makau grup yin shingra tara hte asak hkrung mahkrung gaw simsa rapra let asak hkrung nga pra ra ai

Dai ni mungkan ga hta, makau grup yin shingra tara hpe tingkyeng akyu a matu, lamak law hpa ai myit hte jahten shaza nga ma ai, tinang ra ai daram la ai, hpang de pra wa na ni hta hpa byin yang byin ngu ai myit hte nga sa ma ai. Dai lam a majaw makau grup yin shingra tara ni machyi makaw hkrum hten za mat ma nga sai. Ndai zawn byin nga ai gaw shing gyim masha ni tinang galaw ai laikyang hta, lit la ai lam n nga ai majaw re. Shinggyim masha ni makau grup yin jahten shaza ai lam n galaw na matu hpaji jaw masat da ya ai tara n nga ai majaw re.

Dai majaw mungdan hpe up hkang ai asuya ni, makam masham ningbaw ni, hpaji dap hkam kaja dap ningbaw ni, makau grup yin jasan jaseng, makawp maga lit la chye ai lam sharin ya ra ai. Ga shadawn Sanseng ai hkashi hkanu ni hta, baza gabai bang ai, U jasi wa chyasi, ni kabai bang ai rai jang hka baza mat sai. Dai hpe lu lang ai ni, hka shin rai hkrut ai ni hta ana ahkya machyi makaw byin wa sai.   Ja htu Lung seng htu ai ni, tinang htu da ai shara hpe atsawm sha bai ga gaput da ra ai, dai lit hpe n la jang, sharut gyi wa ai, masha ni, du sat ni ja n hkun hta lup si wa ai. Hpun kaba kran daw la ai ni mung hpun kaji law law bai hkai da ra ai, dai hpe lit n la jang, du hkra ladaw grai shai wa ai. ladu lai gahtet wa ai, ladu lai marang kaba wa nna sharut gyi wa ai, N bung n baza na matu, baza, plasatic zawn re hpe n mai nat shamawng ai dai wan hkut ni gaw masha a sin wawp, sin pai, nsa sa lam hpe hkra machyi wa shangun ai.

Shinggyim masha gaw shi hkum hpe shi hpan da ai n rai nga ai. Karai Kasang she hpan da ya ai rai nga ai. Tinang hta asak hte hkum hkrang rawng nga ai zawn, Karai Kasang hpan da ya ai mungkan ga hta mung asak rawng nga ai. Mungkan makau grup yin shingra maka hten za wa ai hte seng nna, Orthodox Hkristian Saradaw kaba Batholomeus tsun shana ai gaw, mungkan ga hten za machyi wa hkra galaw shut ai shinggyim masha ni marai shagu gaw myit yawn myit malai lu ra ai. nga nna tsun shana lai wai sai. Hpa majaw nga jang shinggyim masha yawng a matu Karai Kasang hpan da ya ai du sat du myeng asak hkrung mahkrung yawng mayawng gaw hten za si hkrum mat ma sai. Shanhte shingbyi shamyet shanat nga ai nam maling, ga sau ni, san seng ai hka shi hka nu, san seng ai n bung ni hten mat ai majaw asak hkrung ai du sat ni mung si htum ma wa nga ai. Ndai lam gaw, makau grupyin shingra tara hpe shut shai ai mara ni rai nga ai zawn, Mungkan ga shingra tara ni hpe grai htuk manu ai hku hpan tawn da ya ai Karai Kasang hpe mung shut shai ai lam rai nga ai.

Hten za mat wa nga ai mungkan ga, makau grup yin hpe bai gram lajang la na matu, shinggyim masha ni hpe (jaw ai) laikyang, myit masa galai ya ra ai. Hpung makam masham, myit masin wenyi hpe mung shading sharai ya ra ai. Nkau mi gaw hpungtang hpaji hpe sha jai lang nna makawp maga na shakut nga ma ai. Kaja wa nga yang shinggyim masha a myit jasat ningmu ni hpe mung galai shai ya ra ai. Ndai manghkang hpe hpungtang hpaji sha n rai ningmu jut shagu hku nna, mahtai lu hkra tam ra ga ai. Mahtai n tam ai rai jang, machyi ningma ni hpe sha tam mahkawng nga ai masha hte bung ga ai.

Hkristan ni hpe sharin shaga ai shaloi sadi sahka ra ai lam,  bagawn bara lang shama na malai, sharam let jai lang na matu sharin ya ra ai. Namak law hpa ai myit a malai, ra gadawn nga ai masha ni hpe garan jaw chye na sharin ya ra ai. Dai hte maren n kaja ai arawn alai hpe ninghkap gasat ai shaloi, myit daw asum jaw kau na malai, masha ni hpe gam garan jaw lu ai ladat hpaji sharin ya na ahkyak ai. Ndai magam galaw lu na matu jet ai tsawra myit ra nga ai. Tinang ra ai hpe tinang lu hkra la ai namak law hpa ai myit hpe tsan tsan de tawn kau nna, Karai Kasang hpan da ya ai mungkan ga ra sharawng ai hpe mung hkan galaw ya ra ai.  Dai magam galaw lu na matu gaw, jet ai tsawra myit sha madung rai nga ai.

Hkristian hpung masha ni gaw, ndai mungkan ga hpe shing gyim masha ni yawng myit hkrum myitra rau jawm nga nna, mungkan ga kaw nna pru ai nhprang sut rai ni hpe maren mara jawm garan lang na tsawra myit rawng ra nga ai. Ndai mungkan ka n tsa e rau galaw lu galaw sha nna, hpang jahtum si wa ai ten hta, mungkan ga a ga yun bai tai wa nna dai kaw Karai Kasang hte hkrum zup lu na rai nga ga ai. Si mat ai hpang anhte yawng gaw, ga yun bai tai wa na rai ga ai. gadai mung lu su nga mai madang tsaw taw nga na n re. Ga yun ngu ai bungpre ai madang hta anhte yawng bai wa hkrum na rai ga ai. Dai majaw mungkan ga gaw anhte, asak hkrung nga ai ni hte si mat sai ni, garai n sa pra shi ai ni yawng jawm shanu nga ai dum n ta (Common Home) nan rai nga ai.

Dai majaw Mungkan ga makau grup yin, shingra tara yawng gaw Karai Kasang anhte hpe tsawra myit kaba hte jaw lang da ai kumhpa kaba rai nga ai. Manu jahpu n jaw ra ai sha anhte a lata de ap da ya nga ai. Dai majaw shagrit shanem ai myit hte, tsawra myit hkrum myit ra ai let, lit la makawp maga chye ai myit hte asak hkrung hkawm sa nga ga ngu  n gun jaw dat lu ga ai law.

 

 

Add new comment

14 + 1 =