Moi Na Ji Woi Ji Wa Ni A Tsawra Myit Hte Ya Prat Na Num Jaw Num Ya Ai Lam

Dai ni na lamang hta gaw, anhte Jinghpaw Wunpawng Amyu sha ni a lapran hta dum hprang ra ai lam langai rai nga ai, Num jaw Num ya, Num la, La la ai lam hta shada tsawra madun hkat ai lam hte seng nna, moi shawng de na Jiwoi Jiwa ni a tsawra myit hte shingdaw nna tang madun dat mayu nngai.

Moi shwng de na ga malai langai mi gaw,

“ Hpaga nlu ai nga nna, num n la ai sha nmai nga ai,mam nli nlu ai nga nna yi nhkyen ai sha mung nmai nga ai” nga nna tsun lai wa ma ai.

Dai hte maren, moi na Jiwoi Jiwa ni a tsawra shawang myit ni hpe bai myit dum sumru yu ga nga yang, Mayu num kasha ni gaw ntsawm nhtap, n zet n kung ai rai tim bungli bungsi galaw sha nna mayat maya shangun chye ma ai.

Dama shadang sha wa, labye lapau, na hpang lawm wa ai raitim, bungli bungsi sha chye galaw sha chye ai ai wa hpe gaw, mayu ni lit la n htawm, shayi jaw sha nna mayaw htinggaw de ya ai hte mayat maya shangun ma ai.Ga shadawn, tinang a shayi nnga ti hpyi kahpu kanau ni kasha hpe shatsawm ai hte kun dinghku de ya chye ma ai.

Kahpu Kanau ni hta mung , shayi kasha n lu yang  mayu wa raitim, hpu ja hpaga kaba shaw nna mayu dama lam matut mahkai hku hkau kanawn mazum lam n shamat ma ai.

Bai nna, Kahpu kanau dinghku hpe raitim num tam ya hpu ja hpaga shaw karum let kun dinghku de ya rai let, shada madi shadaw pawn ba ai lam nga chye ai.Dai sha n-ga, tinang a kahpu kanau wa langai ngai, Madu jan, kasha ni hpe shakram kau da nna, si wa raitim Gadai hta ai  hte ma bau karum, n ja n hpra lam madun chye ga ai.Gai da gawn hta na shabrang nnga di pyi, tianng a Madu Jan hte jahkrum n htawm, Num lu tim gawn hta mai ai.Gawn hta na n mai byin jang mung , ninghtoi Kawa tai nna dinghku bungli ni hpe yu lajang ya,hpun lang ya, hpun kran yi wa gap ya rai ra mara dinghku bungli ni hpe yu lajang garum ya rai lit la let myit n kaji hkra zinlum ai lam galaw rai tsawra myit madun chye ai Amyu ni rai nga ga ai.Kaga Amyu mi hku nna tsun ga nga yang gaw, tinang jan kaw, masha chyasam wa n shang rawng na matu n madu sha y an matu makawp maga lanu lahku la ai lam mung rai nga ai.

Ya prat hta gaw , dai hku n rai wa ai lam hpe asan sha mu chye lu ga ai.Dama wa matsan wa jang mayu ni shayi jaw nkam sai. Lu ai hpe sha jaw ya na, nga myit ni rawng wa ai, hpa ji chye ai shada sha jaw ya mayu wa sai. Makam masham n bung jang mung hkristan shada damakam ginhka nna n jaw n ya mayu rai wa ga ai.

Loi hkring rai jang, tinang hpe ra ai zawn zawn shatu shala , shaga ai ni nga jang gaw maigan wa  mi raitim pu pu si si ten rai jang gaw chyam mayu ai myit hte pu si hkri tung hkri wang ma ma hkum bai byin wa, n jaw mung nmai rai byin wa  ni mung law law rai nga  sai.Madu jan lu ai dinghku la hte kanawn hkrup nna manghkang kaba byin rai, Kanu Kawa ni a baw bai jasin rai taw ai ni mung grai she law nga ga ai.

Bai lama mi gaw, lahta de tsun lai wa sai hte maren, anhte Kanu Kawa ni jaw ya , lata ya ai Kanu Kawa ni myit hkrum ai hpe la ai majaw, lam mi byin chye ai.bai anhte shadang la sha ni mung Mayu kasha nga taw ninglen, mayu kasha hpe shatu shala n wam nden marai nrawng ai majaw kaga chyasam la wa she Madu la kau re ai ni nga ga ai.Bai nna, hpu ja n lu ai nga nna myit ru taw ,Numla na matu ja gumhpraw shawng tam na nga nna aten shalai asak wai,n dai zawn re ai ni mung ya prat hta grai law wa saga ai.

Dai majaw moi na Ji Wa ni a tsawra myit hpe bai n htang sumru yu na matu mai nga ai. Kanu Kawa ni a tsawra myit ni hpe hkan shatup ai kashu kasha ni mung tai ra ga ai.Raitim Kanu Kawa ni a yaw shada ai lam hpr sha la nga yang mung,  prat asak lai wa na mung tsang ra nga ga ai.Dai majaw anhte shadang sha ni mung magrau grang let tinang a matu ningrum ningtau sha gaw chye tam ra saga ai.Shayi numsha ni mung num wa ten kaw wa ra ai.

Chyum Laika kaw mung Num la Num Wa rai nna law htam wa mu! Nga nna tsun shadum da nga ai.Dai majaw,num n wa, num n la nna nga ai gaw, Karai Kasang a htet da ai ga hpe tawt lai ai hte Karai Kasang tawn da ai ga n hkan nang ai majaw mara kab lu ai wa, mara lu ai jan ngu nna mung mai myit la nga ai.Bai nna, lahta e tsun lai wa sai hte maren, Mayu ni mung, tinnag a kasha num sha hpe matsan ai la hpe n jaw kam,kade n nna yang Maigan Myen wa hte kap mat, wa je la, jahka la mung n lu, N kam let  Wa Hpyin Shan (wa ju shan) Sha nga ai ga malai zawn byin chye ai.Wa hpyin shan wa ju sha ngu gaw, nat jaw ai shaloi wa jaw jang wa tinghkum ting hpe wa pu wa kan shaw la n htawm wa shalawn ngu ai hpung ding sha galu hpe wa jinghtum ngu ai wa mai kaw nna wa n -gup lai hkra dinghkren di n htawm wa hkum ting nawng ju nna shatsawm la ai .Dai  hpe sha ai shaloi, wa mai , wa maidang rai tim sha ra ai hpe n kam tim wa jinghtum shan sha nga ma ai.

Dai hte maren, maigan wa myen wa hte byin mat jang gaw, ru sai n bung raitim jahka la n lu sai majaw n kam tim shanang kau ra sai npe ngu mayu ai rai nga ai.Nkau Wunpawng Num kasha ni , kaga maigan la kaw wa mat ai raitim, tinang a kashu kasha ni hpe , tinang amyu a htunghking, makam masham amyu sha lam ni hpe chye na hkra sharin ya nna, tinang amyu byin tai hkra galaw lu ai ni mung nga nga ai.Raitim shinggyim masha ngu ai gaw, sai ga shaga chye ai re majaw, dan re ai ai ni gaw, kaja wa nan laja lana ahkyak hkyak nang i ngai i dangrang wa ra ai shaloi gaw tinang maga ja ja gwi gwi n lu tsap, n lu tsun shaga ai ni byin wa ai.Myu tsaw myit ningra ai lam, maga mi hku tsun ga nga yang anhte shada woi awn zimlum hkat ai lam mung nnga , nang gaw kade kasha re hpa law nya law nga nna tsun jahpoi ai lam ni byin wa ai majaw anhte lapran myit hkrum lam ni hta hkra wa ai masa ni nga nga ai hpe mu lu nga ga ai.

Matsan tim Jam Jau tim,Laika Hpaji n chye tim moi na mahku mahkau lam hpe n hkan kam ai, moi na tsawra myit hpe kabai kau da ai, prat byin wa sai .N gup hte sha ,  tsawra ai,tsara myit she madung re ai nga tsun, hpa hpe tsawra ai  re kun? Anhte n chye nga ga ai.Ya Prat hta gaw 1 Korinhtu 13:1-3 kaw lawm ai Tsawra ra myit n lawm yang kaman li la re ai lam hpe marai shagu hkaw chye, tsun chye ga ai.Yawhan  a laika 4:7-8 hta mung shada da  tsawra nga na lam tsun nga ma ai.

Moi na Ji Wa ni prat hta kadai dumsa wa mung tsawra nga na lam tsun dan ma ai raitim,tinang a kraw lawang hta tsawra myit rawng chyalu hkrai nga ga ai majaw, kahpu kanau, mayu , dama kashu kahkri gindun kinnoi makyit sumri n di n hka roi sang hte shawang myit hkindun let hku hkau nga pra wa ai Amyu jet ai rai nga ga ai wa, ya prat hta gaw, n-gup hte tsun ai hte hkaw tsun ai wa mung shinglet she laba, madat ai ni mung yup she yup nga hkra, madat ai zawn re, ta tut galaw ai lam gaw nnga ga ai.

Yaku 2:17 hta, ‘ makam masham hte magam bungli n lawm yang tinang dai chyasi re ai lam tsun da nga ai.Abraham gaw shi a kasha Isak hpe hking ntsa e  mara nna hkugnga shatai na daw dan ai majaw shi a makam masham hte magam bungli ta tut shatup ai lam nyet kau n lu mu ai nrai ni, ‘ dai majaw shi hpe dinghpring ai wa ngu anhte mu lu ai

Ya dai ni anhte lahta tsun lai wa sai hte maren, hpa lam hta mung tsawra ai lam hta mung tatut galaw ai lam gaw nnga, ngup hta sha gaw chye tsun shapyaw grai wa rai la ai zawn nga’ tim nang ngai tatut galaw ai hpe masha kadai wa nmu ya , n-gup hte tsun shapyaw ai hpe magam bungli kadai nngu ya ai.Ngai gaw Wunpawng shayi she la na, Wunpanwg shadang hpe she la na law, nga tsun tim , ta tut hta ru sai n bung tim tinang hpe hpa lam hta mung lu galaw ya ai wa nga jang , Tinang hpa baw amyu re ngu ai hpe n dum nna, shanang lawm mat ai ni anhte a shawng hta grai mu lu nga ai.Dai majaw n-gup gaw lapyaw, ta gaw lahkyaw’ ngu ai anhte a ga malai majoi nga ai n rai nga .anhte hpe shadum ya ai lam re ngu hpe chye na ra nga ga ai.

Abraham zawn makam masham hta mung kasha shingtai ap kau gwi ai wa gaw makam a sakse rai sai.Anhte ni Mungdan ntsa e mung,anhte amyu ni a ntsa hta mung Mungdan hpe tsaw ai, Amyu hpe tsaw ra ai myit ta tut madun lu ga ai kun, anhte Wunpawng amyu sha ni hpa lam hta mung , ta tut magam bungli hte shakut sa wa nna, mayat maya kunhpan bawnring galu kaba ai ni tai wa saga  ngu tsun shadum tang madun dat lu nngai rai.

Hpung Ing Hkawng

Kachin Review Journal