Shinggyim Masha Ni Gaw Shawa Hte Kanawn Ra Ma Ai

google photo

Shinggyim Masha" ngu ai ga gaw gara hku mung n shut n shai lu ai sari sadang hpe lu ai ni hpe tsun mayu ai. Masha gaw Karai Kasang a hkrang sumla hte hpan da hkrum ai wa re (Npawt. 1:27).

Dai majaw hpan da hkrum ai hta shi chyu sha Hpan Madu hte bung ai wa re. Karai Kasang hpan da ai arai ni hta na "shinggyim masha hpe chyu sha Shi Madu a matu hpan da ai re" (GS 24).

Karai Kasang hpan da ai masha re ai majaw, shinggyim masha gaw arai lama ma n re, shi gaw masha marai langai ngai re ai majaw laklai ai hku nna manu dan ai. Masha gaw shinggyim masha re ai majaw madu hkum nan madu chye lu ai, myit sawn sumru yu lu ai, ndut ndang dawdan lu ai hte kaga masha ni hte kanawn mazum lu ai.

Bai nna, shi gaw kam sham ai hte Karai Kasang hpe bai htan lu ai. Karai Kasang a hkrang sumla hte bung nna hpan da ai ngu ai hta shinggyim masha gaw galoi mung Karai Kasang hte seng nna shi a atsam marai gaw Karai Kasang hta chyu sha hkum tsup wa lu ai ngu mayu ai re. Masha gaw shi a sung htum ai mabyin hta shawa hte kanawm mazum ra ai wa re. nga nna Vatican Zuphpawng 2 hta shadum da nga ai.Vatican Council I, GS 12.

Dai rai yang shinggyim masha gaw hpa majaw shawa hte kanawn ra a ta? Shinggyim masha gaw kaga shinggyim masha ni garum ya ai hte sha shi sak hkrung lu nna rawt jat wa lu ai. Shinggyim masha ngu ai gaw Karai Kasang hte kaja ai hku kanawn mazum ra ai sha n-ga, kaga masha ni hte mung kaja ai hku nga na matu shakut shaja sadi ra nga ai.

Dai gaw n ta dinghku hta shawng n nan hpang wa sai; manaw manang ni, hpang jahtum shawa shingwang kaw du hkra tang du wa ai. Shinggyim masha a shawa hte seng ai npawt nhpang gaw anhte hpe la hte num ngu nna hpan da ai majaw re (Npawt. 2:23). Ningnan hpang ai kaw nna (la ) hte (num) hta sari sadang langai sha re.

Shada da garum shingtau hkat ai hte jahkum shatsup hkat nna, rau nga shalai na matu rai nga ai. La hte num yan a tsaw ra kanawn mazum ai asi gaw kashu kasha shaprat wa ai. Dai majaw, dinghku gaw masha hpawng shagu a npawt nhpang rai nga ai. Shinggyim masha gaw wenyi lam hta kung hpan wa nna, Karai Kasang tinang hta ru jung nga ai tengman ai lam hte tinang a wenyi lam hpe tinang hkum nan chye wa nhtawm, Karai Kasang hte matut mahkai chye wa jang chyu sha, shinggyim masha gaw rawt jat wa lu ai. Karai Kasang hte tsan gang ai shaloi, masha gaw n shu n shang rai nna n zim nga ai. Pope Benedict XVI, CiV 11

Ndai tengman ai lam ni gaw adan aleng sha rai nga ai, dai gaw masha yawng gaw maren sha hpan da hkrum ai, shanhte kaw na kadai mung n kashun la lu ai ahkaw ahkang ni hpe Hpan Madu jaw da ai, dai ahkaw ahkang ni gaw Asak, Shanglawt hte Ngwi Pyaw Simsa lam ni re. Declaration of Independence (1776) of the thirteen colonies that formed the United States of America

Shinggyim masha ni gaw Shinggyim hpawng hta sak hkrung nga pra nga ai. Shawa hta nga pra ai hpe shawng ningnan mahkrum madup lu ma ai. Kun dinghku masha shada da ga shaga ai ten, shada da myit tsang myit yu ya ai ten, tingkyeng myit ra ai lam hpe shingdu da nna yawng a myit ra ai hte ngwi pyaw lam hpe madung da ai ten ni gaw, dinghku asak hkrung ai ten nan rai nga ai.

Karai Kasang hpan ai zawn, dinghku kata hta mung kashu kasha shaprat ai shaloi, hpan da ai magam galaw nga ai. Shawa hte matut mahkai ai masha re majaw anhte shinggyim masha ni mung Karai Kasang a hpan ai amu hta shang lawm nga ga ai. Dai majaw anhte hta hpan da ai arai ni a ntsa e mung, kaga hpan da ai masha ni a ntsa e mung, lit nga ai.

Shinggyim masha shagu gaw galoi mung, shara shagu e mung chyoi pra nga ai hte shanhte hpe nlu jahten ai. Shawa hte seng ai anhte a lit nga ai majaw anhte shada si mani ai hku yu lakawn hkat ra ai. Dai lit gaw shingra masa hte mung seng ai majaw, dai hpe jahten shaza n mai ai, galoi mung atsawm sha lit la ra ai.

Kahtawlik Nawku Hpung a sharin shaga ai lam madung gaw shinggyim masha nan rai nga ai. Shinggyim masha gaw shawa a npawt nhpang nan re; dai majaw, shawa hte seng ai lam ni yawng hta shinggyim masha gaw madung nan rai nga ai. Shinggyim masha ni gaw shanhte a sari sadang hpe makawp maga na hte seng nna, ruyak shoihpa hte hkrit tsang hpa law law hkrum nga ai.

Sharu shatsang ai hte jahten sharun ai hpe mara ngu ai. "Npawt shuthpyit mara" hpe shut ai Adam gaw mara hte masha ni hpe yubak jaw na matu agung alau hkrum ai hta, shi gaw shinggyim masha a shawng na kasi rai nga ai. Anhte yawng gaw shinggyim masha rai nga ga ai hte anhte yawng gaw mara lu ai ni rai ga ai.

Anhte a mara lu ai sat lawat hku nna masha ni hpe yubak jaw ga ai. Dai majaw ndai mungkan ga gaw ngwi pyaw ai paradisu n rai mat sai. Aten shagu anhte mara n galaw na hku mai byin ai, raitim, mara gaw anhte a myit sung htum ai shara hta, shanglawt nga ai shara kata de shang wa sai majaw, mara hpe dingsang galaw shut ai: anhte a shanglawt myit hta e Karai Kasang ra ai hpe ninghkap kau ai majaw, anhte a asak npawt rai nga ai.

 Karai Kasang kaw nna hka mat wa ai. "N kaja ai ngu ai gaw kaja ai lam n nga ai hpe ngu ai re. St. Thomas Aquinas (1225-1274) Anhte mara n lu ga ai, nga nna tsun ga yang gaw, anhte hkum hpe anhte hkalem kau ga ai rai nna, tengman ai myit anhte hta n rawng sa ga ai. I Yh. 1:8

 

 

 

 

 

 

 

Add new comment

1 + 0 =