Shada Kam Hpa Hkat Ai Lam (Mutual Trust)

Mutual Trust ( Shada Kam Hpa Hkat Ai Lam)

Shada kam hpa hkat ai ngu gaw, hkrum zup bawng ban jahkrup na matu, nnga nmai ra ahkyak ai myit masa kaja langai mi rai nga ai.Myit ga garan nna n hkrum n ra byin ai yu kaji hkat ai, matai htang hkat ai, rau jawm shanu shingbyi let magam bungli rau galaw na matu n kam ai n dai lam ni gaw langai hte langai kam hpa ai lam nnga ai masa a majaw rai nga ai.

Mung shawa masha ni akyu hkam la lu na matu, hkrum zup bawng ban jahkrum na hpe ningdang nga ai lam ni mung, shada kam hpa ai lam yawm nga ai majaw rai nga ai.

Shada da kam hpa hkat ai ngu ai gaw shinggyim masha shagu hta nga nga ai mai kaja ai lam, atsam marai ni yawng hpe hkap la ya ai lam rai nga ai. Ndai masha shagu hta nga nga ai mai kaja ai lam hte kaja ai atsam marai ni hku nna sha masha law law a matu magam bungli galaw lu ai ngu ai lam hpe ja ja hkam la da ai masa mung rai nga ai.

 Manang wa a ntsa myit kam ai ngu ai lam hta manang wa a myit kam ai lam ni, dum hprut ai lam ni, ningmu nsan ai lam ni yawng hpe gram lajang na atsam ni nga nga ai. Ndai zawn re manang wa a ra rawng dumhprut ai lam ni hpe sharai garum ya lu na matu gaw tinang hta mung dai manang wa hpe kam ai myit dingrun nga nga hkra shakut nga ra na rai nga ai.

Raitim tinang hpe masu magaw galaw nga ai ni, dip gamyet sha nga ai ni, tinang a ntsa myit magaw myit rawng nga ai ni, n dai zawn re ai masha ni a ntsa, kam ai myit tawn da na matu chyawm gaw yak chye nga ai.

Dai re majaw kam hpa ai lam ngu gaw shinggyim masha shagu hta nga chye ai gawng kya ai lam ngu hpe lai rap nna shingyim masha shagu hta nga nga ai mai kaja ai lam ni a ntsa ja ja kam hpa ai lam nan rai nga ai.

Kalang lang gaw ndai kam hpa ai ngu ai a mai kaja ai myit masa tinang hta tu kaba nga hkra shakut nga ai ten ni hta dingrun shakut shaja lam atsam marai dat lam sadi dung kang ka lam ngu ai mai kaja myit sat lawat ni hpe mung kapyawn nna tinang hta nga wa hkra shakut ra wa ai hpe mung hkrum katup na rai nga ai.

Manang wa a gawng kya ai lam ni, nau n tsen ai zawn re ai lam ni, myit malang ai lam nnga ai lam ni hkrit tsang ai zawn re ai masa ni yawng hpe tawt lai nna kam hpa myit malang ai myit the hkrum zup bawng bang ai lam ni galaw mat wa ra na rai nga ai.

Shinggyim masha shagu hta nga ai gawng kya lam ni, nhkum n zup ai lam ni hpe shada da chye na raw dat ya hkat let masha law law a mai kaja ai akyu a matu magam bungli galaw shapraw lu na re ngu nna, kam ai lam rai nga ai.Ndai kam hpa ai lam hta, shinggyim masha prat hpe galai shai kau ya lu na atsam nga nga ai.

Kaja ai lam de du lu hkra lam madun shading garum ya lu nga ai.Shingyim masha prat hpe hkye la lu na matu, kaja ai prat maga de galai shai wa lu na matu shinggyim arung arai ni hte sha n shabyin ya lu nga ai.

Shinggyim masha ni a tsawm ningja, chye myit chye mang lam, mai kaja ai lam, rau ta hkin dun nna, magam bungli rau galaw chye ai lam n dai lam ni hte chyu sha shinggyim masha ni hpe kaja ai maga de galai shai wa ai lam galaw lu na re ngu nna myit kam ai lam rai nga ai.

Hkrum kaja bawng ban ai shaloi nga ra ai mai kaja ai myit jasat langai mi gaw simplicity ngu ai myit malang ai lam rai nga ai.Myit malang ai ngu gaw man hkrum bawngban ai lam hta nnga nmai ai lam langai mi mung rai nga ai.Ndai lam hpe hpang na lamang hta madat la nga ga law.

 

Rev.Fr.Dr.Bernard Dashi Tang Ji

 

 

Add new comment

15 + 3 =