(72) Ninghpring  Jinghpaw Mungdaw Nhtoi Poi Galaw Na Hte Seng Nna KIO Kawn Lit Shatsam Laika Shapraw

Du wa na 2020 ning January shata praw 5 ya kaw nna 12 ya shani du hkra galaw na maw mawn nga ai (72) ning hpring Jinghpaw Mungdaw Nhtoi hpe Mungdaw Asuya woi awn ai masing hte maren galaw na matu Wunpawng Mungdan Shalawng Hpung Ginjaw Komiti kawn 2019 ning December shata 22 ya shani ndau shagun laika shapraw dat ma ai.

Wunpawng Mungbawng Rapdaw (WMR) hte Peace-talk Creation Group (PCG) ni hpang de shagun dat ai dai laika hta ‘ Jinghpaw Mungdaw Masat Ninghtoi hte seng nna, 1948 ning, January shata 10 ya kaw nna masat shamying da sai hpe, gara Asuya, gara Rung kaw nna mung gram galai kau ai lam garai n nga shi ai majaw, shawng e masat shamying tawn ai hte maren naw lang na matu, ndai bungli hta hkan nna amyu bawsang shawa hta mahkang n shabyin ai sha, Mungdaw Asuya woi awn ai masing hte maren sha galaw na matu hte Wunpawng Mungbawng Rapdaw (WMR) hte Peace-talk Creation Group (PCG) lit la nna htunghking hpung ningbaw ni hpe Tin sanglang jahpra dan na matu lit jaw shatsam dat ai’

nga nna Wunpawng Mungdan Shanglawt Hpung Ginjaw Komiti Tingyang up hte seng ang ai ningbaw ni sen htu nna shagun jaw dat ai rai nga ai.

Jinghpaw Mungdaw Nhtoi galaw na matu hkyen lajang ai lam hta nnan daw ‘ Mungdaw Nhtoi’ ngu ai ga baw hte sha ka lang ndau shabra ai majaw Mung shawa hte Jinghpaw wuhpung wuhpawng nkau ni myit n hkrum ai hte social media facebook ntsa n ru n ra tsun dinglai myit nhkrum hkat ai lam ni nga ai majaw amyu sha yawng myithkrum ra sharawng ai ga baw hte moi na jiwoi jiwa ni ka lang lai wa ai hku sha galoi mung lang mat na matu wuhpung wuhpawng ni kawn ndau laika shapraw ai lam, hpaji jaw ai lam ni galaw nga ma ai rai nna Wunpawng Mungdan Shanglawt Hpung Ginjaw Komiti kaw nna mung ya na zawn ndai lam hpe  hparan ya na matu lit shatsam dat ai lam rai nga ai.

Jinghpaw Mungdaw nhtoi hte seng nna, Jinghpaw Wunpawng Htunghking hte Laili Laika Hpung Ginjaw ni gaw, Mungdaw Asuya hkringman Daju.Dr Hkyet Awng a  gawng malai, Amu Madu Kaba Htun Zaw hte hkrum zup let  Jinghpaw Mung Nhtoi sha ngu ra na , dai mying hpe gadai n mai lai na, Jinghpaw Wunpawng amyu sha yawng hte seng ai shara Myitkyina Manau Wang kaw Jinghpaw Mungdaw nhtoi galaw na rai jang Jinghpaw laika lang ra na hte ‘Jinghpaw Mungdaw Nhtoi’ ngu ai mying sha lang ra na lam, Jinghpaw Mungdaw Nhtoi ngu mying hpe lai ai kadai hpe mung ja ja ninghkap sa wa na re nga nna tsun jahta lai wa sai lam JHG Shiga dap kawn ndau shana dat ai hte maren chye lu ga ai.

Thomas

Ref: JHG Kachin News