Kahtawlik Nawku Hpung shata hti laika hpe shaning  A,B,C nga nna garan da ai gaw, hpa lachyum rai kun? Kaga hpu nau hpung ni kaw  mung nga ai kun ?

Ndai lam hte seng nna chye na ai ni nga ai zawn, hpa majaw dai hku masat da ai ngu hpe n chye shi ai hpung masha ni hkaja la lu na matu tang madun dat ga ai.

Nawku Hpung a shawa nawku daw jau hpawng ai hkrang (Liturgy) ngu ai hpe Yuda makam masham prat kaw nna hpang wa sai re.

Grau nna Karai Kasang a Mungga hpe laban shani shagu shawa hpawng, Nawku Jawng hkan hti hkaja la ma ai.

Nawku Hpung hta Karai Kasang Mungga, Ga Shaka Dingsa (Old Testament) hte Ga Shaka Ningnan (New Testament)  hpe laban shani shagu na matu garan dat ai shaloi, (3) ning a matu lu nga ai.

Dai hpe shaning A,B,C ngu nna masat ya ai .Anhte Kahtawlik Shata Hti Laika ni hta hpung masha ni shagu, laban shagu hti lu hkra, Chyum Mungga daw ni hpe masat bang da ya ai rai nga ai.Masum ning laman, lani hte lani hti ai Chyum Mungga ni n bung ng ai.

Hpung masha langai mi gaw, masum ning tup shani shagu, laban shagu hti ang ai Chyum Laika ni hpe man man hti ai rai yang, masum ning rai jang shi Chyum Laika Buk ting hpe hti ngut sai ngu mai tsun ai.

Dai ning 2020 ning gaw, Shaning ‘A’ shaning ang ga ai.Bai nna, ndai hkrang hpe kaga hpung hkan mung lang ai kun ngu yang, Kahtawlik Nawku Hpung hte grai naw ni ai - Greek Orthodox, Anglicans, Lutheran zawn re ai Nawku Hpung kaba hkan gaw loi bung ai hku nna naw lang nga ma ai re.

Fr.Dr.Joseph Gawlu Yung Wa

Ref:RVA (30) Ninnghpring Masat Dingsat Laika Buk