Simsa lam lu la na matu koi yen kau ra ai lam

Simsa lam lu la na matu gasat nga ai shaloi laknak jahkrat kau nna asum hkam kau ai hpe simsa lam hta shakut ai ngu ntsun lu ai. Laja lana re laknak  kaba lang nna htim gasat dang la kau ai hpe mung simsa lam shabyin dat sai ngu ntsun lu ai. Manghkang ni hpe shamyit magap kau nna, simsa lam hpaw la lu sai ngu n mai tsun ai. Laja lana lam byin nga ai gaw, masu magaw ai hte, n tara ai lam nga ai majaw rai nga ai.  N tara ai hkrang ni gaw, mawp sha ai, chyup sha ai hte,  myitru tsampu shabyin ya lam ni rai nga ai.

   Tinang a buga mungdan hta tinang hkumnan Shang lawm nna akyu hkam la lu ai lam hpa n nga ai, tinang a shanglawt ahkaw ahkang hpe jahten kau ya ai. dai majaw  laja lana re masa lam hpe aja awa ninghkap kau ra ai.  A ten galu majan hpe koi kau na matu (free society) ngu ai shanglawt wuhpung wuhpawng ni hpaw ninghtan da ra ai.

   Tara rap ra ai masa lam shabyin la nhtawm, bawngring lam hta shakut la ra  ai. Dai majaw lachyum pru ai bawngring lam hta shakut ai, shada da garum shingtau hkat ai gaw, majan hpe koi yen kau ai lam galaw ai nan re. Simsa lam hpe gaw gap nga ai re.

(Wa Sarabyin Paulu VI) tsun shana lai wa sai hta,Simsa lam a mying ningnan gaw bawngring rawt jat ai lam re, nga nna tsun lai wa sai.”

      Mungdan kata hta, “Mara a hkrang ni” hte dai kaw nna shabyin  shapraw  dat ai mara ni gaw simsa lam hte bawngring lam  hpe jahen kau ya nna, simsa lam a matu hpyen kaba rai nga ai.   Wa Sarabyin Pawlu   tsun da ai hte maren, “Simsa lam a mying ningnan gaw bawngring rawt jat ai lam re”. nga ai the maren, bawngring rawt jat ai magam hpe anhte  gahkyin gumdin let ta tut hkan  galaw nga ai rai yang,  simsa awngdang ai maga de sa wa nna,  bawngring ai de du mat  wa na rai nga ai.

      Simsa lam hpe hkrang shapraw ai shaloi, Mungdan Asuya ni gaw shanhte hkrai,  tang du hkra nlu galaw ya lu ai. Simsa lam hpe grai na hkra n lu shagrin ya ai. Dai lam hpe Nawku hpung shagu mu maram hkrup ai majaw, Nawku hpung hku nna, shawa hte seng ai sharin shaga ai lam hte sharin matsun ya nga ai.

      Nawku hpung gaw bawngring lam, garum ningtum lam sha n-ga, buga hte shawa wuhpung wuhpawng ni, mungdan ni a lapran e, shada kam shamyet hkat ai, Simsa lam gawgap ya ai lam mung galaw ya nga ai. Kahtawlik Nawku Hpung hta mungkan shadang hkan lang ai hkrang masa nga ai majaw,  ntara ai up hkang masa ni hpe, shading sharia ya na ahkaw ahkang lu nga ai. Shing rai, lapran lam hku nna jeyang na matu hte n tara ai hku uphkang ai mungdan kaw nga ai Hkristan ni hpe n-gun jaw ya lu nga ai.

      Majan shing n rai laja lana du daw sai hkaw ai the seng nna, tsun shadum a ai matsun maraoi ga ni hpe madat la yu ga.

      Moi na Salang myitsu langai tsun ai ga malai gaw,

“Karai Kasang gaw, ngai hpe grai dai ai nhtu kaja jaw da ai, raitimung, dai hpe jai lang na ahkaw ahkang n jaw ai.”  Ndai lachyum gaw hpa hpe ngu mayu ai kun manaw manang shada bawngban yu ga.

      (1917-1963) ning hta nga lai wa sai American Gumsan magam  John F. Kennedy  “Masha amyu langai gaw, masha amyu langai hpe majan gasat nna, garai n shamyit kau yang, masha amyu gaw majan hpe shawng shamyit kau ra ai”. nga nna tsun lai wa sai. Lachyum gaw, masha amyu langai gaw majan hta grau ahkyak ai grau manu dan ai ngu mayu ai re.

      “Simsa  ai ngu ai gaw laja lana lam n nga ai, ngu mayu ai n re,  tara rap ra ai a byinyan langai re, ngu tsun mayu ai ”. nga nna ( Aram I ) ngu ai Armenian hpung sara wa tsun lai wa sai.

Aram I,  (b. 1947) Catolicos of the Armenian Apostolic Church 2007      

            Hpu nau ni anhte Myanmar mung hta, laknak hpe kam nna, masha rim ai, htawng sharawng ai, adup gayet zingri sat ai, Mungchying sha ni a dum nta arung arai jahten shaza ya ai , lagu la kau ya ai, laja lana adup gayet ai, dik hkra jamjau jaw nga ai, matse labye hpung ni nga nga ai. Dai hpung ni hpe shawng  jawm shamyit kau ai hpang e sha,   ngwi pyaw simsa tara rapra lam,  sut su bawngring lam, hpe myit hkrum myitra jawm galaw ai rai yang, Ngwi pyaw simsa ai chyeju  gaw shi hkrai shi du sa wa na rai nga ai law.

 

 

By: Mama Kaba Sylvia Lahpai Seng Tawng

 

 

 

 

 

 

 

 

 

 

 

 

 

 

 

 

 

Add new comment

2 + 17 =