Tara Hkaw Sara/Num Ni Hpe Chyeju Dum Shakawn Shagrau Nga Ga

October shata 18 ya shani ang ai San Luka a poi nhtoi hpe myitdum let shara shagu hta Karai a magam gun nga ai Tara Hkaw Sara/num ni hpe chyeju dum shakawn shagrau ai lam Jau ginwang shagu hte Sara gaiwang shagu hta tinang htuk manu ai ten hpe lata la nna dangdi dang dap ai madang galaw ai hpe mu lu nga ai.

October 22, 2023 ya shani mung Myitkyina San Columban Nawku jawng wang na htap masum mungbawng htingnu hta Myitkyina Muklum lawk kaw shanu nga ai nawku hpung masha ni kaw nna Tara Hkaw Sara/num ni hpe chyeju dum shakawn shagrau ai lamang kadun galaw nga ma ai.

Tara Hkaw Sara langai a hkam sha lam hte shara shagu na nawku hpung masha ni hpe chyeju dum ai lam Sara John Shadan Hkang Tu Shan kaw nna tsun lai wa ai. 

Tara hkaw sara hte nawku hpung masha ngu ai gaw dinghku langai zawn re ai ngu hkam ai lam, hpung masha ni nga ai majaw sha, tara hkaw sara ni nga ai re ai lam, nawku hpung masha ni ru yak jam jau hkrum, myit ru yawn hkyen hkrum ai ten sara ni mung myit n pyaw lawm ai, hpung masha ni awng dang ai, kabu pyaw ai ten tara hkaw sara/ma ni mung kabu lawm ai lam tsun ai. 

Ya na zawn n ging n dan ai raitim hpung masha ni kawn tara hkaw sara/num ni hpe chyeju dum shakawn shagrau ai lam galaw ya ai majaw yawng hpe grai chyeju dum ai lam, grai n'gun lu ai lam ni tsun lai wa sai. 

Shiga - Julia Ja Ing