawa Karai Kasang a tsawra ai hta a nga nga lu hkra akyu hpyi ra ga ai. Madu Karai Kasang a hkyik hkam kaba dik ai tsawra lam, simsa lam ni hte anhte hpe shing grup makawp da ya mi ga. Madu Karai Kasang madun shaleng ya nga ai tsawra myit kaba hpe myit dum nga let, dai nhtoi hpung shigkang hta asak hkrung nga ga, Madu Karai Kasang a tsawra ai lam gaw anhte a npawt lung hkrung tai nga u ga. 

Lawu na lam ni hpe myit sumru akyu hpyi mai ai:

1. Nang hpe madun jaw ya nga ai Madu Karai Kasang a tsawra myit kaba hpe sumru yu mai ai;
2. Madu a tsawra lam hpe lu hkra shakut nga ai kun? Shing nrai shi Madu jaw ya nga ai tsawra lam hpe bai htang ai hku nna dai tsawra ai lam hte bung pre hkra asak hkrung nga pra nga ai kun?
3. Karai Kasang a tsawra ai lam gaw kade hkyik hkam kaba la nga ai ngu ai lam ni hpe grau chye na wa hkra garum ya na matu Chyoi Pra ai Wenyi kaw akyu hpyi mai ai.