Simsa ai ngu ai gaw hpa rai ta?

online photo

Simsa lam shabyin na matu Hkristan ni gara hku galaw hpang na i?

   Simsa lam ngu ai gaw, ga gaduk kata kaw jahkrum bawngban la ai hpe n ngu mayu ai. Dai hta n ga, saboi ku n tsa kaw, ga shaka da, hpang ai hpe mung n ngu mayu ai. Ntsa na yu hkrat ai simsa lam gaw galoi mung shinggyim masha langai hte langai a salum kata kaw nna hpang wa ai; dai kaw nna chyam bra wa ai rai nga ai.

   Akyu hpyi ai hte Karai Kasang a Mungga madat la ai Hkristan masha langai gaw shi hkum hta shi, simsa ai lam lu la da sai. Karai Kasang a shaman chyeju hpe jahkrat jaw ya ai Sakramentu ni hkam la na mung grai ahkyak nga ai, grau nna mara raw ai sakramentu gaw, simsa lam a jet a sakramentu rai nga ai.

   Kraw kata na simsa lam hpe shawng nnan lahkam hkam nna, dai hpang tinang a htingbu wa hpe tsaw ra ai myit hte hkrum ai shaloi simsa lam lu la nga ai. Langai hte langai simsa ai hte nga lu na matu mara dat ya nna bai hku hkau mayu ai myit masa hta lai nna, kaga ladat n nga sai.

    “Na shabyi maga mi bye ai wa hpe, maga mi naw ja ya u” (Lk 6:29).  Na a ngwi pyaw sim sa ai lam gaw, dinghku kata e mung, manaw manang ni a lapran e mung, shawa hpawng shangwang hta mung na a simsa ai gaw htoi kabrim nga u ga.

Simsa lam hpe shabyin ai ni gaw a lu ma ai: kaning rai nme law, shanhte hpe, Karai Kasang a kasha ni, ngu nna shamying na ma ra ai.

Mt 5:9

 “Madu wa hte madu jan dang rang hkat ai gaw , galoi mung byin chye ai lam re: Galoi mung byin nga ai re.  Raitim, ngai hpaji jaw mayu ai gaw: simsa lam hpe shawng n shabyin ai sha, dai shani hpe hkum jahtum kau u!” nga nna, Wa sarabyin Francis gaw 2014 ning Sept. shata 14 ya shani, kun dinghku de ai ni a matu Missa hkungga nawng ya ai shaloi tsun shadum lai wa sa

Majan n nga ai hpe simsa ai ngu nna masha law law sawn la ma ai; masha n kau gaw hpyen lahkawng a lapran e hkam sharang  nna nga lu jang simsa ai ngu sawn la ma ai. Ndai mahtai lahkawng yan n hkum tsup shi ai re.

   Simsa ai ngu ai gaw hkrang (tara) shim ai, ngang grin ai,  grau lachyum sung ai hku tsun ga nga jang, Karai Kasang a hkrang (tara) hta ngwi pyaw ai, myit dik ai ngu ai re. Ndai simsa ai lam gaw anhte a bandung re. Karai Kasang ra sharawng ai hku asak hkrung nga sa nna, mungkan hta  tara rap ra ai, tsaw ra ai, bungli galaw ai shaloi Karai Kasang ra sharawng ai simsa lam hte maren galaw lu ai.

    Ding hpring ai, myit kaja ai, teng man ai hpe galoi mung tam ai , manaw manang ni a matu tara rap ra ai hte nga mu nga mai ai hpe shakut ya ai, madu a matu n myit ai sha, tsaw ra ai tara hkaawm sa ai. Shinggyim masha yawng a ahkaw ahkang hpe madi shadaw ya ai hte, lam shagu makawp maga ya ai rai jang, anhte Karai Kasang a npawt nhpang yaw shada ai hpe hkan shatup ai rai nga ai. Dai gaw simsa ai lam hta hkawm sa hpang wa sai rai nga ai.

      Wa Sarabyin Yawhan Paulu II 1995 ning Philippines mungdan Manila mare kaw Ramma nhtoi poi galaw ai shaloi tsun shana ai gaw,  “Ramma ni gaw htawm hpang na myit mada shara a npawt nhpang rai nga myit dai. Nanhte ramma ni a tsawm ai labau bandung du lu na matu, tsaw ra ai myit, kahpu kanau myit, gahkyin gumdin ai myit rawng ai htunghking hpe gaw gap mu.” Nga nna tsun shana ya sai.

Pope St. John Paul II,  World Youth Day 1995 in Manila

Wa Sarabyin Pawlu VI tsun shana ai hta,    “Simsa ai ngu ai gaw atsam rawng ai ni a lapran e majan n nga ai sha, majoi mi shatsawm shara da ai lam n rai nga ai; Karai Kasang jahkrat da ai tara hte maren masha ni a lapran e tara rap-ra ai hkrang maga de shani shagu n-gun dat sa wa ai hpe, simsa ai ngu mayu ai re.

   Dai majaw Majan n nga jang simsa nga ai ngu n sawn la ai sha, majan byin nga ai lapran e myit kraw kata simsa ai lam law law lu la mai nga ai.  Bai masha n kau gaw hpyen lahkawng a lapran e hkam sharang  nna nga lu jang simsa ai ngu sawn la ma ai.  n dai mung sim sa lam ajet n rai nga ai.

    Karai Kasang jaw ya ai simsa lam ajet gaw, shinggyim masha langai hte langai a salum kata kaw nna hpang wa ai; dai kaw nna chyam bra wa ai rai nga ai. Akyu hpyi ai hte Karai Kasang a Mungga madat la ai Hkristan masha langai gaw shi hkum hta shi, simsa ai lam lu la hpang wa sai rai nga ai.  

 

By:Mama Kaba Sylvia Lahpai Seng Tawng

 

 

 

 

 

 

 

 

Add new comment

11 + 3 =