Alam Wudang Bum Sharaw Wan Hte Nawku Hpung A Yaw Shada Lam Kaba

Wudang Bum Sharaw Wan Hkru Ai shara de sa yu ai Sara Yawhan Nhkum Naw Seng

23 May 2019, Myitkyina

Jinghpaw Mung Myitkyina Mare Kaba hte deng 10 jan tsan ai shara, Tanghpre Jau Ginwng , Alam Mare ntsa kaw na, Bum de shaning shagu September shata 14 ya du shagu, Jinghpaw Mung kaw na makam masham hpung n-gyin hka kam sham ai kashu kasha ni hte hpu nau Buhda Myen Sam Miwa Gala ni du hkra lawm ai masha mun kaba yan sa nna tinang myit mang yaw shada ai lam awng dang na matu akyu hpyi ai sa ai shara, bum lung ai mahkrum madup hpe  jaw ya lu ai shara langai nga nga ai.

Dai Bum a mying gaw, Alam Wundang Bum, Alam Akyu Hpyi Bum ngu ai rai nna, Myitkyina Sasana Kahtawlik Nawku Hpung a dan dawng dik ai poi kaba langai mi rai nga ai. Wudang Shagrau Poi ngu nna mung tsun ma ai.Mahkawn shabrang hte Ma kaji ni  kaw nna Asak kaba gawng kung sai Kanu Kawa ni du hkra, jahpawt jau jau n htoi n htoi shi ai ten kaw nna rawt let, tinang myit mada da ai lam awng dang na matu, Hkam kaja na matu, hpaga dingga rawt jat wa na matu, san poi awng na matu ndai zawn re ai yaw shada ai lam amyu myu hte Wudang Bum lung nna akyu hpyi yang Karai Kasang kaw na shaman chye ju jaw ya na re ngu kam hpa myit hte grai shakut let shaning shagu sa du lawm ai ni grai law nga ai rai  nga.

Ndai Wudang Bum Lung ai lam gaw, Madu Yesu shinggyim masha ni a matu nni nhkri hkam jen noi si hkam ai Kalawari Bum n tsa de  Wudang hpai lung ai lam hpe  myit dum shangun lu nga ai. Bum lawu kaw nna Bum Punding ntsa, Wudang Jun da ai shara du hkra, masat da ai Sa Ra 14 nga ai rai nna, poi laman Wudang bum lung ai masha ni shani shana dai shara ni hta wan shadaw shatu let  akyu hpyi ai lam galaw ma ai.

Akyu Hpyi bum lung  ai masha law ai zawn, Bum de n lung jin ai ni mung, Poi n htoi laman Bum Lagaw na Nawku Dawjau ai hta shang lawm na matu sa wa ai ni hte gat dut ai masha ni, si shat mai shadu kachyawng ai ni, Mawdaw Cycle sin hkang ai ni zawn re ai masha ni hte hpring tup rai nna masha manu mana myit lawm, shanglawm ai poi lamang langai re  lam chye lu nga ai.

N dai zawn, Shaning shagu masha mun kaba akyu hpyi sa ai shara, masha wunawng wuwa hte hkik hkam ai poi kaba galaw ai dai bum mayan hta lai wa sai May shi jan ya shani kaw nna hkru hpang ai sharaw wan gaw, 2019 May shata 21 ya shani, Wudang  Bum de chyam bra wa nna, Bum mayan yawng ngu na daram hkru mat ai lam chye lu ai.

PLN lahta na Bum Krin Bum, Dawn Da Bum maga  kaw na hkru hpang ai dai sharaw wan gaw Alam Wudang Bum de du wa nna, Bum punding kawn hkru hpang ai wan grai kaba ai hte lawu de Sa ra langai, Maria lungpu nga ai shara, dum nta arung arai ni hkru mat na tsang ra ai madang de du mat ai majaw, Alam Ubyit Mare masha ni kawn n-gun dat wan ga ai lam galaw lai wa ma ai lam chye lu ai.Lama na wan grau sawng wa jang gaw, wan hpe makawm maga na matu, seng ang ai Mare salang ni hte Wan sat dap na ni hpe mung tsun shana da ai lam galaw lai wa ma ai.

Sharaw  Wan grai kaba ai majaw Bum ntsa de nga ai  Jau nta, 2018 ning hta gaw gap da ai Nam dum ni hte ahkyak ai nta ni hta lai nna grup yin yawng hkru mat ai lam, Bum Lung Mawdaw lam a sinpraw hkran maga kachyi mi sha ngam nna Bum yawng hta na tsa lam shadang 90% ram hkru mat sai lam Tanghpre Jau Ginwang, Tara hkaw Sara litHkam Sara Nhkum La Yau tsun ai hte maren chye lu ai.

“Hkru ai gaw, May shata 10 jan ya kaw nna, PLN Bum Krin Bum  maga na ndai Wudang Bum de gayin wa ai, Wudang Bum punding n tsa kaw na hkru yu wa ai, lahkawng masum ya laman n pu de du, anhte wan-ga na matu sa wa ai shaloi gaw,  sa ra langai , Madu Yesu hkrung rawt wa ai shara ni hkan hkru na hkyen taw nga ai majaw  Ramma ni hpe mung shaga rai nna , Mawdaw lam hte lam num she , dum bret lam ni dun ye kau n htawm dang lu ai daram wan-ga ai lam galaw ai, Madu Yesu hkrung rawt ai akyu hpyi shara ni hpe gaw makawp maga la lu sai hku re, Karai Kasang a shaman chye ju majaw 23 ya shana marang kaba htu nna wan si mat ai “ nga nna Wan hkru ai hta ta tut sa yu lai wa ai Tanghpre Jau Ginwang, Tara hkaw Sara litHkam Sara Nhkum La Yau tsun lai wa ai.

Ndai bum ni hta shaning shagu hkru hpang ai rai tim, Alam Wudang Bum maga na hkru hpang ai gaw nnga ai, Kaga kaw na hkru hpang ai wan du wa wa re ai re majaw, ya na zawn wan hkru wa yang kara hku makawp maga na ngu ai မီးတားလမ္း ni,wan ga mai ai ladat ni, aten galu na matu ahkyak ai shara ni hpe makawp maga na ladat ni galaw da yang kaja ai ai lam Sara Nhkum La Yau matut tsun lai wa ai.

Ya na zawn sharaw wan hkru ai gaw, n dai Bum mayan, shan tam ai, dum su nga rem ai ni, grau nna gaw nam hkawm ai ni hka-yawm daw kaba da ai kaw na hkru hpang ai lam re nga nna jau man masha ni tsun lai wa ma ai.

Shaning shagu hkru ai n dai sharaw wan hpe makawp maga lu na matu seng ang ai Kanu Kawa ningbaw ni kawn lit shatsam let n hkru shi ai shaloi  tau hkrau wan ga ai lam ni galaw yang kaja ai nga nna, Ubyit Tara Hkaw Sara Npawn Mun Awng tsun lai wa ai.

Alam Wudang bum hpe lai wa sai , 1983 ning ram kaw nna, Wa Jau Paul Lasang La woi awn hpaw hpang  let Akyu Hpyi bum hku masat galaw lai wa ai rai nna, ya dai ni 35 lang ngu na aten du hkra, shaning shagu September shata 14  ya shani Wudang shagrau poi hpe wu wu di di galaw ai rai nna, Poi de Jinghpaw Mung hte Myen Mung shara shagu hkan na Makam Masham hpung  n-gyin hka masha mun lam akyu pyi sa lawm ai shara langai rai nga ai.Ndai Wudang shagrau poi gaw, Myitkyina Kahtawlik Sasana kata hta galaw ai  Nawku Hpung Poi ni hta na kaba dik ai poi lamang langai mi mung rai nga ai.

Wudang Bum grau grau tsawm htap galu kaba wa na matu, Nawku hpung kawn lit la let galaw sa wa na masing nga ai hte maren, Komitit ni hte rau ta tut masing masa jahkrat galaw mat na matu Wajau James Gawlu La Doi hpe lit shatsam da sai rai rai nga ai.Wudang Bum shagrau poi galaw ai shaning na sai raitim, Wudang Bum hta Akyu hpyi Nawku na shara ni atsawm nnga shi ai, grau nna gaw, mi hprap wan lu hkra shawng galaw nna Lam hte kaga htingsang dum nta ni hpe matut gaw gap na masing nga ai lam Wajau Gawlu La Doi kawn lai wa sai May shata 13 ya shani, Tanghpre Jau Ginwang Mu Gun hpung ni hte Wa Saradaw hkrum zup bawng ban ai hpawng hta tsun lai wa ai.

Bai nna, “ Bum mayan hta Nawku Daw Jau ai Missa kaw jai lang na Sabyi hte kaga hkai sun ni, hpun hkai ai lam ni mung galaw na matu yaw shada ai lam nga ai, n dai lam ni hpe mung myit ga “ nga nna Wa Saradaw Francis Daw Tang kawn mung seng ang ai Komiti salang ni hpe ningmu jahpaw tsun dan lai wa sai rai nga ai.Hpung masha n kau ni mung, ndai Wudang Bum lagaw, Bum Lawu pa layang hkan grai tsawm htap hkra, masha ni sa chyai hkring sa mai ai shara ni, ginsup ginra hte kaga nga mu nga mai lam ni galaw da ai rai yang gaw, galoi mung masha hpring chyat ai shara tai wa na re nga nna shan hte a ningmu ni hpe tsun lai wa ma ai.

Ya na zawn yaw shada lam kaba ni nga ai raitim, grai dam lada ai ndai Wudang Bum mayan Nawku Hpung kawn madu ai shara re ngu tup hkrak tara shang  masat da ai (grant) mung nnga shi ai hte Acre ginra kade ram dam ai ngu ai mung tup hkrak n chye  ai lam, seng ai ai Asuya ni hte bawngban jahkrup nna n dai lam ni hpe atsawm daw dan shagrin la ra ai  nga nna Salang nkau ni tsun jahta ai lam ni mung nga ai.

Mungkan ga gaw, laning hte laning grau grau kahtet wa ai hte du hkra ladaw galai shai wa ai masa ni a majaw, sharaw wan hkru ai madang mung grau tsaw wa na masa lam ni nga ai rai nna, ndai hpe makawp maga na ladat ni hkrang tara masat nna ya kawn n- galaw da ai rai yang, anhte yaw shada da ai Nawku Hpung a mying lu ai shara, hkik hkam tsawm htap ai shara, galoi mung grin nga ai Akyu Hpyi Bum byin tai wa lu na matu gaw grai naw tsan gang na rai nga ai law.

Thomas

Add new comment

14 + 6 =