Myanmar Mungdan Hpaji Jaw Salang Awng San Su Kyi Jinghpaw Mung Shawa Masha Ni Hte Hkrum

Myanmar Mungdan Asuya Hpaji jaw Salang Awng San Su Kyi gaw dai ni 2020 January 9 ya shani Palm Spring Hotel kaw Jinghpaw Mung na Nawku Hpung Ningbaw ni, seng ai Asuya rung Salang ni hte Mung shawa masha ni rau hkrum zup shaga ai lam chye lu ai.

Aung San Su Kyi kaw nna” Asuya kawn galaw shakut nga ai Federal Democracy Mungdan gaw gap ai ai lam hta Jinghpaw Wunpawng amyu sha ni shanglawm garum ya namatu hpyi shawn lai wa sai hte Jinghpaw Mungdaw hta Kachin ni sha nga ai n re, kaga Miwa, Gala hte Bawsang amyu hkum hkra nga ai shara re majaw tinang Amyu a lai hpe sha lang na ngu ai tinggyeng myit masa hte galaw sa wa jang simsa lam lu na yak ai lam, shada da zinlum hkat let simsa lam hpe madung da nna nga sat nga sa na matu tsun lai wa sai lam chye lu ai.

Ya Kachin amyu sha ni lapran hta byin nga ai manghkang hte seng nna- Amyu sha baw sang shagu tinang Amyu, tinang Htunghking, tinang a Ga, Laika hpe sha madung da jum manat da ai hku rai yang myit hkrum lam lu na yak ai” nga nna tsun lai wa sai lam hkrum zup hpawng hte sa du ai Wajau Dr.Peter Hka Awng Tu tsun dan ai hte maren chye lu ga ai.

Manau Poi galaw na lam hpe seng nna gaw kaga mi tsun shapraw ai lam nnga ai sha hpawt ni January 10 ya shani galaw na (72) ning hpring Jinghpaw Mungdaw N’htoi lamang  hta shang lawm na re lam chye lu ai.

Mung shawa masha ni kaw nna 1947  Pin Lung ga sadi hta myit hkrum daw dan da ai lam ni hpe ta tut hkrang shapraw sa wa na matu hte Buga masha ni maren mara re ai shinggyin ahkaw hkang ni lu la na matu hpyi shawn lai wa sai lam, bai nna Hpyen yen hpu nau (Kachin IDPs) ni tinang buga de bai wa nga lu na lam, Nawku hpung hte seng htingra ni hpe Asuya kawn zing madu la kau ya ai lam ni hte seng nna mung Daw Aung San Su Kyi hte bawng ban jahkrup ai lam galaw lai wa sai lam BBC shiga hte maren chye lu ai.

Dai hpawng de hkum nan sa du lawm ai Myitkyina Sasana, shawa hpawng matut mahkai dap (Diocesan Social Communication Director) Wa Jau Dr.Peter Hka Awnt Tu kaw nna mung “ Mi kaw na majan a majaw yak hkak nga ai ten, manau ka na hte seng nna, anhte amyu sha ni n ru n ra nga, langai mung shayawm ai lam nnga sha ga baw hpe madung da let lachyen ginhka ai lam byin wa ai.Ahkyak ai gaw anhte a Mungdaw n’htoi re majaw anhte yawng rau jawm kahkyin zin lum  nna manau jawm dum ra ai.Ga baw hpe gaw hpang de yawng myit hkrum ai, yawng hkap la lu ai hku jahtuk la nna lang yang grau hkrak ai, ya gaw ndai zawn re mabyin a majaw anhte Wunpawng amyu sha ni n hkrum n ra re ai lam grai dan dawng shangun ai hku byin mat sai, kaga amyu sha ni mahtang she anhte hpe kahkyin let, hpaji jaw la ra ai madang re mat sai. Anhte Wunpawng amyu sha, Kachin ni grai myit yu hpa lam re” nga nna tsun lai wa ai.

Jinghpaw Mungdaw N’htoi Manau poi galaw na lam hte seng nna  Jingphpaw laika hku mi moi kawn lang hkrat wa ai “ Jinghpaw Mungdaw Nhtoi’ ngu ai hpe Kachin Amyu baw sang ni rai nga ai ‘ Lavho, Lachid, Lisu, Zaiwa, Jinghpaw hte Rawang ni lapran, myit hkrum ai lam nnga majaw manau poi galaw na lam hta manghkang byin nga ai rai nga ai.

Thomas