Philippine Mungdan Hta Typhoon Laru Kaba 2 Lang Byin Ai Hpang Philippine Caritas Kaw Nna Garum Ningtum Hpyi Da Ai

Ulysses ngu Philippine masha ni tsun ai Vamco Typhoon Laru Kaba a majaw, November 11 ya shani, Luzon, Metro Manila hte Cagayan ginra shara law law hta hka kaba/rawt wa nna dum nta ni law law hten run mat sai lam chye lu ai. Daining na lapran sha 21 lang ngu na ndai laru kaba a majaw masha 53 si mat sai rai nna, masha marai 52 hkala hkrum ai lam hte masha marai 22 gaw mat mat taw nga ai lam Philippine balik dap hte hpyen dap kaw na tsun da ma ai.

Daining na laru kaba dik htum ai gaw October 31 ya shani byin ai Tyhpoon Goni rai nna, dai hta masha 25 si mat ai hte dum nta hkying kaba hku jahten kau ai lam chye lu ai.

Chyam bra ana coronavirus mung Philippine mungdan hta jat magang rai nna, November 14, bat kyu ya shani na jahpan hta ana kap 1,650 rai nna, marai 39 si jat ai lam chye lu ai.

“Cagayan ginra na masha ni, grau nna sasana ma ni hte sak kung sai ni hkra machyi kaba hkrum ma ai majaw garum ningtum hpyi nga ma ai. Nkau ni gaw si mat masai,” ngu Wa Jau Labiao tsun dan wa ai. Ndai ni hpe garum na matu yawng shang lawm ai n rai yang shanhte sha galaw lu na n re ai lam mung matut tsun dan ai.

“Yawng hpe hkye la ga. Aten gaw grai ahkyak taw nga ai. Asak shagu gaw ahkyak ai,” ngu mung saw shaga da ai.

Philippine Mungdan Asuya kaw nna mungdan shagu de garum hpyi na matu Kahtawlik Nawku Hpung hpaji jaw shadum da ai lam Philippine Caritas a director Wa Jau Antonio Labiao kaw nna tsun dan da ai lam Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2020-11/philippines-caritas-government-typhoon-vamco-appeal-help.html

 

Add new comment

8 + 6 =