PMS Online Tara Laika Sharin Lamang 29 01 2023 Pranwan Ladaw IV

online Catechism

Jan 29, 2023

            Tsaw ra ai ma ni e, dai ni mama nanhte hpe n bung ai makam masham hpung ni rau hpawng nna myit hkrum lam hpe bawngban wenyi ningja jat ai lam hpe tsun dan mayu ai. Hpa majaw nga yang, du na February shata praw hta gaw dai hpawng hpe galaw na re. English hku “ World Interfaith Harmony Week” nga ai. Ndai hpawng hpe January shata htum maga kaw na March praw du hkra galaw mai ai. Dai bat hpe shaning shagu February 1- 7 hta galaw nna, dai ning mung dai hta galaw na ma ai. Rai yang ndai hpe hpa majaw galaw hpang a ta? Kadai ni ningnan ningmu jahpaw ai kun?

          Ndai hpawng hpe 2010 September shata na UNGA Mungkan ting hte seng ai munghpawm zuphpawng kaba hta ningnan ningmu shapraw let dai ni du hkra galaw ma ai. Rai yang, dai ningnan hpang ai lam gaw Hkristan hte Islam makam hpung ningbaw ni hku nna yawng hte seng ai ningpawt makam masham sharin  ai lam bawngban ai hpawng poi galaw na hkam la hpang ai re. Dai hpe Jordan hkawhkam Abdullah II hte Jordan mung a Hkawhkam tai mai ai “Prince- Hkaw seng shadang" re ai Hkawhkam Abdullah a hpu nau wa Hazi Bin Muhammad yan hpaji jaw nna byin hpang wa ai re.

          Rai sa, dai rai yang, ndai hpawng hta madung da bawngban akyuhpyi ai lam ningpawt ninghpang tara lam re ai “ Mai kaja lam hpe tsawra ai hte Htingbu wa hpe tsaw ra na lam rai nga ai. Rau hkrum mai ai hta rau akyu hpyi pawng ai marang e, mai kaja ai hpe tsaw ra chye ai, matsan dum garum chye nga nna mungkan hpe grau ngwi pyaw ai shara galaw lu na re.

          Anhte ni masha amyu, bawsang makam n bung tim, mungkan a shinggyim masha, Mungkan mung masha ni rai nga ga ai. Dai rai nna, n bung ai lam ni hta langai sha rai nga ga. Hpa majaw tinang kam sham ai Karai Kasang a marang e Shi chyoi pra ai hte maren, Chyoi pra ai lam hta matut mahkai nga ai shinggyim masha ni re. Dai majaw tinang a makam hpe manu shadan, hkungga ai zawn, kaga ni a makam hpe manu shadan, hkungga ra ga ai. Ya Mama hte asim sha nga nna akyu hpyi ga. Dai n bung ai lam hta myithkrum nga ga na matu dai February 1-7 ya laman kyuhpyi shanglawm ga. Ya mung, asim sha nga nna akyuhpyi ga. 

Kyuhpyi ai: ( Asim sha nga ai)

          Rai sa. ..tsaw ra ai ma ni e, shada hkungga chye na matu, n tsa lam machye machang nga na matu sharin ya na. Mungkan hta Makam masham hpung kaba (4 ) nga ai. Dai ni gaw Hindu makam masham hpung, Islam makam masham hpung, Buddha Makam aasham hpung hte anhte Hkristan Makam mashed Hpung ni rai ma ai. Rai yang, anhte ma ni tinang a makam masham hpe sharin la nga ai hte maren, manu shadan, asak hkrung sakse hkam ra ga ai. Tinang a makam hta sak hkrung ai hte manu shadan chye ai zawn kaga hpu nau ni a makam hpe mung hkungga chye ra ai. Maren manu shadan chye ra ai. Ya dai hpawt shada hkungga chye mai ai tsawm htap lam hpe hkaja ga. 

Hindu ni gaw shada hkrum yang, masha hku hkau ai ni hpe hkrum yang “Namaste” nga nna shakram ma ai.

Buddha ni gaw: Anhte jawng kaw tsun ai “Minggalar bar”..

Islam ni gaw; “Assalamu alaikum (peace be upon you)- Na ntsa ngwi yaw lam mahkra anga nga u ga” nga ai lachyum  re.

Anhte Hkristan ni gaw: “ kaja ai i; hkam kaja nga u ga” nga nna, shakram ga ai re.

Okay ya matut nna mama sharin sai “nawku jawng kaw gara hku shang akyuhpyi ra ai hpe hkaja la ga: