Simsa Lam hte Tsawra Ai Lam

Tsawra myit gaw myit masin salum hte Wenyi a magam bungli kaba re ai hpe anhte chye na mai nga ai.Shinggyim masha shagu gaw masha hpe tinang tsawra na hta, masha wa mahtang tinang hpe tsawra la na hpe grau nna ra sharawng ai hpe anhte mu mada na re.

Kaja wa nga jang anhte shingyim masha ni nga sat nga pra ai lam a yaw sing ai lam gaw, Karai Kasang anhte hpe jaw da ai tinang mung tsawra hkrum ai zawn, tinang mung masha wa hpe tsawra ra ai ngu ai chye na ra nga ai.Anhte hpe masha ni tsawra ai shaloi, anhte pyaw ai kabu ai zawn, anhte hpe masha ni nju ndawng ai shaloi anhte hkam sha ai, n pyaw ai , myit masin hta simsa ai hpe nlu la ai hpe anhte mu mada na ga ai.

Rai yang  shinggyim masha ni a sak hkrung nga pra lam gaw, asak hkrung ai ndai tsawra myit a apu asi ni,grin nga ai tsawra myit a apu asi ni hku nna, shinggyim masha ni gaw nga mu nga mai ai hku nna ngwi pyaw simsa ai hku nna anhte sawn la mai nga ai.Tsawra myit ngu gaw galoi mung hpungshing kang nga nga ai.Dai tsawra myit a marang e du daw sai hkaw hkrum ai, share shagan ni share nighkring ni nga ai hpe anhte mu mada na re.

Ga shadawn tsun ga nga jang, tinang a kun dinghku a matu, dai tsawra myit a majaw  kanu kawa ni kashu kasha ni sak jaw ap nawng ai du hkra sak se hkam ai.Ru yak jam jau ai lam ma hkra hpe hkam sharang la lu ai.Ndai lam ni gaw tsawra myit  ngu ai gaw galoi mung arawng sadang nga ai majaw rai nga ai.Wuhpung wuhpawng a matu, myu sha a matu, tinang a Buga a matu, tinang a Mungdan a matu tsawra myit a majaw e sak jaw ap nawng ai share shagan ni shara shagu hkan nga ai hpe anhte mu mada lu na re.

Shinggyim masha ni a tsawra myit gaw gawng kya ai ngu ai hpe mung anhte mu mada lu nga ai.Gara hku gawng kya n hkum zup ai ta nga yang, tinang a ntsa kaja ai ni hpe tinang tsawra ai. Tinang a ntsa n kaja sai nga yang n kam tsawra ai. Tinang hpe akyu jaw ai shaloi tsawra ai, tinang akyu yawm wa ai shaloi dai masha wa hpe n kam tsawra ai lam hpe anhte mu mada lu na re.Kahpu kanau makyin jinghku sai daw sai chyen daw ai shaloi, manaw manang daw ai shaloi tinang tsawra ai lam hpe mu mada na tsasam rai taw nga yang nkam tsawra ai hpe mu mada lu na re.

Ndai lam ni gaw anhte shingyim masha ni a tsawra myit gaw nhkum zup ai gawng kya taw nga ai ngu hpe madun dan ai lam ni rai nga ai.kaja wa nga jang kawng kya ra rawng ai lam ni hpe hkap la nna tsawra ai, myit galu kaba ai hte sak jaw ap nawng let tsawra ai lam ni gaw, kaja wa teng man ai jet ai tsawra myit ni re ai hpe anhte mu mada lu na re.Dai majaw Madu Yesu gaw shi a tsawra myit hpe hkan sa na  matu tara nnan jaw dai rai nga ai.Shinggyim masha ni a tsawra myit hpe lakap nna anhte hkawm sa ai n re sha, shinggyim masha ni a n hkum tsup ai gawng kya ai  tsawra myit hpe madung tawn nna hkawm sa ai sak hkrung ai lam n re sha, Karai Kasang a tsawra myit hpe madung tawn nna, anhte a myit masin hta tawn da bang da nna hkan sa na matu Madu Yesu hkristu gaw dai tsawra myit tara nnan hpe shi Sape ni hpe jaw da ai rai nga ai.

Dai re majaw Madu Yesu hkrsitu gaw shinggyim masha ni a gawng kya ai nhkum tsup ai mara lu ai lam ni ma hkra hpe chye na hkap la mara raw dat ya nna anhte shinggyim masha ni hpe tsawra ai lam rai nga ai.Dai majaw Karai Kasang a tsawra myit gaw galoi mung hkum tsup ai galai shai ai lam nnga ai tsawra myit ngu nna anhte tsun ai lam rai nga ai.Dai hpe Agape Love ngu nna anhte tsun ga ai.

Re yang tsawra myit hte nhtan shai ai lam ni gaw kaning re ai ai ni rai ta ngu anhte bai sawn yu ai shaloi, manaw manang wa hpe  ju ndawng ai, manawn masham ai, nteng nman ai hku masha hpe shatan ai, jahpoi asawng galaw ai, gara ginhka ai masha ni hpe manu n shadan ai, jasam tai shangun ai, manaw manang wa hpe mara n raw dat ya ai, garum shingtau n chye ai ndai zawn re ai ni mahkra gaw tsawra myit hte nhtan shai ai lam ni re ngu hpe anhte sawn la mai nga ai.N dai zawn tsawra myit hte nhtan shai nna nga sat nga sa ai  lam ni a majaw anhte simsa lam hpe jahten ai lam byin nga ai.

 Ahte tsawra ai lam hta masha lawm na, Karai Kasang hpan da ya ai dusat du myen hpun kawa ni lawm na nhprang sut rai ni lawm na rai nga ai.Karai Kasang jaw da ai tinang htunghking laili laika ni law law lawm nga ai.Ndai zawn Karai Kasang hpan da ya ai tu matu hkrung mahkrung arai mahka a ntsa anhte tsawra ai lam gaw simsa lam hpe gaw gap sa wa ai lam hta grai ahkyak ai rai nga ai. Ndai zawn re ai ni a marang e, kaja wa anhte simsa lam lu ma ai, majan ngu ai ni mung hkoi mat wa na re.Tinang a lamu ga hpe kaja wa tsawra ai marang e majan ngu ai hkoi mat mai nga ai.Htunghking hpe manu shadan ai masha amyu baw sang hpe manu shadan hkungga tsawra ai marang e majan hpe shazim kau mai nga ai.

Kun dinghku hta wuhpung wuhpawng hta dai zawn re ai tsawra myit a marang e anhte tinggyeng magam bungli hpe shayawm ai marang e simsa lam hpe gaw gap sa wa mai ai ngu hpe anhte sawn la mai nga ai.Dai re majaw tsawra myit a magam bungli gaw tsawra ai lam hpe bai nhtang lu ai lam ni rai nga ai.Tsawra myit nnga ai shara gaw nsin htawng hta rawng taw nga ai hte bung ai hte majan pa hta hkawm sa ai hte bung ai ngu nna mung anhte sawn la mai nga ai.

Simsa lam tara rap ra myit hkrum myit ra lam ma hkra gaw dai tsawra ai lam kaw maju jung ai, dai tsawra ai lam hta maju jung ai re ngu nan sawn la ma nga ai.Anhte simsa lam hpe gawgap sa wa ai lam shagu hta tsawra myit hpe maju jung nna gaw gap sa wa ai nga jang Myit masin hta mung Amyu sha lam hta mung Mungdan hta mung ngwi pyaw simsa wa na rai nga ai.

Fr.John Hpungshang Awng Htoi