Hka Garan Mare Na St.Paul's Nawku Jawng Dingshawn Poi

Hkungga tsawra ai shiga madat Nu Wa Hpu Nau ni, Myitkyina Sasana, Sumpra Bum hte Durip Jau Ginwang, Hka Garan Yang Mare kaw grai hkik hkam ai San Paul Nawku Jawng hpe gaw gap da sai rai nna, 2020 Frebruary shata 22 ya shani Nawku Jawng Ningnan dingshawng shang poi hpe galaw la lu sai rai nga ai.

Ndai Hka Garan Yang Mare gaw, Lai wa sai 2011 kaw nna  byin ai  majan a majaw Jinghpaw Mung kata, Mare Buga law law kaw na Ginra nga masha ni hpyen koi yen mat ra mat ai hte, Durip Jau Ginwang mung mat mat ai daram rai wa nna, ya ten Sumpra Bum Jau Ginwang kawn yu reng nga ai shara mung rai nga ai.

Dai ni ten du hkra rai tim Mare masha law law gaw Hpye yen Ginra hta machyu nga ai rai nna, tinang Mare Buga de shimlum ai hku bai wa nga lu na ahkaw ahkawng hkrak nlu shi ai ten mung rai nga ai.

Majan tsin yam a majaw, mayak mang hkang law law a lapran kaw na, ndai ginra nga Nu Wa Munchying Hpung masha ni myit n shayawm ai sha, yawng atsam dat shakut ai majaw ya na zawn Nawku Jawng ningnan hpe gaw gap la lu ai ai lam rai nga ai.

Nawku Dingshawng shang poi hpe ndai ginra na magam gun rai nga ai Tara Hkaw Sara Sara Yosep Pinli Tang Hkam the Sara Yosep Gumgrawng La Awng yan a magam gun prat (25) ning hpring Jubali  hte Wunpawng Htunghking Manau hte Hpawn rai ngwi pyaw awng dang ai hku galaw la lu ai sai majaw Buga masha ni yawng grai kabu myit dik nga ma ai re.

Thomas