Wunpawng Sha Ni A Nli Tum Kaja

Sam Zet (Je Yang IDPs Camp)

Anhte myu Wunpawng sha ni moi majoi shingra bum kaw nna nga pra hkrat wa ai myusha ni rai ga ai. Moi anhte Wunpawng myusha ni mung Israela myusha ni zawn rai, bum ga hkan sagu, bainam rem sha nna nga pra hkrat wa ai myusha ni rai ga ai  da. Dai kaw nna gaw Hkailu Hkaisha remlu remsha rai, hkaili kaja hpe lata san la rai jet ai nli hkai, jet ai nli rem sha rai ai hte maren, mam mung nbaw gaw nbaw san san, nhpraw gaw nhpraw  san san hkai sha ga ai.

Nbaw hte nhpraw gayau mat jang shadu timung n hkut, sha timung n mu, bapa htu sha yang mung n mai sha rai, hpa manu n dan mat nga ai. Dai hte maren daini anhte myu Wunpawng sha ni hpe, Kasa Pawlu hku nna Ehpesu 5:15

“Nanhte kaning rai hkawm nga myit dai gaw azin ayang yu nga mu hpaji n rawng ai ni zawn n rai, hpaji rawng ai ni zawn hkawm nga mu,”

nga shadum da nga ai. Maum- wi langai mi hta, shannga langai mi gaw hkau na pa kaw gumra wuhpung ni u-shat sha hkawm nga ai hpe sa mu hkrup dat nu ai da. Shi a myit hta "gumra ni gaw masha mu timung n hkrit ra pyawpyaw nga lu ai wa ngai gaw nam maling hkan hkrit let sha nga hkawm ra ai wa, ngai mung daini kaw nna gaw gumra she tai sana shannga tai yang nau hkrit ra la ai" nga nna dai shani kaw nna gumra tai shakut mat wa ai gaw lani hte lani shata hte shata shaning hte shaning lai lai rai, na mat wa timung gumra gaw n tai shannga sha arai nga ai da.

 Ndai maumwi nga ai hte maren, daini anhte myu Wunpawngsha ni mung mai- gan wa a lagaw lata tai nna maigan amyu tai shakut hkawm nga ai myusha ni law law rai nga ga ai.Nang gade tai shakut mayu timung mi na maumwi hte maren sha rai na re. Dai majaw anhte a myi hte mu lu ai Mungdan hta nga nga ninglen shan- hpyi tingsan gun kau rai kyin hkawm ai ni a lit re ngu sha gaw n mai myit kau nga ga ai. Mungdan lu na matu gaw anhte nan shakut ra saga ai. Wunhpawng ga malai nga ai hte maren, marai masum myit hkrum yang Panglai nawng pyi htawk dang ai da.

Dai hte maren anhte Wunpawng sha ni myit hkrum na ten du nga sai, anhte langai hte langai lu la ai chyeju kumhpa n bung ai hpe rau sha chyawm kahkyin nna, Mungdan magam hta chyawm gun hpai nga ga.

Anhte lam shagu hta tsin yam tsindam hkrum ga ai raitimung, gin wang n lu ga ai n rai, myitru myitsang hkrum ga timung ari gumpye! kau ai hkrum ga ai n rai, Karai Kasang gaw Wunpawngsha ni hpe lata la nna shi a amyu shatai la ai gaw mungga hta mung shi anhte hpe kaja wa tengteng n kau da na lam tsun da nga ai.

Hbr 13:5 hta mu hti lu nga ai. Anhte shinggyim masha hku mu chye hkat ra ai tinang hkum hpe n hkum tsup ai hpe shawng hkam la chye ra ai. Shaloi na a myit masa hpe mu lu na re. Hpa majaw nga yang, anhte makau grup-yin myit dat yu yang, ningbaw woi awn hkrak ai nga ai zawn n hkrak ai mung kayau kaya rai ningbaw nkau mi gaw tinang lu ai ahkang hpe n chyena ai sha ngai hpa lit hte ndai shara ahkaw ahkang hta nga ai kun ngu ai ahkaw ahkang hte lit hpe n chye gin hka ai sha ngai ya chyawm gaw ndai shara rai sai yawng hpe ga kaba jahkrat nna dip, shangun sha rai ngai kam ai hku woi jasat na ahkang kaba lu ai wa re ngu myit sawn let tinang hpe Pandung langai de du hkra woi jasat ai tinang gaw yawng a matu akyu hku nna hkumtsup byin tai hkra woi na hpe malap masu n chye na rai woi nga ai mung law law rai nga ai.

Tsawra ai Nu Wa hpu nau ni, daini anhte dum hprang ra sai, dum hprang ai hte sha mung n ram sai, sakse shapraw ra sai. Jiwa ni a hkring htawng kaja ai hte myit masa arawn alai hpe malap kau arang bang ai lam hpe manu shayawm kau ai lam gaw myityu ra ai lam ni rai nga ai.

Shawng na Jiwa ni a share shagan sai gaw daini na kashu kasha ni hta kade wa naw rawng nga ga ai kun, Moi langbat langai lang na mungkan majan hta anhte Wunpawng sha Kaji Kawa ni myit mang jahkrum la nna, makam masham n lata rusai n ginhka ai sha share shagan ai gaw Ji Nat jaw Makam marai, 402 Hkalup Makam 23 Kahtawlik Makam 4 lawm ai ,ndai Wunpawng la ni myit- mang gahkyin la rai manga ning laman 48 lang htim gasat timung shamu pyi n shamu ai Sulmanla dap hpe Wunpawng la ni shanhte hpai ai sinat hpe tawn kau rai labu palang raw kau rai bunghkaw hkaw ai la langai mi shawng lungbra ntsa de masawp amya lung mat wa nna shi a manang ni hpe dai bunghkaw gin-yan jahkrat dat rai manang ni mung dai Jungbra ntsa de manang wa a bunghkaw gin-yan jahkrat dat ai kaw langai hpang langai noi gumyoi lung wa nna kasat bang mat wa ai gaw, labu palawng n hpun ai hpe gaw dat dat rai hti a zat bang mat wa ai gaw hkyinghkum (12) laman hta Wunpawng lata latsa mi hte sha dang kau lu sai.

 Raitimung, English hpyen du wa gaw n kam ya ai.Dai Wunpawng la ni gaw shan- hte padang dip la ai kaw na sinat bai magawn la wa dan yang she bai kam mat ai nga ai labau hpe anhte yawng na yu ai hte maren daini anhte Wunpawngsha ni mung myitmang gahkyin gumdin la nna Jiwa ni a atsam hpe myit dum let lagawn ai lam hpe kau da nna nang ngai chye ai hpaji hpe manu shadan asung jashawn rai, ta- tut hta apnawng gunhpai sa wa ga.

Anhte magam bungli galaw ra ai lam gaw Adam yan Ewa a majaw n re Karai Kasang gaw dai masha hpe woi la nna Edin Sun hpe yu lajang na hte sin na matu tawn da wu ai. Dai majaw anhte myu Wunpawng sha ni mung Karai jaw ya ai mungdan hpe makawp maga nna galaw lu galaw sha na matu anhte hpe ap ya sai re.Anhte Wunpawng sha ni Karai Kasang hpe garai n chye ai ten kaw nna, shaman chye ju hte Sali wunli hte dagam ala ngu ai gaw hpa re ngu ai hpe chye taw nga saga ai.

Ga shadawn, dai ni anhte sak hkrung nga na ahkyak rai nga ai nli nai li hpe matsaw ningtsa mahtum mahta shing nrai Jan ga na lu la ai re, ya ndai zawn re lam Karai Kasang shingyim masha hpe hpan da ai shaloi bang da ya ai hkringhtawng myit hku nna chye ai sha re, ya gaw loi kabu ai amyu chyoi pra ai chyum laika lu ai amyu rai saga ai majaw, Karai Kasang a mungga chyum laika hta sharin ya ai ahte maren, nli gat ai wa gaw dai dai masha  kasha rai nga ai nga nna tsun da ai hte maren, hkan nang hkan sa na aten dai ni na ten du ra ai.

Dai majaw tsawra ai Nu Wa Hpu nau ni, Jiwa ni a atsam marai hte Esraela ni a makam masham labau hpe myit dum kasi la nna,anhte Wunpawng amyu sha ni myit hkrum let jet ai nli tai nna rawt galu kaba sa wa saga ngu n-gun jaw dat lu nngai rai.

 

 

Add new comment

5 + 3 =

Please wait while the page is loading

Wunpawng Sha Ni A Nli Tum Kaja | Radio Veritas Asia

Error

The website encountered an unexpected error. Please try again later.