Asak Aprat Ram Ai Ni Hkam Kaja Ai Ni Gaw Tinang Galaw Lu Ai Bungli Lama Ma Hpe Galaw Ra Ai

 

Asak aprat ram wa sai num sha, la sha marai shagu gaw bungli lama ma galaw nna shang gumhpraw lu yang sha myit ngwi simsa lam lu la nga ai. Nta n kau mi hta asak kaba mat sai kanu yan kawa kahti gari rai tam jaw nga ai hpe sha ala sha nna shani tup tup phone hkrai ahpre nga ai ramma ni grai nga shajang ma ai. Dai ramma ni myit hprang wa na matu kanu kawa ni, ramma ningbaw ningla ni, manaw manang ni shada jawm shadum ra sai.

Sut masa hta shakut mayu ai ramma ni gaw kung zet nna nyan hpaji rawng ai ni tai ra ai. Sut masa hpaga yamga hte seng nna tut nawng hkaja la ra ga ai. Laili laika ni hpe tam hti chye ra ga ai. Hkaja masam maram ai lam hpe tinang a bungli prat lai wa ai hte maren ding yang bungli madung langai mi hku nna lit la ra ga ai. Zet tsang nyan marai rawng na grai ahkyak nga ai. Dai hta grau ahkyak ai gaw dinghpring kangka ai myit masa len lai ni grau ahkyak nga ai.

Dai myit masa gaw masha ni tinang hpe prat tup madi shadaw hkungga nga na lam a madung rai nga ai. Ja gumhpraw hte sut lu nga mai lam hta shada dip sha ai, shing jawng ai n tara ai hku mawp sha ai gaw koi kau n lu ai hkan lawm wa ra nga ai. Dai aten hta nang a matu lak nak kaba ngu na gaw ding hpring kangka ai myit rai nga ai. Dai aten sari sadang nga ra ai. Tsun mayu ai gaw nang a myit hpe hkang dang ra ai ngu ai re. Nang a tsun shaga ai ga tengman ai ra ai, lai kyang sat lawat ni gaw kangka sadi dung ra ai. Dai hpe sari sadang rawng ai ngu tsun mayu ai re.

 Hpu nau ni ja gumhpraw sut gan ni gaw simsa ai lam gaw gap ai hta grai n’gun kaba nga ai. Anhte a mungdan hta sinat laknak lang nna puba jam jau hkam, asak si hkam nna simsa lam lu la hkra shakut nga ai ni nga nga ma ai. Shanhte mung shanhte a rip kawp tara hkan lang nna jet ai myutsaw myit hte shakut ma ai re. Hpaga yunga sut masa hta mung kung zet ai nyan marai rawng ai sari sadang hta kangka ding hpring ai myit hte galaw ai rai yang masha yawng hkungga tsawra kam hpa ai masha tai wa nna simsa ai lam hpe gaw gap ai ni tai na rai nga ai.

Add new comment

3 + 6 =