Tsun Dim, Ru Htut, Nga Hkwi Sha Ai Lam (Daw I)

Hkungga tsawra ai shiga madat Nu Wa Hpu Nau ni, dai ni na htunghking lamang hta gaw, Tsun Dim, Ru Htut, Nga Hkwi sha ai lam hpe tang madun shapoi mayu nngai.

Ya prat layang ga de nga ai anhte Wunpawng amyu sha n kau  ni gaw, n dai Ru htut tsun dim nna nga hkwi sha ai lam hpe hka shi hka nu, tsun  ni nnga ai majaw mung,ginra hta hkan nna tsun dim sha nan re ai shara nnga ai majaw n kau ni malap pi malap kau na masai.Bai ya na Ramma nkau ni, layang ga de sha kaba wa ai ramma ni mung n dai tsun dim sha ai ngu hpe chye pi n chye ai ni mung nga nga ma ai.Ratim bumga na mare n kau ni hkan gaw n dai tsun dim, ru htut nna nga hkwi sha ai lam hpe naw galaw nga ma ai. Layang ga na ni gaw,Jaka rai, Battary ni lang nna ,nga kaba sha ai , nga myek ai lam hpe chyawm gaw grai kungkyang nga ma ai./

Shang de anhte Jinghpaw Wunpanwg sha ni nga pra ai ginra ni gaw, bumlang shagawng hte pa layang, hakraw nhkap hte hkashi hkanu ni gayau gaya re ai shara hkrai rai nga ai.Jinghpaw Bumga a ginra masa hta hkan nna, ashu ashan gram lu gram sha ai ladat hte yu nga hkwi lu hkwi sha ai lai ladat mung amyu hpan law law nga nga ai.

Ramdaw kaba ai hkashi hkan e, tsun ran htuk manu ai hpe yu nna,hka hpe maga mi de hkrai hpyawng di dim shale kau nhtaw, ru htut , hka hkanu, nga shama hkwi sha ai lailen gaw, Jinghpaw Wunpawng sha ni a laklai ai shinggyim wuhpawng lailen kaba langai mi ra nga ai.

Dai zawn tsun dim sha ai lailen hpe pyaw poi lamang langai hku galaw ai marang e, Mare dung shawa, jahkrai n mai gaida, shingkra wa la, myitsu Kanu Kawa , woi awn ao shalang ni mahkra, malet nhprang manma ni du hkra, shada maren mara hku hkau kanawn mazum mahkri shawn hakt lu nga ai amjaw, myit hrkum kahkyen gumdin ai akyu hpe hkam la lu nga ai.Ni nawn  ai htingbu grupyin kahtawng ningchyawng ni hpe pyi saw shaga shalawm la nna, alum ala jawm hkwi lu shkw sha ma ai amjaw, n-gun rawng nna mungchyeing munghting re ai Buga Ninghtawn a hkrang nsam hpe sahdan shadawng lu nga ai.

Myitk hkrum myit ra hte jawm hkwi tawn lu ai hpang mung,shada gam garan hakt alam hta, jhkrai gaida, hten labye re ai ni hpe kaga mi n shagrit da; yawng hpe maren rap rap ra ra gam jaw  gam ya nhtawm, gam gran nga ai ten laman, lai sa ang ai manang hpe pyi, numju kumhpa gan ladawn jaw dat chye nga ma ai.Tsun dim sha ai ta tut ladat cyawm gaw, lwi yawng ai hka a madang hta hakn nna, mrai masum mali daram the jawm dim sha ai mung nga ai.Law malawng hku nna Mare shawa dim sha ai tsun gaw, hka kaba mung rai nna,shaning shagu aten man man jawm dim sha ai shawa tsun rai nga ai.Ning re ai shawa tsun kaba gaw, Kahtawng shawa a shingra sutgan re majaw,shawa hte sha nrai yang, tinggyeng hku  kadai mung hkwi sha na htung n nga ai.

Tsun dim sha ai pyaw poi ginra de, kahtawng Buga na hkawn ram brang ram ni mung shada hkrum zup pyaw kabau let, tinang nang a tsawm htap ai, kangka ai, myitsu ai, marai rawng ai, kungkyang ai atsam ningja ni hpe ta tut hku nna shadan shadawng hkat lu nga ai zawn, kraw salum kata e htuk htak ai, hkuk hka ai, tsawra ai lam ni hpe mung si mani ai zai ladat hte hpaw madun hkat lu ma ai majaw, pungding maka rum, rau nga maka hkrum ai ningrum ningtau tam la mai ai ginwan kaja langai mung rai nga ai.

Sumtsan sumwan de du hkawm sa mat wa raitim, Buga de tsun dim ru htut sha ai ten ladaw du wa shagu, dum shingran ai marit ningtsing pru wa yang,buga hpe tsaw ai,myu hpe tsaw ai, mung hpe tsaw ai myit ni grau shajat ya lu nga ai.Tsun hpa n taw, ten she n law ai Jinghpaw Wunpawng sha ni tsun dim sha rawt ai shani gaw,mala la shamu nngut sai ni hte lai nna, kahtawng ting na kaji kaba, numba lasa ni makaji ni hte gumgai dingla pyi n nga hkra, rawt sa nga ma ai.Tinang nanng a du nta na jum majap n-gu n-gang, shakau shaban, machyang hte magram, tai dik sai tsa pa dumlawng, mu dik sai tsa hku dumbung ni gaw, n kawm sa n mai ai lu sha jarik jaga ni rai nga ai.

Dai mahkra tha, nga htut na ru gaw ahkyak madung rai gna ai.Ru hpan ung amyu law law nga ai.Nbu (lap) ru, lajau ( hpyi) ru, rutuk (si) ru ni gaw mying kaba ai ru ni rai nga ai.Tsun dim sha sa ai  shani hta ramma ni hte hpawmi ni gaw, shajin tawn ai ru hpe mung gun sa shalawm ra gna ai.Nbu ru rai yang, tsun dim sha na jahpawt sha, krum di la ai rai ra ai.Tsun dim ai makau grup yin hkan e,aloi amai dan la lu ai ru hpan ni mung nga ai.Lajau hpyi ru rai yang,shawng shani kaw nna dup shajin da chye ma ai.Rutuk si ru hpe gaw, kawa kaihtum hta htu abraw nna htut bang ma ai.

Tsun dim na shara de du jang, kung kyang ai salang  masum mali gaw, tsun nam hpe alawan sa pat ma ai.Lachyum gaw, tsun baw de hka pat, nlung galau hkanu kaja dat a iamajw, nga ni n hpraw yu mat wa na matu rai gna ai.N-gun kaba dat na shara chyawm gaw, tsun baw de she rai nga ai.Hka hpe chyip hkra dim pat ra ai re majaw lam lahkawng di nna pat ai.Lahta lam hta, hka n gun htau nna, n pu lam hta hka hpe chying hkra pat ra ai.Kung kyang ai salang ni gaw, hka lasa yu nhtawm, tsun baw shading ya nna, waja wangan ni gaw, nlung kaba ni galau ka-aw sit shamawt dinggreng jahtuk ya nga ai.N-gun kaba n dat lu ai ma kaji ni hte hpawmi zawk manawk ni gaw, hka lam mase ai de bang bang bak nna jawm ahpre shakut lawm chye ma ai.Masha malawm maga hka pat ai de n-gun dat nga ai zawn, kau mi mung dabang shara shatsawm, tsa pa ni pyi, ndum ntang dumlawng dumhkang daw, hpun lahpaw ni tam shajin let amu kyin nga ai.Hka pat ai ni mung, nlung galau ai ni galau,langa lap dan garawt ai ni garawt , ga gun lahka ai ni lahka; hka loi kaba ai rai jang mung, larum tang nna lamai kabrang hte she madi hkra hkra; galaw sai bungli hpe gaw, lai n li hku she galaw chye ma ai.

Tsawra ai nu wa hpu nau ni, ndai, tsun dimr, ru htut, nga hkwi sha ai lam a ngam nga ai daw hpe du na lamang hta matut madat la ga ngu tsun let dai ni na lamang hpe ndai kaw jahkring da sai rai.

Kajai Ning Hkawng ( Jadeland Journal Vol.1, No.1 , 2006)