Wa Sarabyin: Makam Masham Gaw Tsawra Chye Ai Ni A Tsawra Maumwi Re

image from Vatican website

Cardinal ningnan 11 hte rau Wa Sarabyin gaw “Du Sa Ladaw” a langai ngu na laban hta Misa Hkungga rau jawm nawng ma ai hta, Karai Kasang hte nihtep nga lu hkra sit shang nna htingbu ni hpe daw jau nga ga ngu hpung masha ni hpe saw shaga da ai.

Karai Kasang gaw Cardinal ni a lapran nga nga nna shanhte akyu hpyi ai hte tsaw ra nga lu na matu dum hprang shangun ya u ga hpung masha ni yawng Karai Kasang kaw akyu hpyi nga ga ngu saw shaga da ai.

Wa Sarabyin Francis gaw mungkan shara shagu na Saradaw 13 hpe Cardinal aya ap ya lai wa sai rai nna, dai shani Brunei na Cardinal Cornelius Sim hte Philippines na Cardinal Jose Advincula yan gaw Covid- 19 makawp na matu hkum sa hkawm wa lam pat da hkrum ma ai majaw n lawm lu ma ai. 

Du Sa Ladaw gaw nihtep ai hku nga na hte maja nga na matu shadum nga ai. Karai Kasang anhte hte nihtep ai hku nga nga ai hpe dum hprang let anhte ni sadi maja nna ala nga ra ga ai.

Myihtoi Isaiah gaw Karai Kasang anhte hte nihtep ai hku nga nga ai lam shadum da ai. Kabu Gara Shiga hta mung Yesu Madu shi bai du sa na hpe myit mada let sadi maja nga na matu anhte hpe n gun jaw da ai.

Is 64: 1 hta Myihtoi Isaiah gaw Karai Kasang hpe “Nang gaw hpa majaw sumsing lamu hpe gang hpaw nna n yu wa n ni?, ngu san da ai hpe myit dum let Karai Kasang anhte hte nihtep ai hku nga nga ai hpe myit dum ra ga ai.

Makam masham a shawng lahkam gaw Karai Kasang anhte hte nihtep ai hku sa nga ya na hpe ra sharawng nga ga ai ngu Shi hpe hpyi nem ai lam rai nga ai.

Karai Kasang anhte hte nihtep ai hku nga nga ai hpe anhte ni dum chye hkam sha ra ga ai. “Sa rit Madu e, Sa rit,” ngu hkying ten shagu hpyi nem nga ga.

Yesu Madu anhte hte nihtep ai hku sa nga na matu hpyi shawn ai gaw anhte ni hkum nan hta maja nga ai tai sai re. Anhte ni Karai Kasang hte rau rai yang shani shagu nhtoi shingkang anhte hta htoi tu nga na re.

Karai Kasang du sa na hpe maja let la nga ai ngu ai gaw anhte a prat hta myit mada shara nga nga ai majaw rai nga ai.

Makam masham ngu ai gaw Karai Kasang hpe ra marit ai lam, mai kaja ai de galai shai wa hkra shakut ai lam, tsaw ra gwi ai hte kalu kaba rawt jat lam ni rai nga ai. Dai gaw tsaw ra chye ai shinggyim masha ni a tsaw ra maumwi rai nga ai.

Akyu hpyi ga ni gaw Karai Kasang hte nihtep shangun ai. Akyu hpyi ga gaw shingtai hkam sha ai kaw na shalawt ya nna, myit mada lam jaw ya ai. Akyu hpyi ga gaw asak hpe jaw ya ai; Anhte ni nsa n sa yang sak hkrung n lu ga ai zawn, akyu hpyi ai lam n nga jang Hkristan Hpung masha ni n tai na re.

Shawang tsawra myit hte ra kadawn ai ni hpe garum shingtau lu na matu mung maja nga ra ga ai. Ra kadawn ai ni hpe garum shingtau ai lam gaw Hkristan ni a sak prat hta salum zawn ahkrak ai rai nga ai. Salum gumhtawn ai lam n nga mat jang sak hkrung n lu ai zawn, ra kadawn ai ni hpe garum shingtau lam n nga ai rai yang mung Hkristan masha n tai nga ai.

Tsaw ra matsan dum ai magam bungli a marang e, anhte hpe Karai Kasang hte nihtep shangun nga ai.

Wa Sarabyin Francis a mungga hpang jahtum gingchyum dat hta Karai Kasang hpang de anhte a hkum hkrang wenyi hpe shaga sa ga. Sa rit, Madu Yesu, anhte nang hpe ra ga ai, ra ga ai. Anhte hte ni ni htep htep nga ya rit. Nang gaw nhtoi rai nga ndai. Nsin kaw nna anhte hpe jasu shadum jahprang la rit. Anhte a masin salum hpe galoi mung a maja nga shangun ya rit. Shada tsaw ra lu na hte akyu hpyi shakut lu na matu anhte lapran hta shadum shadut ya rit, akyu hpyi nga na matu saw shaga da ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-mass-advent-cardinals-homily.html

 

Add new comment

5 + 3 =