Tattoo Htu Ai Hte La Ni Num Kasha Zawn Bu Hpun Ai Lam Hpe Nawku Hpung Kawn Sharin Shaga Da Ai Lam

Ya Prat Na Ramma Nkau Ni, Na Ladan Dan Ai, Kara Galu Madat Da Ai, Mak Sam Htu Ai, La Hkrang Ni Hta Gawli Bang Ai, Num Sha Nkau Ni Mung Malut Marawp Ai, Malut Lu Ai Ndai Lam Ni Gaw, Nawku Hpung Sharin Shaga Ai Hte N Htan Shai Ai Lam Ni Rai Nga Ai Kun?  

Ramma ni chyu sha n re, dai ni Munkan hta,  asak kaba ai salang ni du hkra pi ndai lam ni hpe galaw nga ma ai hpe mu mada lu nga ai. Shinggyim hkum hkrang hte seng nna hpaji ninghkring ni gaw, shinggyim masha hpe n kau ni hpan (8) , n kau ni gaw hpan (10) nga ai nga nna tsun ma ai. Ndai zawn hpan garan ai gaw, hkum hkrang hte seng ai myit mang ai lam hte seng ai, hkam sha ai lam hte seng ai, shinggyim num la hkrang hte seng nna, garan da ai lam ni re.

Masha law law wa La kasha gaw la kasha zawn, num kasha gaw num kasha zawn  malawng hkam sha ma ai. Dai zawn re ai gaw laklai ai lam n nga tim mung, nkau ni gaw dai hku n re. Nkau ni shinggyim num la hkrang gaw, num sha (shnr) la sha rai tim mung, shan hte a hkum hkrang gaw, la kasha gaw num kasha, num kasha gaw la kasha  zawn re ai masha ni law law nga ai.

maksam htu ai lam gaw akyu sum na lam sha malawng re ai hku re.Chyum Munga hta mung maksam htu ai lam gaw n kaja ai matsat shabat re nga nna ka da ai.

Ga shadawn la kasha langai, shi a shinggyim numla hkrang (sex) gaw la rai tim mung, shi a hkum hpe yu dat ai shaloi num sha zawn mashi  kadun ai, maidang dangkang pa ai, num kasha zawn mai dang kaba ai la kasha ni nga ma ai. Raitim shi a myit gaw la kasha myit nan rai nga ai. Dai hte maren num kasha ni mung, shingyim numla hkrang gaw num sha na zawn rai nga tim mung, hkum daw gaw la zawn re ai lam hpe anhte mu mada lu na re. N dai zawn re ai gaw manghkang n nga ai.

Nkau ni bai rai jang gaw, masha langai hta chyu sha, shinggyim num la hkrang lahkawng yan nga ai. La hkrang mung nga ai, num hkrang mung nga ai. Ndai zawn num mung rai la mung rai re num la hkrang lahkawng rai tim mung la kasha myit sha myit ai ( shnr) Num kasha myit sha myit ai lam ni nga ai. Nkau ni gaw la kasha rai tim myit masin hta hkam sha ai lam ni gaw num hku sha myit ai, hkam sha ai, dai hte maren num sha ni mung, shan hte num rai tim la myit myit ai, la zawn hkam sha ai lam ni nga ai. Nkau ni rai jang, shinggyim num la hkrang gaw langai sha raitim myit gaw, la kasha hte mung pawng mai, num kasha hte mung pawng mai ai. La kasha hte mung hkum shan kanawn mazum ai, num sha hte mung hkum shan kanawn mazun ai lam ni nga ai.

Dai ni Nawku Hpung gaw, shinggyim num  la hkrang hpan lahkawng rawng ai wa hpe, shi ra sharawng ai langai lata na ahkaw ahkang jaw ai. Ndai zawn lata ra wa jang gaw, seng ang ai Saradaw ni kaw ahkang hpyi ra ai. Bai, shingyim num la hkrang langai sha rawng ai, ga shadawn, la kasha gaw num sha hkrang hku galai na, num kasha gaw la kasha hkrang hku galai na nga jang gaw Nawku hpung kaw na ahkang jaw ai lam n nga ai.

Masha langai gaw, la sha hte mung hkrang kanawn mazum na, num sha hte mung kanawn mazum na ngu ai ndai lam hpe mung Nawku Hpung kaw nna ahkang n jaw ai.

Chyum mungga hta, “sexuality” ngu ai num la lahkawng yan hte kanawn na lam n lawm tim mung, “homosexuality” ngu ai la shada, num shada kanawn mazum ai lam gaw mara kaba re ngu nna ja Chyum mungga hta, ka da nga ai. Jaw jau laika 18:22 hta, “ Numsha hte kanawn ai zawn la kasha shada kanawn lu na n rai, dai gaw matsat shabat rai nga ai. Dai hte maren Roma 1:26-27 , 1 Korinhtu 6:9, Roma 1:24-27, Galati 5:19-23, 1 Yawhan 1:9, Philipi 1:6, 2 Korinhtu 5:17 ni hta, la shada da, num shada da n mai kanawn ai lam hpe ka da ai hku re.

Nawku  Hpung hku nna hkum shan ga lajang ai lam, kaga masha ni hpe hkum shan daw chyen jaw ai lam hpe tara shang tsun da ai lam gaw n nga ai. Ratim la sha, num sha hkrang hten hkra n galaw ai sha,  hku hkum hkrang ga lajang ai hta garum ai lam hpe gaw, hkap la ai hku re. Hpa majaw nga yang, Mahte a laika 5:23, Roma 13:9, Yaku 2:8, Jawjau 19:18 hta “na jinghku wa hpe, htingbu wa hpe tsawra u” nga nna ka da ai majaw, dai gaw tsawra ai lam hpe madun ai lam re.

Raitim Nawku hpung hku nna, la kasha num kasha hkrang galai ai lam hpe gaw ahkang n jaw ai. Dai ni na ten hta , prat madang hta hkan nna, Model, design ngu ai ni amyu myu galaw nna shatsawm shakya ma ai. Dai hte maren, La kasha ni mung na ladan shakap ai, Kara galu tawn ai lam ni nga ai. Kara galu tawn ai chyawm gaw, moi prat hta mung la kasha ni yawng kara galu ai hku re. Ya prat hta chyawm gaw law malawng zen nna kadun ai hku tawn da ma ai. Raitm na ladan gaw masha shagu ndan ai. Nkau amyusha ni hta la kasha ni na ladan shakap ai lam hpe mu mada lu ai.

Chyum laika hta chyawm gaw, la kasha ni num kasha zawn, num kasha ni la kasha zawn bu hpun ai lam gaw n htap htuk ai lam tsun da nga ai.Tara jahprang 22:5 hta,

“Numsha gaw la ni a bu hpun palawng hpun lu na nrai, La sha mung anum bu hpun palawng hpun lu na nrai. Dai lam galaw ai ni gaw Karai Kasang a man e matsat shabat rai nga ai.”

nga nna ka da nga ai. Dai majaw num sha gaw la sha zawn, la sha gaw num sha zawn galaw ai lam gaw Karai Kasang na man hta matsat shabat rai nga ai.

Dai ni Mungkan hta e , Masha law law “Tattoo” ngu ai maksam htu ma ai. Ndai zawn htu ai hpe nkau ni gaw lata hpaji langai hku sawn la ma ai. Raitim dai ni mungdan law law hta, ndai zawn maksam htu ai lam hpe tara n shang ai hku sawn la ma ai. Ga shadawn, Germany, Francis Mungdan, Slovakiam, Siri Linka, Thailand n dai Mungdan ni gaw maksam htu ai hpe tara n shang ai hku masat da ma ai. Dai hte maren Japan, Dingdung Korea Mungdan ni hta Maksam htu da ai masha ni hpe n shang shangun ai, bungli n galaw shangun ai lam ni hpe mu mada lu ai. Grau nna, Japan Mungdan hta grai yak ai hku re. Maksam htu da ai masha ni hpe kalang ta wa shangun ai lam ni nga ai. Dai hta n-ga, Mungdan n kau ni hta Company law law hta e, maksam htu da ai ni hpe bungli n jaw ma ai. Anhte Myanmar Mungdan hta pyi Maksam htu da ai ni law malawng hpe bungli n jaw ma ai. Dai hta n-ga, Maksam htu da ai masha ni hpe Balik ni hte masha law law mung n hten ai n tsen ai lam ni byin chye ai.

N hkru n kaja ai ni malawng gaw maksam htu da ai ni law majaw, dai zawn re ai masha ni hpe n tsen ai lam ni byin chye ai. Dai majaw maksam htu ai lam gaw akyu sum na lam sha malawng re ai hku re.Chyum Munga hta mung maksam htu ai lam gaw n kaja ai matsat shabat re nga nna ka da ai. Jaw jau laika 19:18 hta, “ Si sai wa a matu tinang a hkum hpe kadoi jahpye lu na n rai, tinang a hkum hta masat hkang jahkang lu na n rai "nga nna ka da nga ai.

Dai majaw maksam htu ai lam ni, la kasha ni na ladan shakap ai lam ni , num kasha zawn bu hpun nna nga ai ni gaw, Karai Kasang a ra sharawng ai hte mung shai nga ai lam shadum da nga ai.

 

Fr.Peter Zang Yaw Hpung (Fr.Awng Gam)

8 July, 2020.

Add new comment

5 + 2 =