Tsawra Ai Myit Gaw Manawn Masham Myit Nnga Ai

 (1 Korintu 13: 4) hta kasa Pawlu gaw tsawra ai myit hte nhtan shai ai manawn masham nju n dawng ai myit hpe di kabai kau ra ai lam tsun shadum ya nga ai.

Masha langai mi rawt galu kaba wa ai hpe nju n dawng manawn masham byin ai gaw shi a kraw hta tsawra myit ngu ai n nga ai hpe madun nga ai. Manawn masham ai ngu ai gaw masha langai mi awng dang nga ai hpe mu nna grai myit n pyaw ai rai nga ai. Manawn masham chye ai wa gaw masha ni myit pyaw nga ai hpe n kam yu ai. tinang myit pyaw na lam chyu sha  tam nga ai wa re.

Dai re majaw tsawra myit gaw tinang a akyu n tam ai sha masha wa hpe garum mayu ai. Jet ai tsawra myit gaw, masha ni awng dang ai hpe shakawn ya ai, manu shadan ya ai.  manawn masham ai myit tsinyam kaw nna shalawt ya nga ai. Jet ai tsawra myit gaw, masha marai shagu hta n bung ai atsam marai hpe mu ya ai,  nbung hkat ai hkrun lam hku nna tinang a prat hkawm sa nga ai ngu mu chye hkap la nga ai. Masha ni shanhte a hkrun lam hte shanhte  pyaw nga ai hpe manu shadan ya nna, tinang mung tinang a prat hkrun lam hta myit pyaw myit dik lam chye tam la ai. manawn masham ai wa gaw, tinang a myit masin chyinghka pat kau nna tinang hkrai nga mayu ai ni rai ma ai.

Gadun ai hku tsun ga nga jang jet ai tsawra myit gaw, Karai Kasang a tara kanu lam shi hta na hpang jahtum na tara lahkawng hpe hkan shatup ai rai nga ai. (Pru mat wa ai laika  20:17 ) hta, na htimbu wa a dum nta hpe ra marin ai myit hkum rawng u. Na htimbu wa a num hpe ra marit ai myit hkum rawng u. Shi a mayam num mayam la ni hpe la mayu ai myit hkum rawng u. Shi a dumsu, gumra ni hte shi a sutgan ni hpe mung ra marin ai myit hkum rawng u. nga tsun da nga ai.

Tsawra ai myit gaw, masha shada hkungga la ra ganawn mazum nna, shanhte lu ang ai ahkaw ahkang hte, myit dik myit pyaw lam hpe hkungga manu shadan ya nga ai. (1 Timoti 6:17) hta, ngai gaw masha hpe tsawra nna, Karai Kasang mu mada ai hku lam shagu hpe mu mada chye ra ai nga nna tsun da nga ai.

Ndai myit masa lu da ai rai yang nang gaw myit ngwi simsa ai chyeju hkam la lu sai rai nga ai. Ndai tsawra myit hpan hpe masha n kau gaw grai lu madu da ma ai. N kau gaw loi li sha madu da lu ma ai. Dai majaw n tara ai lam ni nhtan shai ai lam ni byin wa nga ai. Grai dam lada ai tsawra myit rawng ai ni chyawm gaw anhte shinggyim hpawng hta, lajen ginhka hkrum ai, ngam kau da hkrum ai ni hpe myit pyaw simsa lam jaw ya lu na matu shakut ya ma ai. Tsawra myit loi sha rawng ai ni gaw manawn masham ai,dip lu dip sha mayu ai myit rawng nga ma ai. 

 (1 Korintu 13:4) Tsawra ai myit gaw grang ai ga n tsun ai, gumrawng gumtawng ai myit n rawng ai. San Pawlu tsun shadum ai hta, jet ai tsawra myit hte hpring tsup ai wa  gaw, tinang a hkum hpe ladu lai shakawng ai ga galoi n tsun ai. Tinang hpe masha ni myit lawm myit kap wa na hku n galaw ma ai. Kaga masha ni hpe sha grau myit ya ma ai. Dai re majaw tsawra ai myit gaw, myit tsaw gumrawng ai, grang ai, lam n nga ai. Masha ni tinang hpe yu kaba na matu masu tsun ai, shakawng tsun ai lam hpa n nga ai. Masu shakawng ai akyang gaw, kaja wa byin ai lam n re ai sha, shakawng mayu ai myit san san a majaw tsun shapraw dat ai rai nga ai.Tinang gaw masha ni hta na grau san seng chyoi pra ai, hpaji grau kaba ai, masha yawng hta grau myi man pa ai grau ahkyak ai wa re nga nna sawn la chye ma ai.

Kasa Pawlu sang lang dan ai hta, nyan hpaji ni gaw masha hpe gumrawng wa shangun ai, tsawra ai myit chyawm gaw, dinghpring tsawm htap ai myit hpe gaw gap ya ai. Masha n kau gaw , ngai masha ni hta  grau chye chyang kung hpan ai madang tsaw ai ngu myit la ai majaw masha ni hpe dip sha dang sha ma ai. Dai gaw ahkyak ai masha ngu n sawn la mai ai. Kaja wa  ahkyak ai masha ni chyawm gaw, kaga masha ni hpe chye madat ya ai, masha ni ru yak jam jau hkrum ai shaloi, myit tsang ya nna garum la chye ma ai. Matsan mayen n chye n kaw re ni hpe, lakawn la chye ma ai. kasa Pawlu gaw Chyoipra ai wenyi a chyeju n lawm ai sha, tinang kam ai hku shakawng tsun ai, grang tsun ai ni hpe shadum sharin na matu n dai lam hpe tang madun da nga ai.

Anhte Hkristan kun dinghku n ta masha ni hta mung byin chye nga ai. Makam masham grai rawng ai zawn rai tim, makam masham hta n chye n kaw re ni hte tsun shaga ai shaloi, mala la laja lana nga nna tsun gamak jaw ai ni nga ma ai. Tsawra ai myit jet ai rai yang, shagrit shanem ai lai ningli galoi mung lawm nga ai. Masha ni hpe tawngban mayu ai rai yang, shagrit shanem ai lam shawng nga ra ai. Masha ni hpe daw jau mayu ai rai yang, shagrit shanem ai lam lawm ra ai. Anhte a gumrawng gumtawng ai myit hpe tsi la mayu yang shagrit shanem ai kyang lai len myit masa ni hpe law law jai lang ra ga ai. Madu Yesu hkum nan tsun da ai, Arawng aya ahkaw ahkang hpe madung da ai mungkan ga gaw, shada da dip sha dang sha nga ma ai.

 Nanhte chyawm gaw dai hku n byin u ga.” “Nanhte kaw na ningbaw tai mayu ai wa gaw, nanhte hpe daw jau ai wa rai ra ai” Nta kundinghku hta mung rau jawm magam gun nga ai hpawng shingra hta mung, ngai she grau chye ai, ngai she grau arawng aya kaba ai nga nna shingjawng hkat ai majaw, si mani tsawm htap ai tsawra myit hpe shamat jahten kau chye  ga ai. “ Kaning rai n me law Karai Kasang gaw, gumrawng ai ni hpe shadang da ti mung, myit grit nem ai ni hpe gaw chyeju jaw u ai.” nga nna (1 Petru 5:5) hta tsun shadum da nga ai. ngu ai lam ni hpe shana dat lu ga ai law.