Simsa Rap Ra Ai Ra Lata Poi Byin Tai Wa U Ga Matu  Akyu Hpyi Ga

Du wa 2020 November shata praw 8 ya shani galaw na Myanmar Mungdan ra lata poi simsa rap ra  awngdang ai hte galaw lu na matu Myanmar Mungdan a Saradaw Kaba, FABC Ningbaw, Cardinal Charles Bo kawn akyu hpyi ga ka shapraw da nga ai.

Akyu Hpyi ga hpe English hku nna mung ga gale da nna, Myanmar Mungdan na Amyu sha ga law law hte mung ka shapraw da ai re hpe chye lu ai.

Saradaw kaba a akyu hpyi ga [Jinghpaw ga hku]  gaw n pu na hte maren re.

 

Simsa Rap Ra Ai Ra Lata Poi Byin Tai Wa U Ga Matu  Akyu Hpyi Ga

Nga yawng nga pra hpe hpan da nna, shinggyim masha yawng a sari sadang hpe makawp maga ya nga ai Wa Karai Kasang e, nang madu a hkyik hkam dik ai shawang tsawra myit kaba hpe myit dum nga let, anhte ra nga ai chyeju ni a matu ding yawm dagup hpyi nem nga ga ai. 

Manudan nhprang sut rai ni law law hte hpring ai Myanmar Mungdan hpe anhte a mungdan hku nna kumhpa jaw ya ai majaw chyeju dum nga ga ai. Tsawm htap ai htung hking maka kumla ni hte hkring htawng kaba ai amyu baw sang hkum hkra shanu nga ai Mungdan uhpung uhpawng langai hku nna nang madu shatai da ya nit dai. Mungdan mung chying sha ni yawng hpe lachyen ginghka lam nnga, maren mara tara rapra ai masa hte woi awn up hkang na ningbaw kaja ni hpe lata la u ga, mung chying sha ni hpe nyam marai nhtoi jaw ya rit.

Du wa na mungdan a ra lata poi lamang hta, mungchying sha ni a ahkaw ahkang rai nga ai, me bang na ahkaw ahkang hpe asung jashawn jai lang let, mung chying sha ni a mai kaja ai lam ni hpe gaw gap shabyin ya na ningbaw kaja ni hpe atsawm sha lata tsan la nna me bang lata la lu  u ga Chyoi Pra ai Wenyi a lam matsun madun ya ai nhtoi shaman chyeju hpe hkam la lu na matu hpyi nem nga ga ai.

Matsan mayan masha ni hte nyet kau hkrum ai masha ni a mai kaja ai lam ni hpe shabyin ya na myit kaja rawng ai hte, mungchying sha ni yawng a matu mai kaja ai magam bungli ni hta ta tut shakut nga ai nigbaw kaja ni hpe lata la lu hkra mungchying sha ni hpe nhtoi jaw ya rit. Mung masa party shagu hku nna mung, myit malang ai, myit san seng ai,  shawang tsawra myit kaba ai, ngu ai lam ni hta labau kaja nga ai masha ni hpe lata la lu mu ga nhtoi jaw ya rit.

Makam masham lam hte amyu sha lam yan ni hpe jahpai nna myit ga garan lam shabyin nga ai masha ni a lata kaw nna mung, masha law law kaw si hpang gara hkrum nga ai aten mungdan a nhprang sut rai ni hpe lagu shaw la nna nga mu nga mai nga ai masha ni a lata kaw nna mung, mungchying sha ni hpe makawp maga la ra rit. Mungdan a law la ai nhprang sut rai ni hpe mungchying sha ni yawng, matsan mayan ni du hkra, akyu hkam sha lu hkra galaw ya na ningbaw ni hpe jaw ya rit.

Nang madu gaw simsa lam a madu rai nga ai zawn, kasat gala majan mang hkang lam ni hpe jahkrum bawngban mahtai tam na myit sharawng awng ai mung masa party ni hte ningbaw ni hpe jaw ya rit. Anhte a mungdan, Jet ai Federal mung masa ngang grin let, simsa ai, sut su nga mai ai Mungdan byin tai wa hkra garum ya rit.

Myanmar mungdan a mungchying sha ni rai nga ai anhte yawng, sai rum ai hpu nau ni zawn shada hkap la lu hkra garum ya rit.

Du wa maw nga ai ndai ra lata poi gaw, lai wa sai ten na nsin hpe hkoi mat wa shangun let, anhte a mungdan hpe, myit mada lam, simsa lam, sut su ngai mai lam ni hte hkum tsup ai nhtoi de woi sa wa ya lu u ga law. Amen.     

 

Cardinal Charles Maung Bo (SDB)

Catholic Archbishop of Myanmar          

 

       

Add new comment

2 + 12 =