Shiga

Wa Sarabyin Franics Gaw Gaza Kaw Na  Kamsham Ai Kahtawlik Hpung Masha Ni Hpe Sadi Dung Ai Hpung Masha Ni Ngu Nna Tsun Lai Wa Ai.

Simsa Lam A Matu Lusha Gam Akyu Hpyi Na Wa Sarabyin Francis Saw Shaga Da

Tsawra ai nu wa hpu nau ni, ya aten byin taw nga ai Gasah, Israel hte Myanmar mungdan majan ni a majaw hpyen koi yen ra ai masha grau grau law jat wa nga ai rai nna myit tsang ra ai mabyin masa rai taw ai hpe mu mada lu ai lam Wa Sarabyin Francis kaw nna October 18 ya shani, mung shawa masha hte hkrum ai shaloi tsun lai wa sai rai nga ai.

Masha law law asak hkrat sum, si hkala hkrum ra ai lam ni hpe mai byin ai daram ladat shaw nna koi yen na matu, ma kaji ni, matsan masha ni hte mungkan masha ni a simsa lam myit mada ai hkrap ngu hkrap ngoi marawn jahtau ai nsen ni hpe madat ya na matu Wa Sarabyin hpyi lajin tsun lai wa ai.

Majan byin ai hte mang hkang hpe n lu hparan ya ai, majan ngu ai gaw asak si hkrum , hkala nba rai hten za machyi shangun nna n ju n dawng ai lam hpe shabyin alun dat ya ai hte matai dawp matai htang ai lam hpe myit sharawt ya nna shawng lam myit mada shara hpe jahten kau ya ai re lam tsun ai.

Dai hpang Wa Sarabyin gaw Mungkan ting hta nga ai hpu nau Christian hpung masha ni hte simsa lam hpe ra sharawng ai amyu hpung shagu gaw October shata ( 27 ) bat 5 ya shani hta Simsa Lam a matu Lu Sha Gam akyu hpyi ai lam galaw na matu saw shaga dat nga ai.

Dai shani hta Roma mare kaw nga ai San Peter Nawku jawng hta mung shana de ( 6 – 7 ) du hkra akyu hpyi lamang galaw na hpe Wa Sarabyin tsun ndau dat nga ai.

Dai re majaw Wa Sarabyin Francis tsun ndau da ai hte maren 2023 ning October shata 27 bat 5 ya shani hta shara shagu na nawku hpung masha ni yawng tinang a buga ginra hte htap htuk manu ai aten masat la nna Lu Sha Gam akyu hpyi ai lam hpe galaw na matu Wa Saradaw kaba Cardinal Charles Bo kaw nna October 20 ya shani ndau laika shapraw dat nga ai.

Dai majaw buga shara shagu hkan shanu nga ai Nu Wa Hpu Nau ni yawng October shata 27, bat 5 ya shani Simsa lam a matu lak san aten jaw nna Lu Sha Gam Akyu hpyi ai lam hpe galaw nga ga. Myanmar Mungdan hte Mungkan ting ngwi pyaw simsa wa u ga.

Waimaw Jau Ginwang ginjaw num hpung ni woi awn galaw ai Num Hpung ni a Nsen Hkum ( Choir ) mahkawn shing jawng lamang hpe ( 21. 10. 2023 ) Bat 6 ya shani Mahkaw Yang na San Peter Nawku jawng wang hta Sara Gaiwang ( 16 ) na kanu num ni hpung shang lawm shing jawng lai wa ma ai.

Myitkyina Saradaw ginwang, Kahtawlik sasana Chihpwi jau ginwang a hkawm wa hkawm sa yak hkak dik ai shara, Miwa Mung jarit rai nga ai Hpi Maw Zong na Htang Dung hte Dalan mare hta nawku jawng ningnan gaw gap taw nga sai. 

Htang Dung mare hta gaw Kahtawlik nawku hpung masha hting ( 13 ) sha nga ai rai nna, dai mare hta hpu nau Lisu myusha ni law malawng nga ai hte Ngaw Chang myusha ni nga ai shara rai nga ai.