Sanpra Ai Pawlu Shadum Da Ai Tsawra Myit A Lam

.Sr.Sylvia Lahpai Seng Tawng& St.Paul

Hpu nau ni simsa lam hpe gaw gap ga lamang hta chyum laika hta Sanpra ai Pawlu shadum da ai tsawra myit a lam madat la yu ga. Simsa lam hten run wa ai gaw jet ai tsawra myit  hkyet mat wa ai majaw rai nga ai. Simsa lam bai gaw gap na yaw shada ga ai rai yang tsawra myit a lachyum ni hpe sumru dinglik yu nna hkan shatup na sut la nga ai.

 (1 Korintu 13:4)  Hta Tsawra ai myit gaw galoi mung myit galu nga ai ngu ai lam hpe   madat yu ga. Ndai chyum mungga gaw, yawng mayawng hpe aten shagu hkam sharang ra ai ngu mayu ai n rai nga ai. Chyum mungga hku nna tsun ai gaw, masin pawt nna tinang a myit shadang ai,  Masha ni hpe roi rip dang sha ai, masha ni hpe machyi shangun ai lam hpe koi kau ra ai ngu mayu ai rai re. Ndai myit masa gaw, anhte kasi yu la ra ai Karai Kasang a myit masa rai nga ai. Hpaji ningli laika 11:23,12:2,15-18 hta Karai Kasang gaw shut hpyit mara hta baw ja nga ai shinggyim masha hpe myit galu kaba hte hkam sharang ai, masin pawt ai myit hpe hkang da ai. Shanhte myit malai lu wa na ten hpe ala nga ai hta n ga myit malai lu wa na lam hpaw da ya ai. Karai Kasang a kaba dik ai atsam gaw, mara lu ai ni hpe matsan dum let myit kalu hte hkam sharang ai lam rai nga ai.

92- Hkam sharang ai ngu ai shaloi, tinang hpe aten shagu zingri zingrat dang sha nga ai ni, shanhte a akyu matu tinang hpe jai lang nga ai ni hpe, galoi mung hkam sharang nga na ngu mayu ai n re. Anhte shinggyim masha ni hta manghkang byin wa ai gaw 1) masha wa gaw ngai hte rau bungli galaw ai shaloi ra n rawng hkra ngai myit ra ai hku sha galaw ya ra ai ngu myit la ai. 2) Tinang a hkum hpe sha madung da nna, kaga masha ni gaw tinang ra ai hku galaw ya ra ai ngu myit la ai, dai lam a majaw manghkang byin wa ai. Dai myit masa a majaw, masin pawt ma ai, laja lana re ladat lang wa ma ai. Anhte yawng gaw myit kalu hkam sharang ai myit n bang da lu jang masin pawt na lam chyu mu wa na ga ai. Shaloi Wuhpung wuhpawng hte matut hkawm sa na n mai byin wa ai. Masin pawt ai hpe n lu hkang jang kun dinghku gaw majan pa hte bung mat na sha rai nga ai.

Ephesu ni kaw san Pawlu shagun da tai laika 4:31 hta “ Myit gadun ai, sindawng gatawt ai, masin pawt ai, ga li ga law ai, shatan n hkan ai, nhkru nhkra ai yawng hte nanhte  tsan gang nga u ga.”  Nga nna shadum da nga ai.  Ngai gaw n dai mungkan ga hpe machyu nna asak hkrung nga ai zawn, kaga masha ni mung ngai zawn asak hkrung nga lu na matu ahkaw ahkang nga ai ngu ai myit rawng jang, hkam sharang ai myit shi chyu ru jung wa na rai nga ai. Ngai yaw shada da ai lam hpe jahten ya ai, ngai rawt kalu kaba wa lam pat kau ya ai, ngai a mying hten hkra tsun jahpyak ai, ngai shakut ai lam yawng jahten sharun kau ya ai , dai zawn re ten hta, hkam sharang kau lu ai atsam gaw grai kaba la ai atsam nan rai nga ai. Dai zawn hkrat sum wa ai ten hta myit daw myit hten nna prat hpe jahten sharun ai lam n galaw ai wa gaw hkam sharang myit kaba rawng ai wa rai nga ai.

Tsawra ai myit ngu ai hta, kalu kaba ai matsan dum lama ai myit mung rawng ra nga ai. Dai matsan dum ai myit gaw, Ngai ndai mungkan ga hta asak hkrung hkawm sa nga ai zawn, kaga masha ni mung asak hkrung hkawm sa nga ma ai. Shanhte a myit masa tsun shaga ai lam ni ngai myit mada ra sharawng ai hku n rai  tim shanhte hta byin nga ai masa hpe ngai hkungga hkap la ya chye ra ai.

93- “Tsawra ai myit gaw masha ni hpe daw jau chye nga ai.” nga nna 1 Korintu 13:4  hta tsun da nga ai. “Tsawra ai myit gaw kalu kaba nga ai, sumnung shingdi nga ai, manawn masham n nga ai, grang ai ga n tsun ai, gumrawng gum tawng myit n rawng ai. Tsawra ai majaw hkam sharang ai ngu ai shaloi tinang hku nna aten tup machyi hkam nga na daw jau ding yang rai nga na ngu mayu ai n re ai hpe san Pawlu tsun dan mayu nga ai. Tinang hku nna sharawng shara ap nawng daw jau na, rau nga ai masha shada  ladat nnan gyin shapraw nna shada madi shadaw sa wa na hpe madi madun ya ai re. N dai lachyum hpe madung da ai majaw, tsawra ai myit ngu ai gaw, tinang a matu akyu lu la nga ai zawn kaga masha ni hpe mung garum madi shadaw ya nga ai.  Dai majaw tsawra ai myit gaw, matsan dum lama chye ai, Tsawra myit gaw masha ni hpe garum madi shadaw chye ai ngu ai ngu mayu ai re.

Lahta de tang madun da ai lam hpe maram yu yang Tsaw ra ai myit ngu ai gaw, hkam sha ai myit san san sha n rai nga ai dai hpe lai di kau ra ai. Hebrew myu sha ni lachyum shapraw ai gaw, Tsaw ra ai myit gaw, mai kaja ai magam galaw ai ngu lachyum hta la ma ai. Loyola mare na San pra ai Ignatius gaw, tsawra myit ngu ai gaw n gup ga hte tsun nga ai hta nna, magam bungli hte sakse madun ra ai nga nna tsun da ai. Dai re majaw tsawra myit ngu ai gaw apu pu asi si wa ra ai. Tinang daw jau ai magam hta amyat bai lu la na n myit mada ai. Masha ni hpe daw jau ai majaw myit pyaw myit dik ai hpe lu la ai. Masha law law a matu ap nawng daw jau ya lu ai majaw lu la ai myit pyaw simsa ai lam hpe sha madung da nga ai. 

90-1Korintu 13:4-7

Jet ai tsawra myit hte seng nna kasa Pawlu ka shalat da ai sumroi laika hpe madat yu ga.

Tsawra ai myit gaw galu kaba nga ai, sumnung shingdi nga ai, tsawra myit gaw manawn masham n nga ai, grang ai ga n tsun ai, gumrawng gum tawng n tsun ai.

Nse nsa n galaw ai, tinang a akyu n tam ai, sin pawt la htet n nga ai, mara n tam ai, n ding n man ai hta n kabu ai sha, dai teng man ai hte rau kabu gara nga ai.

Yawng mayawng hpe hkam mana nga ai. yawng mayawng hpe kam sham nga ai. yawng mayawng hpe myit mada nga ai hte yawng mayawng hpe shakut sharang nga ai……

Shiga madat nga ai hpunau ji n nban yawng jet ai tsawra myit the hkawm sa lu mu ga ngu shana dat lug a ai law. 

 

 

Add new comment

2 + 9 =