“Tsawra Ai Myit Gaw Sin Pawt La Htet Nnga Ai ”

Hpunau ni dai ni na simsa lam hpe gaw gap ga lamang hta, (1 Korintu 13:5) hta ka da ai hte maren “tsawra ai myit gaw sin pawt la htet n nga ai.” ngu ai ja chyum mungga hpe sumru yu let simsa lam gaw gap sa wa ga.Ndai chyum mungga gaw, masha ni a n-gun kya ai lam ni hpe mu nna laja lana shakrip bun ai zawn re hpe koi yen  na matu shadum ai rai nga ai. Masha n kau gaw kaga masha ni jahte tam wa ai shaloi myit kraw kata hta masin pawt katu nga ai. Dai masha gaw   tinang hpe jamjau jaw na ni re jahkrit shama na re ngu myit la nna shanhte hpe koi mat wa ai. Myit kraw kata masin pawt nga ai hpe sharang dip da ai. Aten grain a hkra Myit kraw kata kaw matai dawp mayu ai hpe kyem da ai, dai gaw kadai hpe mung akyu n jaw ai re. Tinang a myit hpe mung jam jau jaw nna, kaga masha ni hte mung tsan gang mat wa shangun nga ai.

 (Mt.7:5) hta tinang a myi hta na hpun tawng hpe shawng shaw kau u, dai hpang nhpu nnau wa a myi kaw na n bun hpe lai kau ya u shaloi nang asan sha mu lu na rin dai. Nga nna tsun da nga ai. Chyum mungga shadum ya ai gaw, anhte kraw lawang hta, sin pawt la htet ai myit hpe n mai kyem da ai. (Roma 12:21) nhkru n hkra ai gaw nang hpe n dang kau u ga, mai kaja ai lam hku nna, nhkru n hkra ai hpe dang kau u. nga nna tsun da nga ai. Anhte myit hta masin pawt mayu ai lam byin chye ai. Raitim dai pawt singdawng ai myit hpe myit hta ru jung mat hkra kyem da ai rai jang grai tsang shara rai sai. Dai majaw kasa Pawlu Ehpesu masha ni hpe shadum ya ai hta, “nanhte  pawt sindawng ai myit rawng yang, jan hkum shadu myit.” Nga nna hpaji jaw da nga ai. Pawt tai myit gaw tinang a hkam kaja lam hpe mung hkra wa ai. lani mi pawt jang hpang shani mung pawt wa nna ru jung wa chye ai.

Anhte dum nta masha ni a lapran, mare buga masha ni a lapran ni hta, simsa lam gaw gap lu na matu, hput di nna asum jaw kau na kun? Nrai nga ai. Kaji sha re mai kaja ai lam hpe  galaw ai, kyang lai len hpe madun ai, myi man n sam hpe madun ai rai jang myit pyaw ai lam jaw ya lu nga ai. Tinang hpe asawng asang di ai, myit machyi shangun ai wa hpe shi hpe bai matai dawp ai lam hkum galaw u, shi hpe bai htang lu ai kaja dik ai lam   gaw, shi a matu akyu hpyi ya u, Karai Kasang shi hpe shaman ya na matu kyu hpyi ya u. gyit hkang da ai na a myit hpe lawan hpyan kau dat u. Anhte gaw n kaja ai lam hpe ninghkap gasat na lit nga ai raitim, tinang a dum nta masha ni a lapran e gaw laja lana re hpe tsep kawp koi yen kau ra ai. Hpa majaw nga yang tsawra ai myit gaw mara dat ya lu atsam nga ai.

105 – Greek myu sha ni lachyum htai ai hta, tsawra ai myit gaw, n kaja ai lam hpe myit masin hta tsep kawp jahpan n ka matsing da ai. Dai majaw tsawra ai myit gaw pawt singdawng katawt ai lam n nga ai. Pawt singdawng ai lam n nga jang, mara dat ya ai lam nga na re. Mara dat ya ai gaw masha wa a gawng kya ai hpe chye madat hkap la ya nna, mara n mu ya ai myit masa rai nga ai. (Lk. 23:34) hta “Wa e shanhte a mara hpe dat kau ya rit. Shanhte galaw ai lam hpe shanhte n chye nga ma ai.” nga nna Madu Yesu gaw Udang ntsa kaw nna wa Karai Kasang hpang de kyu hpyi ai.

Anhte chyawm gaw, masha ni a ntsa e mara n mu, mu hkra tam chye ga ai. Masha ni kaji sha shut ai hpe grai kaba ai mara tai hkra shapau la chye ga ai. Ndai zawn mara matsing da ai na magang mara tam ai myit kaba wa magang rai nga ai. Grau nna kun dinghku hta, ningrum ningtau yan a lapran e mara tam hkat ai, mara chyu mu ai myit grai ru jung wa ai rai jang, dinghku hta simsa lam hten run mat na re. kaji kajaw shut ai hpe laja lana re ladat hte tai wa chye ai. Myit yu mang yu dinglik yu nna, tinang a sari sadang hpe makawp maga na malai, matai dawp mayu ai myit katu ai prat de du mat wa ai.

106 – Anhte hpe marai rai myit machyi shangun ai rai yang mara raw dat ya u, n dai lang gaw rai nu ga ngu myit la ai. Dai gaw grai htap htuk ai lai masa rai nga ai. Raitim grai yak ai lam rai nga ai. Dum nta kun dinghku hta gaw grai yak la ai ladat rai nga ai mara dat ya ai, machyi hkam kau ai, shagrit shanem ai myit masa hte sha madi shadaw da ai rai nga ai.  Ting kyeng myit rawng ai, bawngban jahkrum la n mai ai, laja lana ga li ga law nga ai, rai jang kun dinghu kata simsa lam hten run mat wa na rai nga ai.

107 – Masha ni hpe mara dat ya ai marang e tinang a lam grau sung sung chye madat wa ai. Masha ni hpe mara dat ya ai majaw, myit hta shalawt hkrum ai. Anhte hpe masha ni shatan ai, jahpoi ahpyak hkrum ai shaloi anhte hkum hpe anhte  grai grit nem dum ga ai. Sari sadang n rawng ai zawn hkam sha wa ga ai. Masha ni hte mung nau n kam ganawn mat ai, tinang hkrai nga mayu wa ga ai. Asan brang lang tsun shaga ai lam hpe   koi wa ai. Gadai hpa tsun tim zim sha nga mat wa chye ga ai. Dai gaw anhte mara dat n hkrum ai sha mara chyu madi madun hkrum ai shaloi byin ai lam re.

Masha ni hpe aten shagu mara madi madun chye ai wa gaw, tinang a hkum hpe n jaw ai hku makawp maga taw nga ai wa re. Dai majaw anhte gaw lai wa sai ten hta tinang a gawng kya lai wa sai labau hpe hkap la chye ra ai. Dai a ntsa e jaw ai hku akyu hpyi la chye ra ai. Tinang byin lai wa sai mabyin hpe n magap ai sha hkap la chye ra ai. Tinang gaw shut chye ai wa re, n hkum tsup ai wa re hpe hkap la chye ai hpang tinang a hkum hpe mara dat ya ra ga ai. Masha ni hpe mung mara dat ya ra ga ai shaloi myit masin   hkum hkrang yawng shalawt hkrum ai rai nga ai.

Hpu nau ni simsa lam gaw gap ga ai shaloi, ti nang a hkum hpe mara dat ya nna hkap la chye na ra ahkyak ai zawn manang wa hpe mung mara dat ya ga ai rai yang jet ai simsa lam lu la nna gaw gap nga ga ai re ngu shana dat lu ga ai law.