Sut Lu Nga Mai Lam Hta, Sadi Dung Kangka Ai Lam Gaw Grai Ahkyak Ai

Hpunau ni dai ni simsa lam hpe gaw gap ga lamang hta, sut lu nga mai lam hta, sadi dung kangka ai lam gaw grai ahkyak ai ngu ai lam hpe madat yu ga. Mt 6:21 “ Na a sutgan nga ai kaw, na a myit masin mung nga na lit dai.” Nga nna Madu Yesu shadum ya ai. Ja sutgan tam ai wa hta law hpa myit marin ai gaw kalang ta kapyawn hkan nang nga ai. Garum ningtum ai magam san san galaw ai ni pyi law hpa ai myit ndum shamyi ru jung wa chye nga ai. Sut hpaga ga ai lam hta, tinang a matu amyat nga jang galaw ai, amyat n nga jang gabai kau ma ai. N kam kabai kau jang, amyat lu hkra mahkrun tam la wa ma ai. N dai zawn law hpa myit marin ai ana lu ai wa hta, dinghpring kangka sadi dung ai lam hpe hkan shatup na n gun n rawng mat sai. Sut gan gaw anhte a myit masin hpe gyit gumbat kau ya lu ai lam hpe madu Yesu shadum ya nga ai. Masha langai hta ahkayk dik ai gaw, shi a myit masin rai nga ai. Sut gan hta myit kap mat sai wa gaw shi sutgan nga ai de shi myit ten tup du nga sai.

  Awngdang ngang grin ai sut masa gaw gap na nga jang, sadi dung ai, dinghpring kangka ai ladat lang yang chyu sha, aten galu hkam lu ai, ngang grin awng dang ai sut masa byin tai wa lu ai. Ripkawp tara tawn da nna hkan shatup ra ai. Rung rai dut ai wa hte mari ai wa lahkawng maga akyu lu na hku galaw ra ai. Sut hpaga galaw ai sut du ni hta, sari sadang rawng ai, dinghpring kangka ai ni hpe masha ni grai hkungga, kam hpa ma ai. Dai Zawn re sut du ni sha sut hpaga prat yan lam hta jet ai arawng sadang  gun da lu ma ai. Hpaga yamga galaw ai ni hta, wenyi lam hkan sa ai ni zawn, tara shadik ai, dinghpring kangka ai lam hpe galoi mung hkan shatup ra ma ai. Sadi dung kangka let shakut nna, nyan marai hte da-kring da lang shakut ai ladat bai lawm ai rai jang dai masha gaw, Masha kaja, kungzet ningtawn ai wa ngu masha ni masat la ma ai.

Ndai zawn re sut du ni nga ma ai rai tim grai taw la nga ai. Nnan rawt galu kaba wa ai, mungdan ni hta, sut magam kaba ni, gumhpraw dum magam ni hta, gumhpraw jai shama kau ai, lagu la ai, jahpan chyarang n galaw ai, galaw shut ai ni law law nga chye ai. Tinang a gumhpraw n re ai hpe tinang madu ai zawn, ra ai hku majoi jai ayai kau ai rai jang, lani mi hta yu bak hkrum na rai nga ai. Sut lu nga mai lam shakut ai hta, ti nang chyu jamjau hkam nna shakut taw nga ai rai jang, aten grai na jaw ra na re. Arang n lu ai rai jang rawt galu kaba wa na yak ai. Ga shadawn  grai rawt galu kaba wa mayu ai, ramma langai mi hpe shi rawt kalu kaba wa na matu, arang garum ya ai rai jang rawt galu kaba wa na rai nga ai. Shawng de du mat wa nna sut lu nga mai sai ni gaw, hpang de hkan nang nga ai masha ni hpe, arang bai shaw ya nna madi shadaw la ra ai.

Anhte shinggyim masha ni gaw shangai wa ai ten kaw nna, marai rai hpe shamyet shanat nna sha asak hkrung nga ai. 1967 ning hta Japan mungdan na mabyin langai mi hta, dum nta   gawgap ai sut du wa “WA TA NA BE” gaw gawgap ai magam galaw mayu ai ramma ni hpe gumhpraw hkoi ya na nga nna shi laika hta shana dat ai. Dai ramma ni hpe myit masa lai kyang, nyan marai yawng jep sagawn yu ai hpang, ram ging htap hkuk ai ramma ni hpe lata la nna, gumhpraw yan wan latsa hkoi ya dat ai.  Dai ramma ni shakut shaja ai majaw, ya aten hta, bungli galaw masha 350 gaw dum nta gawgap ai hta awng dang nna, laning mi hta Yan wan mun lahkawng amyat lu la ma ai. Japan sut du wa “WA TA NA BE” tsun ai gaw, ngai jau jau kaw nna, myit lawm kangka ai ramma ni hpe gumhpraw hkoi ya ai rai yang, amyat jau jau lu nna magam bungli grau awng dang na rai nga ai nga nna tsun ai.

Japan mungdan hta, dum nta gaw gap ai sut du kaba ni 100 jan nga ma ai, “WA TA NA BE” hta lai nna kaga sut du ni masha ni hpe hkoi ya na kachyi pyi n myit ma ai.  “WA TA NA BE” chyawm gaw gumhpraw hkoi shap ya ai sha n ga, grau kaja ai ladat hte galaw na hpaji mung jaw ya nga ai. “WA TA NA BE” gumhpraw hkoi shap ya ai ni hta na asak 27 ning  amyu shayi “ YU KI SA TO” mung lawm nga ai. Shi gaw Sut du wa hkoi ya ai gum hpraw hte, rung kaw bungli gawlaw ai masha ni nta kaw shat shadu sa na yak ma ai. Dai majaw shani shat agahtet sha lu sha na matu, shat shadu nna hkan sa hkawm ai bungli galaw nu ai. Lai wa sai ten hta dai bungli grai galaw mayu ai raitim arang n lu ai majaw n lu galaw nu ai. Ya gaw Sut du “WA TA NA BE” garum dat ya ai majaw awng dang ai bungli langai lu mat wa sai.

Ndai zawn gumhpraw hkoi la ai shaloi sadi dung kangka na gaw grai ahkyak nga ai. Kalang mi garum ya yang, kalang mi masu kau da ai wa hpe gaw prat tup masu hkalem yu sai ngu ai dan hpe hkam mana ra sai. Kadai mung shi hpe n kam sai. Dai re majaw hpaga yamga galaw ai ten, sut lu nga mai ai lam gaw gap ai ten sadi dung kangka na gaw ahkyak kaba langai mi rai nga ai.

Bai nna, gumhpraw lu na matu san san sha myit nna bungli galaw ai rai yang, dai myit masa gaw, Cancer mawng ana zawn shing gyim hpawng hpe mayu sat kau na rai nga ai. Bungli galaw ai wa gaw gumhpraw lu na hpe sha madung da ai rai jang, dai wa gaw akyang hten wa sai rai nga ai. Magam bungli shagu gaw manu n lu daw dan nga ai. Bungli galaw ai wa a tsawra ap nawng ai myit hte galaw dat ai bungli gaw, shaman chyeju hte hpring nna manu daw dan n lu nga ai. Ga shadawn shinggyim masha gaw Karai Kasang hpan da ya ai lamu ga kaw hkai n mai ni hkai dat nna, du hkra ladaw hpe shamyet shanat nna, apu pu asi si wa ai. Du sat yam nga rem ai ni mung dai hte maren re. Ga kata na,  ja lung seng n hprang sut rai ni htu nna dut sha ai rai yang Karai Kasang hpan da ya ai hpe kam shamyet nna, lu la ai re. Nang madu da ai hpa n nga ai.  Karai Kasang kaw shamyet shanat nna galaw la lu ai sha re.

Bungli n lu ai nga nna hpa mung n galaw ai wa gaw mala la lagawn dik ai wa rai nga ai. Dai wa gaw tinang galaw ai bungli a majaw lu la ai myit pyaw myit dik lam hpa n nga sai. Masha marai shagu gaw bungli galaw ra ai. Asak apart naw ram nga yang hpa bungli n galaw ai wa gaw, shat shama, masha shajan rai nga ai. Bungli lama ma galaw yang she tinang a hkum hpe kam hpa ai myit rawng wa na re, masha langai a sari sadang rawng nga na re. Bungli n lu ai Dinghku kawa langai gaw, masha ni bungli sa wa ai ten hta, gara de sa na mung nchye, lachyum npru ai sha n ta kaw na pru mat wa ai, gade n jau jau rai masha ni nta hkan gawam hkawm nna aten shama sai. Madu jan hte kasha ni hpe tsawra ai myi man n lu madun sai. Kasha ni hpe tsawra kawn lajang ai mung hpa n nga ai. N-gwi ai zawn gaya ai zawn hkyum hkyum rai nta shingdu de sa nga mat ai she law mat sai. Hpa majaw nga yang bungli galaw ai majaw sha myit n-gun atsam rawng wa ai re. kabu sharawng ai myit lu la ai.  Ti nang galaw ai magam bungli gaw kaji tim kaba tim tinang hpe masha langai hta nga ai sari sadang hpe jaw ya nga ai.

Dai majaw sut lu nga mai mayu ai ni gumhpraw n jaw yang bungli n galaw ai, gumhpraw law law lu ai bungli she galaw na, bungli kaja sha tam na nga nna hpa n galaw ai aten shama ai ni gaw lawan myit malai ra sai.  Tinang a dum nta, tinang amyit masin ngwi pyaw sim sa lam gaw gap na matu, dinghpring kang ka ai hte sut lu nga mai lam hta shakut ra ai. Bungli kaji kaba n lata ai sha bungli shagu hpe manu shadan nna galaw shakut chye ra ai. sut lu nga mai lam hta, sadi dung kangka ai lam gaw grai ahkyak ai ngu ai ngu ai lam hpe shana dat lug a ai law.

Ka Ai-Mama Kaba Sylvia Lahpai Seng Tawng