Hpa majaw Hkristan ni gaw shinggyim masha a sari sadang hpe manu shadan da a ta?

Masha marai shagu gaw, hkritung kaw nna asak lu nga sai, n lu jahten ai sari sadang mung lu nga sai, hpa majaw nga jang, moi chyaloi n hkoi kaw nna, Karai Kasang ra sharawng nga ai  Shinggyim masha hpe tsawra ai hte hpan da nna hkye mawoi la sai, htani htana ngwi pyaw nga na matu yaw shada da sai rai nga ai. (1699-1715)

Lama wa masha langai a awng dang ai lam ni hpe, shi galaw lu ai lam hta madung da nna sha sari sadang nga ai ngu masat ai rai jang, n-gun kya ai ma ni, machyi makaw rai nga ai ni, hpa n galaw lu ai ni gaw sari sadang n lu mat ai zawn rai nga ai. Shinggyim masha a sari sadang gaw, shawng nnan Karai Kasang hkum nan anhte hpe hkungga ai hte bang da ya ai majaw grai ahkyak nga ai re. Karai Kasang shinggyim masha hpe mungkan ntsa e shi hkrai sha nga ai zawn yu lakawn tsaw ra nga ai. Adam a kasha hpe yu lakawn ai gaw dai masha hta n dang sawn lu ai manu dan ai sari sadang lu ai majaw re, dai hpe masha ni n mai jahten kau ya ai.  Ndai lam the seng nna Wa Sarabyin   (Pope Benedict, XVI tsun da ai gaw,      August 15, 2005)   

”Karai Kasang n nga mat jang, num hte la gaw grau tsawra  hkat wa na n re;  Karai Kasang a sari sadang mat mat jang, Karai a shingkang gaw hkoi mat wa na n re. Hpang jahtum e gaw masha shada asung jashawn nna jahten shaza ai lam sha byin wa na rai nga ai. Anhte a prat hta ndai hku nan byin taw nga sai nga nna Wa Sarabyin   (Pope Benedict, XVI tsun shana lai wa sai.  August 15, 2005)

[281]  Ngwi pyaw ai hpe anhte hpa majaw ra sharawng a ta? ngu ai ga san a mahtai hpe jawm madat la yu ga.

Anhte a masin salum ngwi pyaw ai hpe ra sharawng na matu Karai Kasang hkum nan bang da ya sai re majaw Karai Kasang hta lai nna hpa mung anhte hpe myit n shadik ya lu ai. Myit n shapyaw ya lu ai. Mungkan kaw na jaw ai ngwi pyaw simsa lam gaw Karai Kasang jaw ai htani htana ngwi pyaw ai lam a namchyim sha rai nga ai. Anhte gaw mungkan ga na jaw ya ai ngwi pyaw lam hpe koi yen kau nna, Karai Kasang hpang de gayin wa ra ga ai.

Brother Roger ngu ai wa tsun ai gaw,” Anhte ngwi pyaw na hpe Karai Kasang ra sharawng ai. Raitim dai a npawt gaw Karai Kasang hte matut mahkai ai hta sha madung nga ai, Karai Kasang gaw masha shagu a wenyi kata e nga ai nga nna tsun da ai.               Brother Roger Schutz  (1915-2005)

[282]  Ngwi pyaw ai lam de du lu na matu Chyum Laika hta ganing nga tsun da ai kun?    

Yesu hkum nan tsun da ai A lu ai lam hta kam shamyet hkan sa jang ngwi pyaw ai de du lu nga ai. [1716-1717]

Karai Kasang madun ai lam hta hkawm mayu ai masha yawng hpe jaw ai ga sadi gaw Kabu Gara Shiga rai nga ai. Grau nna A Lu Ai Lam ni hta e htani htana shaman chyeju jaw ya nga ai. (Mt 5:3-12) Shi Madu a kasi hpe la nna san seng ai myit hte simsa ai lam hpe tam ai gaw madung rai nga ai, nga nna Yesu tsun da ai.

“ Ngwi pyaw ai gaw anhte a kata e n re, anhte a shinggan e mung n re. Ngwi pyaw ai gaw Karai Kasang hta chyu sha nga ai re.  Anhte Shi hpe mu tam jang, Shi gaw shara shagu hta e nga nga ai.” nga nna san pra ai Blaise Pascal (1588-1651) tsun shana lai wa sai. Dai rai yang 

[283]  Alu ai lam ni gaw hpa rai kun? (Mt 5:3-12) hpe jawm madat la yu ga.

Wenyi hta matsan mayan rai nga ai ni gaw, a lu ma ai,

kanining rai nme law, sumsing lamu a mungdan, shanhte a mungdan rai nga ai.

Yawn hkyen hkrum ai ni gaw, a lu ma ai:

kaning rai nme law, shanhte shalan shabran ai hkrum na ma ra ai.

Myit sumnung ai ni gaw, a lu ma ai:

kaning rai nme law, shanhte mungkan ga hpe madu lu na ma ra ai.

Ding hpring ai hpe kawsi hpang kara nga ai ni gaw, a lu ma ai:

kining rai nme law, shanhte hkru kat wa lu na ma ra ai.

Matsan chye dum ai ni gaw, a lu ma ai:  

kaning rai nme law, shanhte matsan dum la ai hkrum na ma ra ai.

Myit san seng ai ni gaw a lu ma ai:

kaning rai nme law, shanhte gaw Karai Kasang hpe mu lu na ma ra ai.

Shangwi shapyaw chye ai ni gaw, a lu ma ai: 

kaning rai nme law, shanhte hpe, Karai Kasang a kasha ni, ngu nna shamying na ma ra ai. 

Ding man ai lam a majaw, zingri zingrat hkrum ai ni gaw, a lu ma ai:

kaning rai nme law, sumsing lamu a mungdan, shanhte a mungdan rai nga ma lu ai. Nye lam a majaw, masha ni nanhte hpe asawng asang di nna zingri zingrat na ma ai hte, masu ai hku hkan let mara amyu myu shagun da myit dai shaloi e, nanhte a lu myit dai: kabu nna pyaw pyaw rai nga mu; kaning rai nme law, sumsing lamu hta e nanhte a shabrai kaba nga ma lit dai: nanhte a shawng na myihtoi ni hpe mung shanhte dai hte maren, zingri zingrat di kau ma nu ai. nga nna (Mt 5:3-12) hta Madu Yesu tsun da nga ai.

Anhte kaja wa myit ngwi simsa lu la na lam hte seng nna, Mother Theresa tsun da ai gaw,

“  Anhte hkan nang kasi la ging ai wa gaw Yesu chyu sha re, nhtoi majing jaw lu ai wa gaw Madu Yesu chyu sha re, asak hkrung ging ai wa mung Shi chyu sha re, tsaw ra ging ai tsaw ra chye ai wa mung Madu Yesu chyu sha re.” nga nna Sanpra ai Mother Teresa tsun shana lai wa sai. (of Calcutta (1910-1997) ngu ai lam ni hpe shana dat lu ga ai law.