Wa Sarabyin: “Du Sa Ladaw Gaw” Galai Shai Let Hkawm Sa Na Hkrun Lam Re

Du Sa Ladaw hta (2) ngu na laban ang ai, December 6 ya shani, San Peter Pa hta, Madu Lamu Kasa Akyu Hpyi ngut ten Wa Sarabyin Francis gaw Nawku Hpung masha ni Madu Karai hpe hkap la lu na matu galai shai ai hkrun lam hta hkawm sa ga ngu saw shaga da ai.

Chyum daw hpe dai shani hti ang ai Mk 1: 1-18 kaw na la da ai. Ndai chyum daw gaw anhte ni Hkristmas aten Hkyela Madu hpe a la nga na matu saw shaga shadum lam matsun nga ai rai nga ai.

Yawhan Baptista tsun ai hte maren Karai Kasang a Ja Mungdan de hkawm sa ai lam gaw myit malai lu nna galai shai ai lam rai nga ai.

Galai shai ai ngu gaw hpa hpe tsun matu ai rai ta? Shawng ningnan galai shai ai ga si a lachyum hpe Wa Sarabyin Francis sumru woi da ai. Chyum laika hta tsun ai gaw shawng ningnan anhte a hkrun lam hpe teng man ai lam, jaw ang ai lam de gale hkawm sa ra ai. Rai jang she anhte a myit sumru ai lam hpe mung kaja ai sumru chye ai de galai shai wa na rai nga ai.

Nhkru nshawp, nhpru nmai ai shinggyim laikyang a majaw shut hpyit mara kaw nna gayin wa let, mai kaja ai shinggyim laikyang hte wenyi sak prat hpe hkap hkam la ra ai. Dai gaw Karai Kasang hpe tsaw ra ai lam rai nga ai.

Ndai gaw San Yawhan hkaw tsun ai mara hta na gayin wa let myit malai lu ai kashin kamun kumla nan rai nga ai.

Kashin Kamun Chyeju Kumla hpe hkam la ai gaw Madu Yesu a Mungga hpe madat hkam la nna myit malai lu ai mu mada lu ai kumla nan rai nga ai.

Prat hpe galai shai mayu ai myit malai lam nnga ai rai yang, hka hte kashin ya ai hpe hkam la ai Kashin Kamun Chyeju Kumla gaw akyu n rawng nga ai. 

Myit malai lu galai shai ai ngu gaw shut hpyi mara a matu machyi hkam jam jau hkam ai lam rai nga ai. Dai zawn re ai lam ni kaw nna hpang de htani htana lawt lu na matu rai nga ai.

Mara hpe kashin shaprai kau na matu gaw dai mara hte matut manoi ai n kaja ai lam ni yawng hpe ninghkap ai, koi yan kau ra ga ai. Mungkan hte seng ai, hkumhkrang hte seng ai hta pyaw hpa lam ni, mungkan sutgan ni hpe ra marin ai kaw nna lawt lu ra ai.

Ra nga ai hta lai jan nna ra marin ai lam hpe kau da nna, wenyi hkye hkrang la lam a matu ra ahkyak, ra kadawn ai hpe madung tam chye na matu Kabu Gara Shiga hta Yawhan Baptista shadum da ai.

Mara hte mungkan lam ni hta myit kap nga n mai ai. Dai gaw galai shai na matu shawng lahkam ai lagaw lahkam rai nga ai. Hpa majaw nga yang mungkan hte seng ai myit madang hta sha jahtum na n rai ga ai. Kaba grau ai Karai Kasang a Ja Mungdan hpe hkam la lu na matu madung yaw shada nna shakut ra ga ai. Karai Karai Kasang hte jawm pawng lu na matu, shi hte manang tai nga na matu she rai ga ai.

Dai hpe hkam la lu na matu gaw grai nan n loi la ai. Hpa majaw nga yang mungkan myit madang sha re ai lam ni law law anhte hpe mara galaw na matu byin shangun nga ai majaw rai nga ai: hkam ja lam hte n htuk ai makau grupyin ni, n kaja ai lam ni, n gun yawm shangun ai lam ni, n hkrum n ra ai lam ni gaw mara galaw na matu n gun jaw nga ai.

Galai shai ai lam gaw Karai Kasang a chyeju nan rai nga ai. Agung alau kaba ai kungkan ga na n kaja ai lam ni kaw nna Karai Kasang hpang de gayin wa na gaw grai yak nga ai.

Ndai zawn re ai masa kaw anhte ni hpa galaw ra ga ta? Shawng ningnan, galai shai ai lam gaw Karai Kasang a chyeju re ai hpe myit dum ra ga ai. Dai hpang she anhte a kam maga kaja wa na matu Karai Kasang kaw hpyi shawn wam na ga ai.

Anhte hkum nan a masin salum hpaw da ga. Karai Kasang a tsawm htam ai, mai kaja ai, hte matsan dum lama ai lam ni hpe hkam la lu na matu, htani hta na teng man tsawm htap ai hpe pat shingdang ya ai lam ni kaw nna lawt pru wa ga ngu Wa Sarabyin Francis kam sham ai Nawku Hpung masha ni hpe saw shaga da ai.

Mungga hpang jahtum hta December 8, bat 2 ya shani, “Nu Maria Mara N-kap Ai Na-um Na-sin Poi” rai nga ai hte maren, dai poi madu Kanu Nu Mria kaw kam hpa let akyu hpyi htinglu htinglai chyeju hkam la nga ga. Mungkan mara kaw nna hka mat nna, Karai Kasang a Mungga hpe hkam la hkan sa let hkye hkrang la hkrum lu na matu, anhte a hkum nan hpe Karai Kasang kaw ap da ga ngu Wa Sarabyin Francis Pranwan ladaw 2 laban shani na Madu A Lamu Kasa Akyu Hpyi ngut ten mungga htawn da ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-12/pope-angelus-advent-conversion.html