Kahtawlik nawku hpung a shawa hte seng ai tara masa lam

Masha shagu sari sadang hte ahkaw ahkang, shawa yawng a kaja na hpe hkungga nna makawp maga ai mung masa hkrang law law hpe Nawku Hpung kaw nna madi shadaw ya nga ai.

Shanglawt nna shawa yawng ra ai tara (free, democratlc social order) gaw masha yawng shang lawm lu nna shinggyim masha a ahkaw ahkang hpe makawp maga ai rai jang Nawku Hpung kaw nna madi shadaw ai. Ndai lam hte seng nna Wa Sarabyin John Paul ll tsun ai gaw "Shawa ra ai ladat (democratic system) gaw mung masha ni shanhte ra ai hpe shang lata lu nna uphkang ai npu e nga ai ni shanhte hpe uphkang na ni hpe lata la nna lit la shangun nhtawm, simsa ai hku htap htuk ai aten hta kahpa galai lu na hpe Nawku Hpung kaw nna hkap la manu shadan ai.

Shing rai nna, gyip ai uphkang wuhpung wuhpawng gaw madu myit ra ai tingkyeng lam hpe machyu ai, shing n rai, myit masa hpe sha hkan ai ladat hpe Nawku Hpung kaw nna n gun n jaw lu ai. Jet ai democresi gaw tara hte hkrak rai nna jet ai shinggyim masha a ntsa e madung da jang sha mai byin ai. " (Pope John Paul 11, CENTESIMUS ANNUS 46)

Madu e, nang kawsi ai, hpang gara ai, manam tai hkawm ai, singgu krin re ai, machyi hkrum ai hte htawng e nga ai hpe, anhte galoi mu nna, nang hpe n galaw daw ga ta? Ngu nna htan na mu ai. Dai rai nna, Ngai nanhte hpe teng teng tsun ma de ga, Ndai ni hta na kaji htum ai wa hpe nanhte n galaw myit dai majaw, ngai hpe n galaw myit dai rai nga ai, ngu nna shanhte hpe htan na mu a. Mt. 25:44-45

Masha langai sha pyi grau kaja na prat hta nga lu na matu ngai garum lu ai rai jang, ngai a prat nawng ya ai lam dik mat sai. Karai Kasang a amyu masha tai lu ai gaw mau hpa rai nga ai. Shakum ni hpe sharun kau lu nna anhte a masin salum ni hta myiman ni, mying ni hte lu jahpring ai gaw anhte awng dang ai lam rai sai. Pope Francis, EG 274

Shawa hte seng ai ga san ni hpe Nawku Hpung kaw nna ga shaga wa ai shaloi, Nawku Hpung gaw "kaga masha ni hte seng ai" hta n shayak ai. Masha hkum shagu gaw asuya hte n seng a zawn, shawa a ahkyak akri rai nga ai dinghku mung asuya hte n seng ai. Kabu Gara Shiga myit jahtoi ya ai hte maren, shinggvim masha hte masha hpawng ni a ahkaw ahkang hte seng jang Nawku Hpung gaw shawng e tsap nna ga shaga ya ra ai.

NDai zawn galaw ai gaw Nawku Hpung a atsam power jat na matu mung n re, ntsa hku nna ahkaw ahkang la ai mung n re. Shawa a asak hte rai jang, n tara ai lam nga shagu Nawku Hpung hta shaga na matu ahkaw ahkang hte lit nga ai.Kahtawlik hpung a shawa hte seng ai tara gaw hkum tsup ai masing rai sai ngu n tsun lu ai. Kahtawlik Nawku Hpung a shawa hte seng ai tara ni gaw shuk la ai shawa hte seng ai, sut masa,mung masa ni hpe shinggan kaw nna jeyang ai, hkum tsup ai Karai hpaji a lakung lakap n rai nga ai.

De a malai ndai shawa hte seng ai tara gaw mung masa hpaji, sut masa hpaji, nhprang tara hpaji, jak hpaji hte shawa hte seng ai hpaji ni hte dingyang kahti galai ga shaga na matu re, shawa hte seng ai tara gaw masha hte shi ai shawa prat hpe grau chye chyang wa na matu, myit sawn sumru yu wa nna mahtai shapraw lu na matu rai nga ai.

 Nawku Hpung a shawa hte seng ai tara gaw Hkristan ni a matu sha laksan n rai nga ai. Mai kaja ai lam hpe shakut mayu ai ni yawng a matu rai nga ai. Shinggyim masha n chye na lu ai, myit yu sawn yu n lu ai lam ni hpe Nawku Hpung a shawa hte seng ai tara hta hpa mung n nga ai.

Gara hku raitim, Wa Sarabyin ni a Nawku Hpung shawa hte seng ai tara ni gaw, Kahtawlik Hpung masha ni a matu laklai nna lachyum rawng ai. Shawa hte seng ai tara ni hpe tsaw ra ai, tara rapra ai Karai Kasang kaw nna makam masham hpe myit jahtoi ya ai majaw tsaw ra ai, tara rapra ai bungli shagu hpe Karai Kasang hte Shi a ga sadi hta madung da nna yu ra ai.

Dai majaw Hkristan ni gaw kaja ai bungli ni hpe tatut hkan shatup ra ai. Bai nna, myit kaja rawng ai masha yawng gaw, ndai shawa hte seng ai sharin shaga lam hpe yawng hte seng ai ngu nna hkam la lu Kam sham ai ni a matu rai jang, mungkan gaw shi hkrai shi byin wa ai, shing n rai, n byin n mai, ngu ai n nga ai Karai Kasang a masing hte byin wa ai sha re.

Dai majaw kam sham ai ni a lit gaw, myit kaja rawng ai num, la ni yawng hte kahkyin gumdin na, kaga makam rawng ai ni hte kahkyin gumdin na, kam sham myit n rawng ai ni hte mung kahkyin gumdin na, ndai anhte a mungkan gaw Karai Kasang a masing hte maren rai wa na: Hpan Madu a lanu lahku ya ai npu e dinghku langai zawn nga ra ai. Pope Benedict XVI, Civ 57

Masha langai hpe tsaw ra ai ngu ai gaw shi a matu kaja ai lam ni hpe sharawng ya ai re St. Thomas Aquinas, Summa Iheologiae 9.26, ort.6. obj.3  

Anhte gaw hprawng mat ai,ngaran hkraw ai,njaw mat ai, apyaw sha rawng nga ai gaw anhte mai kaja ai hku sak hkrung ai ngu ntsun lu ai. Dai zawn re ai Prat gaw madu hkum madu abwi sha sat si ai hte bung nga ai. Pope Francis, EG 272

Dai rai yang, Shinggyim hpawng a sharin shaga ai lam gaw htum mat na rai kun?

Shinggyim hpawng gaw, mau hpa atsam hte lam shagu hta galu kaba wa dingyang rai nga ai. Dai hte maren Nawku Hpung a shinggyim hpawng hte seng ai sharin shaga ai lam mung hkum tsup mat sai ngu ai n nga ai. Jahkring kau ai, hkum pat da ai lam mung n nga ai.

Madu a Ja Chyum Mungga hta ngang grin ai ningpawt gaw da nna, chye madat hkam la ai ni hpe tut nawng sharin ya nga ai. Moi npawt kaw nna, shinggyim hpawng hta ra ai mahtai nnan ni hpe tam sagawn ya nga ai. Dai ni na prat madang hta hkrum nga ai dahkat ni hpe mung mahtai lu na lam madun ya nga ai.