(LAUDATO SI ) Mungkan ga hte anhte a makau grupyin shingra tara hpe makawp maga ga

Anhte shanu nga ai mungkan ga gaw anhte hte rau sha nga nna, asak hkrung nga ai tsawra ai kanau (sh) kanu hte bung nga ai. Anhte hpe tsawra ai lata hte lakawn ya nga ai chying hkai kanu hte mung bung ai nga nna ITALY mung Asisi mare na San Pra ai FRANCIS mahkawn  ka shalat da nga ai.  Mungkan ga gaw, anhte shinggyim masha ni hpe madi shadaw ya ai, hte up hkang ya nga ai. Anhte sha na nsi nai si ni, namsi namsaw ni, tsi pawt tsi ru ni, n sam amyu myu rawng ai nampu nam pan ni hpe jaw ya ai. N dai mungkan ga hpe yu yu nna Karai Kasang hpe chyeju dum shakawn na lam grai law nga ai.

Karai Kasang gaw mungkan ga hpe grai tsawm htap hkra hpan lajang da ya ai raitim, anhte shinggyim masha ni gaw, makawp maga lit la chye ai lam naw ningra nga ai sha n ga, kam ai hku jahten shaza shama kau nga ai. Anhte a kanu hte bung ai mungkan ga hpe tinang sha madu re ai zawn kam ai hku jahten lai wa saga ai. Lamuga ga sau, ni hka ni, nbung ni hten za mat wa ai majaw, dusat du myeng ni, hpun kawa namsi namsaw ni mung hten mat wa ai, machyi makaw ana ahkya law mat wa ai. Lamu ga gaw shi n dang hkam lu ai jahten sharun lam hpe hkam sharing ra nga ai majaw lamu ga a prat gaw zingri zingrat, jahten sharun hkrum ai, matsan jam jau hkrum ai kanu langai hte bung nga ai.

Anhte shinggyim masha ni gaw, ga yun kaw na galaw shachyaw da ai rai nna, anhte a hkum hkrang gaw lamu ga kaw na jaw ai, hka, n bung, namsi nam saw ni hte sha asak hkrung nga ga ai hpe malap kau chye nga ga ai. Dai majaw, lai wa sai 1962 ning hta, America, Russia, Cuba manghkang hta Nueclear majan byin na jin jin rai nga ai ten hta, Wa Sarabyin Yawhan (23) kaw nna “Peace on Earth” mungkan hta ngwi pyaw simsa ai lam nga u ga ngu ai matsun laika htuk shabra dat nna, majan n byin hkra simsa lam hpe jawm gaw gap ya lai wa sai.

Wa Sarabyin Francis hku nna mung ya aten hta, mungkan ga makau grup-yin shingra maka ni hten za ma wa ai majaw, ndai lamu ga, hka panglai, jan shata, n bung kaja ni hpe machyu nna, asak hkrung nga ai, shinggyim masha dusat dumyeng, hpun kawa ni mung hten za ma wa nga ai majaw, anhte shinggyim masha ni lawan hkye la na, lawan makawp maga na hpe wa Sarabyin shadum n gun jaw dat nga ai.

Ndai mungkan ga gaw, asak hkrung mahkrung yawng shingbyi shanu nga ai nta shara re ai majaw, hpung makam masham amyu shagu, shinggyim masha amyu bawsang shagu rau jawm bawngban nna, manghkang hpe jawm hpyan la na aten du sai nga nna Wa Sarabyin Francis tsun shana dan nga ai.

Makau grup-yin nhprang sut rai ni hpe  shadawn sharam n nga ai sha shaw la ai, htu la ai majaw, lamu ga hten za ma wa ai, lamu ga sharut gyi ma wa sai, hka kaba nna mauru kaba ru wa ai, shinggyim masha ni a matu grai hkrit tsang hpa byin wa nga ai. Grau nna makau grup yin lamu ga hpe sha machyu nna nga ai ni, grau yubak hkrum nga ma ai. Bai nna jak-rung jak-rai rawt galu kaba wa ai majaw dai kaw hkan machyu nang wa ai shinggyim hpawng kaba byin mat wa ai. Jak-rung kaba ni a majaw wan hkut matut manoi shapru nga ai majaw san seng ai n bung ni baza mat wa ai. Shinggyim masha a n gun gaw, jak hte shing jawng ra ai majaw masha ni grai pu ba mat wa ai. masha loi mi sha lang nna jak hpe madung da jai lang ai majaw, masha law law wa bungli n lu mat wa ai. Dai majaw bungli galaw sha ai ladat ni hpe bai gram ra ai nga nna Wa Sarabyin tsun shana lai wa sai.

Hpungtang hpaji hte hpaji hparat, sut masa ni grai galu kaba wa ai rai tim, shinggyim masha a kyang lai len myit masa hpe jahten sharun ya ai rai jang, du na ra ai ten hta myit tsang shara nan rai nga ai. Hpungtang hpaji rawt galu kaba wa ai zawn, myit masa kyang lai len hkum zup mai kaja wa ra ai. Hpungtang hpaji machye machyang rawt galu kaba wa ai zawn, makau grupyin shingra tara ni hpe chyeju madu langai mi hku makawp maga, let grau kaja bawng ring hkra lit la na matu grai ahkyak nga ai. Lit la chye ai ngu ai gaw, tinang ra ai hpe ram daw jai lang nna, hpang na ni jai lang na matu lajang da ya ai hpe ngu mayu ai. Hkrup mara jahten shaza lang shama kau ai masha gaw tingkeng myit rawng ai, n dai mungkan ga makau grup yin gaw shi a matu sha re ngu myit ai masha hte bung nga ai. Ndai zawn re myit masa gaw hpang e pra wa na kashu kasha ni a matu myit mada shara jahten kau ya ai hte bung nga ai.

Dai majaw dai ni na ten hta anhte shing gyim masha ni makau grup yin shingra maka hpe yu ai ningmu, machye machyang ni hpe hka ja la na grai ahkyak nga sai. Hpa majaw nga yang Karai Kasang gaw mungkan ga hpe hpan da ai hpang atsawm sha yu lanu lahku akyu jashawn na matu ADAM yan EWA hpe ap da sai. Ndai mungkan ga gaw shinggyim masha ni asak hkrung nga pra lu na matu ra ahkyak dik ai kumhpa kaba hku nna mung Karai Kasang shing gyim masha ni hpe ap da ya sai. Dai re majaw makau grup yin shingra maka hpe makawp maga chye ai, nga sat nga sa lam, hpaga yamga sut lu nga mai lam, akyu jashawn jai lang ai lam, mungdan langai a uphkang ai lam ni hpe galai shai la na ahkyak nga ai nga nna Wa Sarabyin shadum ya sai.

Shing gyim masha ni rawt galu kaba na madang sharawt la ai shaloi, Shinggyim masha ni hkum hkrang myit masin, lai kyang, sari sadang ni mung rawt galu kaba wa ra ai.  Anhte hpe manu dan la ai mungkan ga hpe kumhpa kaba hku nna jaw da sai majaw n dai kum hpa hpe makawp maga na galu kaba wa hkra makawp maga na lit la ai rai yang sha   mungkan ga hpe jaw ya ai Karai Kasang a yaw shada ai lam awngdang wa lu na re nga nna Wa Sarabyin Francis tsun shana n gun jaw nga ai lam shana dat lu ga ai law.

Dai ni na lamang hpe gadun ai hku tsun ga nga jang,

1. N dai mungkan ga gaw anhte sak hkrung mahkrung yawng jawm shingbyi machyu nga ai, yawng a nta re.
2. N dai mungkan ga hta, lamu ga, hka, n bung, jan shata ni hte, hpun kawa namsi nam saw, nampu nampan, tsi pawt tsi ru ni, hkarang kawng na du sat, hka shi hka nu, panglai na du sat, ni rau jawm shanu nga ai.
3. Tsawm htap manu dan la ai mungkan ga makau grup yin shingra maka hpe, Karai Kasang gaw shinggyim masha ni a lata hta ap da ya sai. Ndai mungkan ga hpe makawp maga gawn lajang lit la nna rapra tsawm htap ai hku sunglang na matu Karai Kasang jaw da sai.
4. Aten ladaw na wa jang shinggyim masha ni gaw,tingkyeng myit hte tinang ra ai hku lamu ga, hka shi hka nu, jan shata, n bung ni hpe, jahten shaza nga ma ai majaw mungkan gag aw, machyi ningma kab hkrum nga ai.
5. Ndai manghkang hpeshinggyim masha ni, amyu hpung makam masham n ginhka ai sha, matsan lu su n lata ai sha rau hkrup zup nna, lit la makawp maga ra nga ai.
6. Ndai prat hta, sut masa rawt jat ai, hpungtang hpaji machye machyang rawt kalu kaba wa ai teng ai. Raitim, shinggyim masha ni a myit masa kyang lailen hten run nga ai rai jang lawan bai gram la ra ai.
7. Manu dan akyu jaw ai asak hkrung lu na garum ya ai mungkan ga hpe jaw ya ai Karai Kasang hpena chying chyeju dum ra ga ai. Machyi kaba hkrum nga ai mungkan ga hpe bai hkam kaja tsit lali tsawm wa hkra galaw ya lu ai, myit masa kyang lailen, mungdan up hkang masa, sut masa ni hpe gram la rag a ai. ngu ai lam ni lawm nga ai.