Shinggyim Masha Hte Awmdawm Ahkaw Ahkang

Tara rapra ai shawa gaw shinggyim masha a sari sadang hpe hkungga nna madi shadaw ya nga ai. Shawa hte seng ai tara hkrang nga ai gaw shinggyim masha ni sari sadang hte sak hkrung nga lu na matu rai nga ai. Dai majaw kaning re ai sut masa, mung masa tara hkrang raitim, masha hpe roi sha nna lakung lakap shatai ai lam hpe koi kau ra ai. Dai majaw, masha hpe bandung langai ngai a matu lakung lakap shatai ai lam hpe galoi n mai galaw ai. Shi gaw shi nan bandung rai nga ai.

          Dai rai yang shinggyim masha ni gaw awmdawm ahkaw ahkang gade daram lu ra a ta. Awmdawm ngu ai gaw shinggyim masha ni manu shadan da ai lam a   npawt nhpang aru madung rai nga ai. Awmdawm ai hte awmdawm ai hku galaw lu ai gaw shinggyim masha ni a shawng na npawt nhpang ahkaw ahkang mung rai nga ai.

Ngai hkum nan awmdawm ahkaw ahkang lu nna mai kaja ai lam dawdan lu jang sha ngai galaw ai bungli a matu ngai lit la lu nga ai. Awmdawm ahkaw ahkang lu ai shinggyim masha chyu sha Karai Kasang hpe tsaw ra lu ai, Shi hpe bai nhtang sak jaw lu ai. Awmdawm ahkaw ahkang hta chyu sha shawa hte seng ai lam, madu hte seng ai lam ni hpe hkrang shachyaw la lu ai.

Shinggyim masha a awmdawm ahkaw ahkang hpe mung masa, shawa masa, ja gumhpraw masa, tara masa, htunghking masa  ni kaw nna ya sha ya sha shagyip ya nga ai. Ahkaw ahkang hpe dawm la kau ya hkrum nga ai, n tara ai hku shagyip kau hkrum nga ai dai gaw grai n tara ai lam re. Dai gaw shi a sari sadang hpe hkra machyi shangun ai hte shi rawt jat wa na matu dingbai dingna jaw ai lam rai nga ai.

          Masha gaw awmdawm ahkaw ahkang lu ai, raitim, shi hta bandung nga ai. Kaja wa nga jang, kaja ai lam hpe anhte chye na nna dai hpe galaw lu na matu awmdawm ahkaw ahkang ngu ai lu ai re. Ndai lam hte seng nna shingra tara hte hpan da ai masa hta mungkan ga hpe Karai Kasang lachyum pru ai hku masa jahkrat da ya nga ai.

Kaja ai hte n kaja ai hpe anhte a kraw kata (conscience) kaw nna chye ai. Kraw kata ngu jang, shinggyim masha a tengman ai nsen, masha yawng a masin salum hta ka da ai nhprang tara (Rom. 2:15) re. Anhte myit yu mang yu nna anhte a kraw kata e galoi mung kaja ai manu dan ai lam ni hpe chye nga ai. Dai the maren maw sha ai, lagu ai, masha sat ai gaw n kaja ai lam re hpe mung chye nga ai. Rai timung kalang lang kraw kata na nsen gaw shut chye ai.

Kaja wa nga jang, awmdawm ahkaw ahkang gaw galoi mung kaja ai hpe sha myit ai gaw n rai nga ai, kaja na zawn re ai tingkyeng myit hku nna myit la chye ma ai. Dai majaw anhte a kraw kata na nsen hpe galoi mung kaja na matu sharin la ra ai. Tengman ai manu dan ai lam ni hpe anhte hkum nan shadum la ra ga ai. Anhte kaja ai hpe galaw lu na matu Madu Yesu hkum nan Awmdawm ahkaw ahkang hpe   lam matsun shalawt ya ai rai yang sha kaja ai lam hpe galaw lu na re.

          Shinggyim masha yawng hpe Karai Kasang gaw Shi a hkrang sumla hte maren hpan da ai majaw, num/la, bawsang, makam masham, amyu roi sai nsam ni n bung tim shanhte hta n mai la kau ai sari sadang maren sha lu ma ai. Ndai lam teng ai majaw, shinggyim masha ni a lapran e garan gyinghka ai, tara rapra lam  n nga ai lam ni hpe la kau ra ai. Dai gaw masha shagu a rawt jat lam, maren re ai ahkaw ahkang hte masha shagu a sari sadang hpe shajaw shateng na matu rai nga ai.

          Shinggyim masha rai nga ai Num hte La gaw masha a sari sadang hku nna nga jang, Karai Kasang a man e maren sha re. Karai Kasang gaw shinggyim masha hpe hpan ai shaloi, majoi mi n mu lu ai hku hpan ai n re, Num shing n rai, La hku nna hpan ai. Shinggyim masha hpe Karai Kasang hpan ai shaloi, Num hte La gaw shada da ningrum ningtau tai na matu rai nna shan shada da (ra) nga ma ai, langai a ntsa langai dang sha na matu n re, langai gaw langai hpe shagrit kau na matu mung n re (machismo gaw la jet jet, la nden marai rawng ai; radical feminism gaw Num jet jet, Num nden marai rawng ai). Dai majaw Num, shing n rai, La ngu jang, (role) ngu ai shang lawm lit la ai lam nga nga ai. Hkristan ningmu hku nga jang, Num hte La gaw shada da tsaw ra matut mahkai ma ai rai nna, Karai Kasang hta kahkyin gumdin nga ma ai.

          Bai nna, hkumhkrang nkung ai ni hpe garan ginhka kau ai hte seng nna Nawku hpung sharin ya ai lam ni nga nga ai. Masha hpawng hta lawm ai masha yawng gaw daju shawa hte seng ai, sut masa hte seng ai, mung masa hte seng ai, htunghking hte seng ai shamu shamawt ai hta tara rapra lam nga ai, ngu nna Kahtawlik Nawku Hpung a shawa hte seng ai tara kaw matsun da ya nga ai.   Masha nkau hpe garan ginhka kau ai hkrang ni gaw n tara ai re. Dai majaw asuya hte seng ai, shawa hte seng ai bungli ni hta, hkum hkrang n kung n kang re masha ni mung shang lawm lu hkra galaw ya ra ai.

Hpang jahtum tsun ga nga jang, shinggyim masha a sari sadang gaw hkum hkrang hte myit marai hta n hkan ai hte masha hpe hkungga ai lam gaw awng dang ai hte tang du ai hta mung n hkan ai.  

Masha hpawng gaw dai hta shang lawm ai masha ni a myit ra ai hpe madung da nna gumhpawn da ai n re, shanhte a apnawng ai lam hpe madung da nna gumhpawn da ai rai nga ai. nga nna Fransik my sha laika ka sara wa Antoine De Saint-Exupéry  tsun shana lai wa sai…………..(1907-1946), French writer

     Masha langai ngai hpe tsaw ra ai ngu ai gaw Karai Kasang shi hpe mu mada ai hku shi hpe mu ai lam re. Karai Kasang n lawm ai myit kraw lawang gaw hkrit hpa rai nga ai. nga nna Russia myu sha laika ka sara wa Fyodor M. Dostoevsky tsun shana da nga ai.Fyodor M. Dostoevsky (1821-1881), Russian author

Tengman ai lam mung nanhte chye lu na ma rin dai rai nna, dai tengman ai gaw, nanhte hpe shalawt dat na ra ai, ngu nna tsun mu ai. Yh. 8:32

     Awmdawm ngu ai gaw lahkawng hte lahkawng pawng jang mali ngu ai re. Dai hpe myit hkrum jang, ngam ai daw gaw shi hkrai shi myit hkrum wan a re. nga nna English my sha laika ka sara wa  George Orwell tsun shana lai wa sai.

George Orwell (1903-1950), English writer

Awmdawm ahkaw ahkang ngu ai gaw lit la ai hpe ngu mayu ai re. Dai majaw masha ni law malawng lit la ra na  hpe hkrit ma ai. nga nna Irish my sha laika ka sara wa George Bernard Shaw tsun shana lai wa sai……………………

George Bernard Shaw (1856-1950), Irish dramatist

 

 

Add new comment

10 + 1 =