Anhte Marai Hkum Shagu Simsa Ai Lam Hpe Shachyam Shabra Na Lit Nga Ai

   Hkristan ni chyu sha simsa ai magam bungli hpe galaw ra a ni?

           Lai wa sai April shata na nhtoi langai mi hta, Facebook ntsa hta mu mada ai sumla langai mi gaw, anhte Hkristan hpung masha kaji kaba hpe kabu n-gun lu, simsa lam jaw ya ai sumla rai na sai ngu myit la n ngai. Dai sumla gaw bum pungding ntsa kaw jun hta ai Hkristu a Udang hpun n pawt kaw KIA myu tsaw shadang lahkawng hpyen hkying hte hkrak hpun da nna, lahput hput di let, baw gum let akyu hpyi nga ai sumla rai nga ai.

            Dai sumla hpe lachyum n chye ai ni gaw yu shalai kau tim, lachyum chye ai Hkristan ni a matu gade ram lachyum sung nga ai hpe, yu hkrup ai ni yawng mu chye chyalu rai nga ai. Ndai Udang gaw Hkristan ni a Hkye hkrang la ai labau, Madu Yesu Udang ntsa e si hkam ai a marang e, n kaja ai, nat tsadan, masu magaw hkalem sha ai, du daw sai hkaw, dip lu dip sha ai, n-gun kya ai myu kaji ni hpe, n gun kaba ai myu sha ni roi rip dang sha ai lam ni yawng hpe Madu Yesu a Udang a marang e awng dang la sai ngu ai hpe kam ai majaw, Udang n hpang e hputdi akyu hpyi ai rai nga ai. Ntara ai majan hpe awng dang hkra gasat lu na n gum atsam hpyi ai rai nga ai ngu chye madat la lu ai.

          Teng nga ai. Madu Yesu gaw Sumsing lamu hte mungkan ga lapran e simsa lam hpe shabyin da sai. Hku hkau lam hte myit kraw kata ngwi pyaw sim sa ai lam lu la na matu chyinghka mahkra hpaw da ya sai. Raitim, ndai simsa lam gaw shi hkrai shi n chyam bra wa ai. Ti nang hkum nan shachyam shabra dat ra ai. FB ntsa hta mara da ai sumla gaw simsa lam hpe grai tang du ai hku nna, shana shabra ya ai lam rai nga ai. Hpa majaw nga yang hputdi kyu hpyi nga ai, myu tsaw shadang yan gaw, angwi apyaw rai, chyai hkawm nga ai n re, shan a matu grai ahkyak la ai ten hta, hkrit tsang ra ai, asak sum hkra wa lu ai ten hta, kyu hpyi ai rai nga ai. Nam maling na Udang hta akyu hpyi la ai rai nga ai. Dai gaw shan a kam sham ai myit hpe myit simsa let, sakse hkam ai lam nan rai nga ai.

            Dai re majaw Madu Yesu jaw ya ai simsa lam hpe hkan tam ai shaloi, madu a prat hta mung, shada hpen tai nna, n ju n dawng ai wuhpung wuhpawng hte mungdan ni a lapran e mung simsa lam tam la na byin mai nga ai, ngu ai hpe shawng nnan hkap la ra ai. Ndai lam hpe chye lu na gaw, shada mara dat ya nna, hku hkau sai masha ni hte man hkrum, hkrum katut ra ai: Myit kraw kata hta Sim sa lam lu la ai ni gaw, tinang hpe hpyi nem tawng ban ai, asum hkam ai hpyen wa hpe bai nhtang gasat ai lam n galaw ma ai, matai n htang ai, adip arip n galaw ai, Dai gaw simsa ai lam hpe chye madat nna, ta tut asak hkrung ai ni rai nga ma ai. Simsa lam a Kabu Gara Shiga hpe n-gup ga hte magam bungli hte, garan gachyan ai ni gaw grau grau nna jet ai simsa lam a npawt nhpang Madu Yesu hte grau ni htep ai ni rai ma ai. 

            Anhte a ten hta, Shinggyim masha ni hkrum katut nga ai hkrit  tsang ra ai masa lam ni grai law nga ai majaw, mungkan  shara shagu hta nga ai Hkristan hpung masha ni yawng gaw, “Simsa lam a Kabu Gara Shiga” hpe sakse hkam ra ai, ndau shana ra ai. Simsa lam a teng man ai hpe lu la na matu, Karai Kasang a teng man ai lam hpe shawng shana shabra ra ai” nga nna Wa Sarabyin Benedict XVI (16) 2006 ning , mungkan simsa nhtoi hta tsun shana lai wa sai.

          “Mang hkang n nga ai majaw simsa lam nga ai ngu ntsun lu ai. Raitim Manghkang byin nga ai hpe simsa ai hku hparan la chye ai gaw sim sa ai lam nga ai lachyum re”. nga nna (1911 – 2004) laman hta nga lai wa sai. American Gumsan magam Ronald Reagan tsun shana lai wa sai.

          Simsa lam  gaw shinggyim masha yawng chye ai manu dan ai lam rai nna masha yawng shang lawm lit la ra ai magam rai nga ai. Simsa lam hpe n tam ai sha kadai mung n mai nga ai. Simsa lam gaw manu dan kaja ai daram hten run loi nga ai.  Dai majaw shani shagu, mabyin masa shagu hta, simsa lam hpe gaw gap ra ai. Hkristan ni hte Hkristan n re ai ni bai hku hkau wa nna, tinang hpe hpyen tai ai wa hte bai jahkrum chye madat wa na, tara rap ra lam jawm gaw gap sa wa na lit nga ai ngu ai hpe chye madat hkap la ai wa gaw, simsa lam a n pawt n hpang gaw gap ai wa re.  

 (1910-1977) hta nga lai wa sai India mung Culcutta mare na mama kaba Mother Theresa tsun ai gaw, “Masha ni hte nang a tsaw ra myit hpe garan gachyan ai shaloi, simsa lam nang kaw du wa ai hte, shanhte kaw mung simsa lam du wa ai hpe nang mu na ra ai.” nga nna tsun ai.

Mi wa myu sha ni a ga malai hta ning nga tsun da ai.

“Mungkan mungdan ni hta simsa lam n nga jang, mungkan hta simsa lam n nga ai;

Dinghku hta simsa lam n nga jang mungdan ni hta simsa lam n nga ai;

Ngai hta simsa lam n nga jang dinghku hta simsa lam n nga ai;

Karai Kasang hte ngai simsa lam n nga jang, ngai hta simsa lam n nga ai.” nga nna tsun da nga ai.

Hpu nau ni Anhte a Myanmar mungdan hpe mungkan ting jawm yu maram nga ma ai, galoi wa she, mungdan dinghku majan kaba byin wa na kun, shing n rai 3 lang ngu na mungkan majan byin wa na kun nga nna jawm yu nga ma ai. Kadai mi gara hku mu mu , ahkyak ai gaw anhte Myanmar mung chying sha ni, ndai ram laja lana re mang hkang kaba hpe, simsa ai hku hparan la lu mat wa ai rai yang, anhte Myanmar mungchying sha ni gaw simsa ai lam a manu, hpe nam chyim chye ai ni, Simsa ai lam hpa machyi hkam let gram la chye ai ni, simsa lam a lachyum hpe shachyam shabra chye ai ni rai na ga ai.    Anhte a mundane e Ngwi Pyaw simsa mat wa ai shani, anhte a manghkang kaba hpe jawm hpyan la nna simsa lam hpe gaw gap la saga ai, ngu sakse madun lu na nhtoi du wa na ra ai law.     

By:Mama Sylvia Lahpai Seng Tawng