Tsawra Ai Myit Hta, Sin Pawt La Htet Nnga Ai

Nu wa hpu nau ni simsa lam hpe gaw gap ga lamang hta tsawra ai myit hta, sin pawt la htet n nga ai ngu ai lachyum hpe jawm madat la yu ga. N0. 99  (1 Korintu 13:5)  Tsawra ai myit gaw, sin pawt la htet n nga ai, mara n tam ai.  Si mani ai hte manang wa hpe myit tau ya chye ai.  Gumrawng ai laja lana re lam n nga ai. sumnung shingdi ai. Shi a akyang lai len, tsun shaga ai lam ni gaw, masha ni jam jau hkrum na hku galoi n galaw ai. tinang a akyu n tam na matu mung sharin ya nga ai.

 Si mani ai lai kyang gaw Masha langai a myit masin hkam sha ai lam rawt kung kaba wa na matu madi shadaw ya ai.  Masha ni ga shaga ai madat ai shaloi jaw ai myit masa hte gara hku madat na, gara hku  shaga na, gara ten hta zim sha nga na ngu ai hpe mung sharin ya nga ai. Si mani ai myit masa lai len ni gaw Hkristan ni hkap hta la ra ai lai kyang ni rai nga ai. Tsawra ai myit hta ra ahkyak dik gaw, tinang a makau grupyin e nga ai masha marai shagu hte pri nem ai hku ganawn mazum nga sa chye na ahkyak la nga ai.

Shani shagu na prat hkrun lam hta, masha ni hte rau magam gun ai shaloi shanhte a prat hta shang yu ra ai. Masha ni tinang hpe hkungga myit kap wa na matu, masha hpe hkra machyi shangun ai ga ni koi gam ra ai. Masha ni a tsawra myit hpe lu la na matu, shan hte a shanglawt myit hpe hkungga ya nna, shanhte hkum nan tsun hpaw hpang wa na ten du hkra hkam sharang let la nga na atsam rawng ra ai.

100 – Masha langai hte jet ai hkuhkau lam, hpang la mayu jang, ahkyak dik ai gaw tsawra matsan dum chye ai myi rai nga ai. Masha wa a n gun kya ai lam hpe chyu sha n mai yu ai. Tsawra matsan dum chye ai ningmu gaw, dai wa hta nga ai n-gun kya ai lam ni hpe hkam sharang ya lu ai. Dai ningmu a majaw, masha yawng hte maren mara ganawn mazum lu na rai nga ai.

Tsawra  matsan dum chye ai myit gaw, masha ni hte n daw n hka myit dun let ganawn mazum chye na matu shabyin ya ai. manaw manang ningnan ni hpe mung jaw ya ai. Tinang gaw masha hpawng shingra hta lawm nga ai, tinang hpe tsawra manu shadan nga ma ai ngu ai myit hpe jaw ya ai. Tinang gaw ndai hpawng shingra hta lawm nga ai ngu nhkam  sha jang, shawa hte seng ai lit ni hpe mung n kam la na rai nga ai. Shawa hpawng hte mung htuk hkra n chye nga na rai nga ai. Shanhte gaw shanhte ra ai hpe sha lu hkra la na ngu ai myit rawng mat na rai nga ai. Dai majaw, Tsawra ai myit gaw si mani ai, sumnung shingdi ai ngu ai hpe chye madat na n rai nga ai. N chye madat ai majaw shi a salum hta shara n jaw lu ai nga nna Aquino mare na San Thomas tsun shana dan sai.

Tsawra matsan dum myit rawng ai wa gaw, n-gun jaw ga, shalan shabran ga chye tsun nga ai. Madu Yesu hkum nan shalan shabran ga tsun da nga ai.

(Mt 9:2) Sha e ngwi pyaw nga u ga. myit hkum kaji et.

(Mt 15:28) Num sha e Nang a kam sham ai myit gaw kaba nga lit dai.

(Lk 7:50) Na a kam sham ai gaw nang hpe hkye la nit dai. Apyaw sha wa nu.

Ndai ga ni gaw, masha hpe yu kaji nna tsun ai ga n rai. Myit kaji yawn hkyen shangun ai ga n rai. Masin pawt nna tsun ai ga n rai nga ai. Anhte dum nta masha ni shada ga shaga ai shaloi Madu Yesu a si mani ai ga ni hpe kasi yu la na ahkyak nga ai.

101 – Tsawra ai myit gaw, sharawng shara garum ya chye ai. Tsawra ai myit hte seng nna, masha ni hpe rai n tsawra yang tinang a hkum hpe shawng tsawra u nga nna matsun da ma ai. Rai tim, San Pawlu shadum ai gaw, tsawra ai myit gaw tinang akyu n tam ai, nga nna bai shadum da nga ai. (Philipi 2:4) hta nanhte gaw tinang a akyu matu sha hkum tam mu, masha ni a matu mung myit ya mu nga nna shadum da nga ai. Chyum laika hta e masha ni a matu sharawng shara garum ya ai gaw, tinang a matu akyu tam ai hta na grau madang tsaw nga ai.

Tinang a hkum hpe tsawra ai gaw, kaga masha ni hpe mung tsawra chye na matu, myit masin hpe tau nau shajin da ai rai nga ai. Masha langai mi gaw tinang a hkum a matu pyi maji taw nga jang, masha ni a matu grau maji na sha rai nga ai. Tinang a hkum hpe myit n dik dum ai wa daram maji ai gaw kadai n nga sai nga nna (Si Rak laika 14: 5-6) hta rawng nga ai.

102 -  Aquino mare na San Pra ai Thomas tsun shadum ai gaw, Tsawra ai myit hta  tsawra ai myit hpe hkap la ai hta na, tsawra ai myit hpe jaw ya ai gaw grau manu dan ai nga nna tsun da ai. Kasha ni hpe grai tsawra ai kanu gaw tsawra ai myit hpe hkap la na hta na shi a tsawra myit hpe jaw ya na hpe grau ra sharawng nga ai. tsawra ai myit gaw tara rapra ai hku  lajang ya rit ngu hpyi shawn ai hta grau jan ai tsawra myit rai nga ai. Shi hpa baw amyat bai lu na ngu ai hpe n myit mada ai. Tsawra ai myit hta kaba dik ai gaw kaga masha a matu tinang a asak hpe up nawng kau na jin jin rai nga ai. (Yh.15:13) Tinang a myit hte Sharawng shara hpring tsup hkra  garan jaw garan ya lu na matu mai byin a ni?. Mai byin ai. Hpa majaw nga yang chyum laika hta nan tang madun da nga ai. Manu jahpu n jaw ai sha nanhte lu la ai zawn manu jahpu n la ai sha garan jaw ya mu nga nna (Mt.10:8) hta tsun da nga ai. ngu ai lam ni hpe shana dat lu ga ai law.

 

Add new comment

3 + 6 =