Simsa lam a matu Nawku Hpung ni hku nna, gara hku shang lawm lu na kun?

Simsa lam a matu Nawku Hpung ni hku nna, gara hku shang lawm lu na kun?

Mara dat ya ai ngu ai gaw hpa rai ta?

   Simsa lam lu la na matu makam masham shagu, Nawku hpung shagu hku nna, shang lawm lu ai lam law law nga nga ai. Ya aten anhte Myanmar mung hta, makam masham shagu, nawku hpung shagu kaw nna, dang dep ai daram shang lawm lit la nga ai hpe mu lu ai. Rau akyu jawm hpyi ai, ra gadawn ai lam hta garum madi shadaw hkat ai, Simsa lam hta lit la shakut ai majaw asak ap nawng mat wa sai ni hpe, hkungga chyeju dum let makoi mayang shang lawm ai, shalan shabran ai, magma ni galaw nga ga ai. Dai gaw grai chyeju dum hpa, myit n gun lu hpa rai nga ai.

            Kahtawlik Hkristan hpung hku gaw, simsa lam hte seng nna, shinggan bungli  rai n shang galaw yang, simsa lam a matu akyu hpyi ya ai; akyu hpyi ai gaw mungkan hpe galai shai lu ai ngu nna Hkristan ni kam ai. Simsa lam a matu Hkristan ni galaw shakut ai hta akyu hpyi ai gaw n-gun a ningpawt rai nga ai. Kabu Gara Shiga hpe ndau shana ai hta Nawku Hpung gaw shani shana akyu hpyi na matu Hpung masha ni hpe shadut ai. Shaning shagu Karai a Kanu, Maria a poi shani, January 1 ya shani Mungkan Simsa Nhtoi poi galaw nna simsa ai hte tsaw ra ai myit masa jat wa na matu kyu hpyi lamang galaw ai. Mungkan Ramma Nhtoi hpe mung Nawku Hpung woi awn nna galaw ya ai. Ndai hku galaw ai gaw tsaw ra ai hte simsa lam a htung hking lai len grin nga na matu sha n re, ta tut mai galaw ai lam ni hpe madun mayu ai majaw re. Kabu Gara Shiga hpe Hkristan ni hkan sa ai gaw mungkan hta reng dik htum simsa lam a matu  shamu shamawt ai lam re.

   “Nawku Hpung a nawku daw jau ai lamang hku nna, kam sham ai masha ni yawng  gahkyin gum din let  akyu hpyi ga ai. Karai Kasang a tsaw ra ai myit hpe anhte ta tut hkam sha ga ai. Dai mahkrum madup hpe anhte shani shagu sakse hkam nga ga ai. Karai Kasang gaw Shi shawng anhte hpe tsaw ra ai, matut nna mung tsaw ra nga na rai nga ai, anhte mung Shi hpe bai nhtang tsawra ai rai jang, tsaw ra ai hpe bai htang nga ga ai re.” nga nna Wa Sarabyin benedict (16) XVI tsun shana sai.

    “Shinggyim masha a reng dik htum ai akyu hpyi ga gaw awng dang na matu n re, simsa wa na matu she re.”nga nna, Mungkan Wunpawng hpung mu madu daju, Simsa lam Nobel Peace Prize winner rai nga ai, (Dek Hammarsk Jold ) Dag Hammarskjold (1905 – 1961)  tsun shana lai wa sai.

Dag Hammarskjold (1905-1961), second UN Secretary General, Nobel Peace Prize winner (posthumously)

Shing rai Kahtawlik Hkristan  Hpung a simsa lam ladat gaw Hkristu a simsa lam ladat hte matut mahkai nga nna, kaga manghkang hparan ai ladat ni hte shai nga ai. “Ngwi pyaw simsa ai gaw ngai nanhte hta da ya ma sa de ai; nye a ngwi pyaw ai nanhte hpe ngai jaw ma de ai: mungkan ga na ni jaw ai zawn, ngai nanhte hpe jaw ma de ai n rai” (Yn 14:27).

            Hkristu a tsaw ra ai myit gaw Shi hpe udang de du hkra woi sa ai. “Shi a ningma ni gaw anhte a mara machyi ningma ni hpe shamai ya sai.” (1 Pet 2:24). Nawku hpung gaw, Karai Kasang a shadawn shadang n nga ai tsawra myit hpe madun na matu shinggyim masha ni a lapran e gawde da sai. Karai Kasang jaw ya ai  shanglawt hte kam sham ai myit gaw masha ni hpe jahkrum ya ai lam nnan hpaw ya sai, ndai chyeju hpe masha langai hku nna rai tim, masha   shawa hpawng hte rai tim, Karai Kasang jaw da ya sai.

“Hkristan ni nga ai kaw simsa lam nga ra ai. Simsa lam gaw tsaw ra ai hte tsaw ra ai lailen hku nna rai ra ai majaw, Kawa hte Kasha a tsaw ra ai hta myit maju jung ai, hkrit tsang ra ai lam ni kade law jat wa tim, Nawku Hpung gaw  kam sham ai hpe n shayawm ai, mungkan ga ntsa e masha ni simsa lam lu na matu tsun shana ai, daw jau ai lam  hpe  galoi mung n shayawm kau lu ai.” nga nna Wa Sarabyin Sanpra ai John Paul II hku nna tsun shadum lai wa sai.

 Madu Yesu hkum nan mung, “Nanhte myit hkum ru myit, hkrit mung hkum hkrit myit” nga nna n gun jaw da nga ai. Jn 14:27

Anhte shinggyim Masha ni gaw n kaja ai hkrit hpa lam ni hpe galaw nga ai: shawa hte kanawn mazum ai lam hta, masu magaw, sadi n dung ai lam nga chye ai. Anhte n lu la kau ai lam ni hpe myit yu nna myit machyi chye ai. Shing rai nga na malai, Hkristan masha ni gaw kraw kata e simsa lam lu na matu galaw mai ai lam law law naw nga ai: dai ni gaw, mara dat ya ai. Mara dat ya ai ngu ai gaw, mara grai htat ai hpe jahpa kau ya ai sha n re, byin sai hpe n byin ai ngu nna tsun ai mung n re. Mara dat ya ai ngu ai gaw, (Sh.K. 103:3) hta, “Na a mara yawng mayawng, Shi raw kau ya ai, na a ana ahkya mahkra hpe shamai ya nga ai” ngu ai Karai Kasang hpe shaga shalawm ai lam re. Karai Kasang madi shadaw garum ya ai rai jang, mara dat ya na n-gun lu la ai. Ndai lam hpe shinggyim masha a atsam hte sha gaw n mai byin nga ai. Rai tim Karai Kasang hte rai jang, byin mai ai lam law law shabyin ya lu nga ai.

        Na a baw sang wa hpe nang tsaw ra lu nna, na hpyen wa hpe n dawng n yawt lu na ndai, nga nna tsun da ai ga gaw, nanhte na yu ma nu ai. Ngai mahtang nanhte hpe tsun ma de ai gaw, nanhte a hpyen ni hpe tsaw ra mu; nanhte hpe zingri zingrat ai ni a matu mara, akyu hpyi ya mu: shing rai yang gaw, sumsing lamu hta nga ai nanhte a Kawa a kashu kasha ni, nanhte tai na ma rin dai; ganing rai nme law, n kaja ai ni hte kaja ai ni a ntsa e, shi a jan hpe shi pru shangun nga ai rai nna, ding hpring ai ni hte n ding n hpring ai ni a ntsa e, marang jahtu ya mu ai. Mt 5:43-45

By: Mama Kaba Sylvia Lahpai Seng Tawng