Jau Prat (25) Ning Hpring  Wajau Peter Dr.Hka Awng Tu Hte Shi A Labau

Wajau Peter Dr.Hka Awng Tu Jau Prat 25 ning hpring Jubali Poi hta / Photo:Thomas

Myitkyina Jau aseng, Ginwang up Wajau Peter Dr. Hka Awng Tu a Jau prat (25) ning hpring Jabali poi hpe 2019 May shata praw 1 ya shani, Myitkyina Edin San Luka Chyum   Jawng wang hta galaw lai wa sai rai nga ai.

Lai wa sai 1994 ning, May shata praw 1 ya shani, Wa Sarabyin a dat kasa Saradaw Kaba Archbishop Luigi Brassan Myitkyina  de sa du ai shaloi , Saradaw kaba a lata hta JAU AYA hkam la sai rai nga ai Wajau Peter Dr. Hka Awng Tu gaw dai ning 2019 May shata 1 ya shani Jau tai ai 25 ning tup hpring sai rai nga ai.Dai hte maren, Wajau Hka Awng Tu a 25 ning hpring ladu hkrum Karai Kasang hpe chye ju shakawn ai  Gumhpraw  Jubali Poi  lamang hpe galaw ai rai nga ai

Wajau Peter Dr.Hka Awng Tu, 57 a Jabali Poi chye ju dum Missa hkungga kaba hpe jahpawt daw 9:00AM ten kaw galaw ai  hta, Jubali madu rai nga ai Wajau Hka Awng Tu shi hkum nan Missa hkungga hpe woi awn nawng jau ya nna, Philippines Mungdan Manila kaw nna du sa wa ai FABC-OSC ngu ai Asia Saradaw uhpung, shawa hpawng matut mahkai rung lithkam  Wajau Rev.George, Wajau Mariano Soe Naing woi awn ai Myanmar Mungdan Shawa hpawng matut mahkai rung kaw na Jau ni, hte Columban Jau Kaba ni, Myitkyina, Manmaw, Lashio sasana kaw na Jau ni yawng 50 jan shanglawm nawng jau ya sai rai nga ai.Myitkyina Sasana Sagurem wa, Wa Saradaw Francis gaw ahkyak ai zuphpawng langai a majaw n lu shang lawm ai rai nna, Missa hkungga hta Wajau kaba, Francis Zukdaw Lum Dau hku nna, Mungga htawn tsun ya sai re.

Wajau a mungga hta ‘“ Jubali poi hta Wa Saradaw n shang lawm lu ai rai tim, ya na zawn Jau ni 50 jan hte  rau chye ju shakawn Missa hkungga nawng jau ya lu ai , dai hta ngai hku nna mung Wa Saradaw a malai shanglawm let Mungga htawn na ahkang lu ai,Karai Kasang a yaw shada ai lam gaw mau hpa amu re nga ai lam, Madu Yesu gaw Karai Kasang a lam hkaw tsun gat hkai na matu Sape ni hpe lata la nna Nawku hpung hpe woi awn shangun ai (Mahte 10 )  , Kasa ni hpe kashin kamun hkalup jaw ya nna lamu ga prat htum hkra Karai kasang a hkang da ai tara ni hpe hkan shatup lu na matu kam sham ai ni hpe sharin shaga ya na matu tsun ai,dai hte maren,Kahtawlik Jau langai ngu ai gaw, ‘ dai hkristu a hkum daraw la nna kam sham ai ni nlang hte hpe Karai Kasang a lam hkaw tsun sharin shaga ya nga ai re lam, ya Wajau Hka Awng Tu mung  lai wa sai 25 ning hta n dai kaw jau shatai la ai hpang , ra ai magam bungli hpe galaw ai, Karai Kasang shi hpe ahkaw hkang jaw da ai, 25 ning laman n kaja ai masha ni hpe gale la ai, mara lu ai ni hpe mara raw ya ai , sumsing mungdan de sa ya ai, dai majaw dai ni na Jabali hta numbat langai  Karai a chye ju hpe  shakawn ai, lahkawng hta shi hpe shagrau sha-a ai,shi hpe shalan shabran ya ai re ai lam, Jau ni mung a-gung alau amyu myu hkrum mai ai re majaw , matut nna hpung masha ni jau ni a n tsa mara raw ya, akyu hpyi ya ra ai”  ‘ nga nna hkaw tsun lai wa ai.

Missa hkungga ngut ai hpang shagrau sha-a daw sha ai lamang ni matut galaw ai hta, Jinghpaw Mung hkring mang Daju Dr.Hkyet Awng hte Mungdaw Asuya mu gun manang ni, Jinghpaw Wunpawng Hkalup Hpung Ginjaw a Ningbaw Rev.Dr.Hka Lam Sam Son, Myitkyina Hkristan Pawng Hpawn Hpung MCC malawm ni, Mung shawa hte seng ai shinggyim uhpung uhpawng kaw na Salang ni ,Du Salang ni sa du shang lawm lai wa ma ai.,

Shagrau ai lamang hta, Wajau a labau kadun ni hpe hti dan ai lam,Ga shagawp hte shakawn shagrau ai lam (Nbau Bum Zau Lum), pahtau n-sen bau dum nna shagrau ai lam,bai nna htunghking magun shat lit hte shagrau ai lam ,dai hpang n ta masha, Jau Ginwang, Mare Lawk ni hte jinghku jingyu hpung masha ni hku nna laksan Wajau hpe shagrau la  ai lam ni galaw lai wa ai.Bai nna April shata 30 ya shana daw hta mung htunghking hku nna sa du shagrau ai magun shat lit 120 jan du ai lam chye lu ga ai.

Wajau Dr.Peter Hka Awng Tu hpe 1962 ning,March 15 ya shani,Hkahku Mung, Sumpra Bum Ginwang, Myoma Lawk,Hpatchyai Wa Lawng, Magawng Tawng Hput Ga kaw, Slg.Yawhan Hka la hte Jan Maria N-sau Roi kawn shangai dai daw ai rai nna kaji ten hta Mugaung,Sumpyi Yang, Machangbaw Mare ni hta lawu tsang, lahpran tsang hpaji ni hpe sharin lai wa nna, No.(3) Lahta tsang Jawng, Myitkyina kaw 1984 ning hta tsang shi hpe Phyisics,Chemistry,Mathematics sawn hpan ni hta laklai ningtawn ai  (Distinction) hku awng pru sai.Dai hpang Myitkyina College,Pagu College hte Madalay Dakkasu jawng ni hta hpaji Bachelor hpaji sharin la nna, Philippines Mungdan, Manila kaw na University of Philippines, Los Banos, UPLB kaw Master Hpaji hte Doctorate Hpaji ni hpe sharin la la lai wa sai rai nga. 2011 ning hta Doctor of Philosphy  ngu ai jan mau hpe , shawa hpawng matut mahkai bawngring lam hpe madung da ai hku nna awngdang la lu sai rai nga ai.

Wajau Peter Dr.Hka Awng Tu gaw, shi Jau aya hpe hkam la ai hpang, Sasana magam gun langai hku nna, Ginwang up jau magam lit  hte Saradaw ginwang kata hta Shawa hpawng matut mahkai magam  dap (Office of Social Communication) rung lithkam, Myitkyina Hkristan Pawg hpawn Hpung ( MCC ) ningbaw magam lit hte Myitkyina Saradaw Ginwang Garum shingtau Hpung ningbaw ,Wunpawng Myu sha  Hpyen yen zinlum Hpung KHCC ningtau ningbaw magam lit ni hpe mung gun hpai nga ai rai nga ai hta n-ga Mungdaw ngwi pyaw simsa lam ,Amyu sha lam yan ni hta mung shang lawm nga ai Wajau langai rai nga ai.

Bai nna Radio Veritas Asia (RVA) Jinghpaw Nsen Shapoi Dap kaw mung 2001 ning kaw nna 2008 ning du hkra, 7 ning  jan lithkam Jau langai hku nna magam gun lai wa sai rai nga ai.

Wajau Hka Awng Tu gaw, Karate hte U-mun (Badminton ) ginsup ai lam, ျခင္းလုံး hte gawdin ginsup ai hta mung ningtawn ai wa rai nga ai.Hkam ja lam a shani shagu n law htum minutes 30 lam ginsup ai lam,lam hkawm shamu shamawt ai lam hpe kade n rau tim tut nawng dinggrin hkan galaw ai majaw,machyi makaw mung n hkrum ai sha,  Sasana magam bungli ni hpe ten tup n hprai ai sha galaw gun hpai lu ai wa mung rai nga ai.

 

Thomas

 

 

Add new comment

19 + 1 =