Makau grup yin shingra tara hpe makawp maga ga San Pra ai Francis Asisi

Hpunau ni simsa lam hpe makawp maga ga lamang hta, makau grupyin shingra maka, mungkan ga hpe makawp maga, shakawn shagrau let ngwi pyaw simsa ai hte asak hkrung lai wa sai Italy mung Asisi mare na San Pra ai Francis Asisi a matsun maroi ga ni hpe  jawm madat la yu ga. Asisi mare na Francis gaw, makau grupyin shingra tara hpe grai hkungga makawp maga ai wa rai nga ai, shi hpe Makam masham hpung amyu shagu na ni hkungga shagrau nga ma ai.

Francis gaw Karai Kasang hpan da ai, lamu ga sak hkrung mahkrung ma hkra hpe tsawra hkungga manu shadan ai. Masha ni yu kaji nna, masha hpawng shinggan de tawn kau hkrum ai ni hpe lak lai tsawra matsan dum nna, ra gadawn nga ai ni hpe machyi hkam nna garum ya lai wa sai. Masha ni hpe hku hkau chye ai, asan brang lang chye tsun shaga ai majaw, hpung makam masham amyu shagu na ni shi hpe hkungga tsawra manu shadan ma ai. Francis gaw Shi a myit masin hte hkum hkrang lapran e rap ra ai  simsa ai hku nga chye ai. Karai Kasang hte mung myit hkrum rapra hkra nga chye ai zawn shinggyim masha shada mung rap ra hkra nga chye ai. Makau grup yin shingra maka hte mung rapra htap htuk hkra nga chye ai. Simsa ai lam gaw gap ai shaloi mungkan ga makau grupyin hpe gawn lajang makawp maga na mung ahkyak nga ai.  

Anhte shinggyim masha ni, shada da tsawra myit kap wa jang, dai wa hpe makawp maga ya mayu ai. Shi myit machyi, myit n pyaw na hpe jau jau kaw na koi gam ai. Shi myit pyaw galu kaba rawt jat wa na matu hpa galaw ya ra na kun? tau nau nna lit la shajin da chye nga ai. Dai hte maren anhte shanu nga ai mungkan ga makau grup yin hpe kaja wa tsawra  ai rai jang, kaji dik ai  hku makawp maga ya na rai nga ai. latung kasha hpe pyi gawn lajang asak hkrung shangun mayu ai myit rawng na re. San Pra ai Francis gaw jan, shata shagan ni hpe yu nna shanhte a mai kaja ai lam tsawm htap ai lam hpe shakawn da ai mahkawn ni law law shalat da ai. Makau grupyin shingra tara hpe makawp maga nna hkau chyap la ai ladat gaw, kaga hpungtang hpaji ninghkring ni, sut masa ninghkring ni hte n bung nga ai. Asak hkrung ai du sat ni hpe shi a kahpu ganau kashu kasha ni zawn tsawra ai. Dai majaw asak hkrung mahkrung yawng hpe makawp maga na matu masha hta lit nga ai nga nna tsun shadum da ai.  Shinggyim masha ni hpe mung shi hpan da ai majaw anhte yawng gaw kahpu kanau ni rai nga ga ai.  Karai Kasang hpe grau kam sham, tsawra na sut la nga ai.  Ndai myit masa gaw tsawra chye ai myit masa rai nga ai.

Karai Kasang hpan da ai mungkan ga hpe sung sung myit sumru dinglik yu ai lam n nga jang, kawa langai a kasha ni rai nga ninglen tinang a kahpu ganau re ngu n sawn la jang, anhte gaw mungkan ga makau grupyin shingra tara hpe up sha, dip sha ai ni sha rai nga ga ai.  Bagawn bara jahten shaza ai ni sha tai wa na ga ai.  Maga mi bai yu ga nga jang, mungkan ga makau grup yin sak hkrung mahkrung gaw, anhte hpe asak hkrung na matu madi shadaw ya ai anhte a kahpu kanau ni rai nga ai, ndai lachyum hpe chye madat sai rai yang shanhte hpe shadawn sharam jai lang na, shanhte hpe gawn lajang na myit ni shi chyu pru wa na rai nga ai.

San Pra ai Francis gaw, Chyum laika hpe grai tsawra manu shadan ai rai nna, shingra tara  gaw, grai sung la ai grai dam lada ai chyum laika buk kaba re nga nna tsun da ai. Ndai laika buk kaba hku nna Karai Kasang a tsawm htap mai kaja ai lam hpe sawn yu n ma rai nga ai. Mungkan ga a mau hpa mai kaja ai lam hpe mu chye hkam sha na matu   ahkaw ahkang jahkring mi lu la ai ni rai ga ai. San Pra ai Francis gaw shi a jawng wang hta ga lachyawk langai hpe hpa mung n hkai ai sha, tsing ni shatut da ai. Aten na wa jang dai shara hta, tsingdu ni nam pan ni amyu hkum hkra tu kaba wa na ma ai. Dai tsingdu ni hpe yu nna, Hpan madu Karai Kasang a lam hpe sung sung dum chye lu u ga nga nna htet da nga ai. Mungkan ga makau grup yin gaw, hpyan la nlu ai  manghkang ginra n rai nga ai. Kabu gara awng sharawng let, Karai Kasang hpe shakawn kungdawn nna ndai mungkan ga hta ngwi pyaw simsa let shanu nga na shara she rai nga ai.

Dai rai yang anhte sak hkrung mahkrung shanu nga ai ndai mungkan ga, tsit lali tsawm nna, bawngring hkam kaja wa na matu mungkan masha yawng a lit rai nga ai. Amyu, hpung matsan lu su n gin hka ai sha yawng jawm shakut ai rai yang, shinggyim masha ni hte  asak hkrung ai du sat ni yawng mayawng mung hkam kaja mayat maya wa na rai ga ai. Karai Kasang gaw shi hpan da ai mungkan ga hpe makawp maga, gawn lajang ai hpe grai kabu sharawng nga ai

Anhte marai shagu mung ndai magam hpe tinang a dum nta kaw nna hpang wa mai ai. San seng ai n bung lu na matu makau grupyin baza bala, yat manam ai baw n gabai na.  U lawng Wa lawng hpe tsan tsan kaw gap da na. Palastic ni hkrup mara n nat na.  Tinang a yup ra, shatgawk, hka shin gawk, namdum ni hpe jasan jaseng da na, Ti nang a bu hpun palawng, sut panep, bunghkum hpyi ni hpe man man hkrut na. Lu hka shin hka ni hpe asan sha sung lang na, ndai zawn kaji kajaw sha re kaw na, hpang wa n htawm tinang a hkum hkrang hkam kaja na hte makau grup yin shingra tara ni hpe hkungga manu shadan let simsa lam gaw gap lu nga ai.  Lahta de tang madun ai lam ni hpe gadun ai hku tsun ga nga jang

  1. Asisi mare na Francis gaw, makau grupyin shingra tara hpe grai hkungga makawp maga ai wa rai nna makam masham hpung shagu na ni shi hpe hkungga shagrau nga ma ai.
  2. Simsa ai lam gaw gap ai shaloi mungkan ga makau grupyin hpe gawn lajang makawp maga na mung ahkyak nga ai. Matsan mayen re ni maga de tsap ya nna tara rapra ai hku woi lakawn ai gaw ngwi pyaw simsa ai lam gaw gap ai rai nga ai.
  3. Asak hkrung mahkrung yawng hte shinggyim masha ni hpe Karai Kasang hpan da ai majaw anhte yawng gaw kahpu kanau ni rai nga ga ai. Dai majaw mungkan ga makau grup yin hpe hkungga tsawra ra ai
  4. Mungkan ga makau grup yin sak hkrung mahkrung gaw, anhte shinggyim masha ni asak hkrung na matu madi shadaw ya ai anhte a kahpu kanau ni rai nga ai, ndai lachyum hpe chye madat ai rai yang shanhte hpe shadawn sharam jai lang nna, shanhte hpe gawn lajang na rai ga ai.
  5. Ndai mungkan ga, tsit lali tsawm wa nna, bawngring hkam kaja wa na matu mungkan masha yawng a lit rai nga ai. Amyu, hpung matsan lu su n gin hka ai sha yawng jawm shakut ai rai yang, yawng mayawng hkam kaja mayat maya wa na rai ga ai. Karai Kasang gaw shi hpan da ai mungkan ga hpe makawp maga, gawn lajang ai ni hpe lak lai shaman ya nga ai.

 

Add new comment

14 + 2 =