Simsa lam hpe jahten sharun ya ai lam ni

online photo

Hpunau ni simsa lam hpe makawp maga ai shaloi, simsa lam hpe jahten sharun ya ai lam ni gaw hpa rai kun shawng maram yu mai ai. Masha wuhpung langai mi hku nna,   mungchying shawa masha ni hpe, shadawn sharam n nga ai sha jahten shaza ai, Mung shawa hpe tsi hte sat ai, dat rai hte sat ai, ngarai laknak hte sat ai, jahten shaza ai gaw Karai Kasang hte shinggyim masha hpe shut ai mara kaba rai nga ai, simsa lam hpe jahten sharun ai nan rai nga ai.   

             Mungdan ni hta, tinang a mungdan hpe makawp maga na matu Laknak zing da ai shaloi  “Shadawn sharam ai hte lang na matu hkang ya ra ai, dawm kau ya ra ai, nga nna Wa Sarabyin Yawhan Paulu II, October 14, 1985 shani shana lai wa sai. Hpa majaw nga yang, mungkan ting laknak shalaw jat na, shapraw  jat na nga jang, mungkan sim sa lam hte shanglawt ahkaw ahkang  a matu tsang shara kaba rai nga ai.

            Mungdan shagu, tinang a mungdan hpe, tara shang makawp maga na matu sha, laknak lang na ngu ai tara hkan lang ra ai. Ndai lam hpe Laknak galaw ai ni mung, dut shabra ai ni mung, mari la ai ni mung hkan nang ra ai tara rai nga ai. Ladu lai jan hkra laknak sumpum mahkawng da ai, mungkan ting de n tara ai hku laknak hpaga ga ai gaw simsa lam hpe jahten ai re. Laknak kaji hpaga ga ai hpe pyi mungdan ni hku nna hkang  sharam ya ra ai.

 

             Laknak kaba madu da lu ai hpe kam nna, jahkrit shama ai, Dingsa ai lam galaw chye ma ai. Dai gaw mara n lu ai masha ni yubak hkrum na hpe dingsang lata la nna galaw lam re. Dingsa ai gaw shinggyim masha a asak hpe hkra ai majaw tsepkawp ninghkap kau ra ai;   Dingsa ai bungli gaw n ju n dawng ai, du daw sai hkaw ai, si hkrung si htan shabyin ai, matai htang ai nli tum hpe gat hkai dat ai nan rai nga ai. Dingsa ai lam gaw, majan hpyen masa a bandung  mung n rai nga ai. 

               Mungdan n kau mi hta, Karai Kasang a mying hte masha wa hpe sa dingsa ai, madu a hkum hpe madu dingsa ai lam galaw ai ni nga ma ai. Dai gaw Karai Kasang hpe n gawn n sawn di ai nan rai nga ai. Dai hte maren dingsa ai bungli galaw nna si ai hpe “tara sakse” ngu nna n tsun lu ai. Hkristan ni a tara sakse ngu ai gaw, shi a makam masham teng man ai hpe hkam la nna, ra ang jang si hkam na matu jin jin re ai myit masa rai nga ai. Dai hku sakse hkam ai shaloi kaga shinggyim masha hpe galoi mung n mai sat ai.

                 Dingsa ai hpe gasat na matu, dingsa ai hpe shabyin ya ai ru pawt ni hpe gasat kau ra ai. Dai majaw anhhte  n lu hkang ai dingsa ai lam n byin wa na matu, npru wa na matu shawng nnan makawp maga da ra ai.  

                “Dingsa ai hpe hpyen gasat masa hku lang yang galoi mung n awng dang na re. Laknak hta gumhpraw shama na malai matsan masha ni a prat hpe grau kaja hkra galaw ya ai gaw grau kaja ai zai ladat re.” nga nna, 1940 ning hta SImsa lam shagrau kumhpa lu da sai Bangladesh my sha  Muhammad Yunus ngu ai wa tsun shana da sai.

 Hpunau ni, Tinang a mungdan kata e, tinang a mungchying sha ni hpe kadai mi si yang si nga nna, nbungli hte bawm kaba n sim n sa jahkrat  bun ai, mungchying sha ni si ma ai, dum nta hten za hkrum ai. Ndai zawn dingsa gasat ai hpe makawp maga na matu, n bungli sau htaw ya ai mawdaw hpe kapaw kau ya ai, ntsa kaw nna bawm jahkrat nga ai n bungli hpe gap jahkrat kau ya ai gaw, simsa lam hpe makawp maga ai n rai a ni?  Mungchying sha ni a asak hpe makawp maga ai n rai a ni? Tinang a ningmu hpe comment kaw hpaji jaw hkat ga ngu shana dai n ngai law.   

 

By: Mama Kaba Sylvia Lahpai Seng Tawng

 

 

 

 

 

 

Add new comment

3 + 11 =