Wa Sarabyin: Anhte Mara Lu Ai Ni Hpe Karai Kasang Shaman Ya Ai

Wa Sarabyin Francis, December 2, bat 3 ya shani, shawa masha ni hte hkrum shaga ai shaloi, Ningpawt Ninghpang Laika kaw na chyum daw ni hpe lakap nna, shi a mungga hpe hpaw hpang wa ai.

Karai Kasang a hpang da magam hpang ai shaloi asak aprat hpe mung matut manoi shaman ya ai. Dusat yam nga ni, shinggyim num sha hte la sha, bai laban nhtoi hpe shaman ya ai. Shiggyim masha ni shada shaman ga tsun let shaman ya hkat ai rai tim, dai shaman chyeju gaw Karai Kasang kaw na rai nga ai. Shinggyim masha a salum hpe hpaw da ai gaw Karai Kasang dai hpe shatsawm lai ya na matu hkap la ai lachyum rai nga ai.

“Shaman ai” ngu lachyum nga ai english ga si “bless” hpe Italy ga hte “benedire” ngu tsun ai rai nna, de a lachyum hpe english hku bai htai yang “speaks well” “atsawm shaga ai” ngu lachyum hku sawn la mai ai. Dai majaw Karai Kasang gaw atsawm sha shaga ai wa re, ngu Wa Sarabyin Karai Kasang gaw kaning re wa re ai hpe tsun dan wa ai.

Hpang da magam galaw ai shaloi, Karai Kasang, shi a lata hte galaw ai magam yawng hpe kaja ai hte tsawm htap ai re hpe mu ai. Grau nna shinggyim la sha hte num sha hpe hpang ai shaloi, shi a hpang da magam gaw hkumtsup sai rai nna, grai nan kaja ai magam rai nga ai.

Mungkan ting a myit mada shara gaw Karai Kasang a shaman chyeju hta madung rai nga ai. Karai Kasang gaw anhte a matu number 1 myit mada shara rai nga ai.

Karai Kasang a kaba dik htum ai shaman chyeju gaw Yesu Hkristu nan rai nga ai. Shut hpyit ai ni rai ga tim anhte hpe Kawa Karai Kasang shaman ya nga ai ngu San Pawlu tsun da ai. Dai gaw Karai kasang anhte hpe tsaw ra ai masin kaba nan rai nga ai. “Anhte a Madu Yesu Hkristu a Kawa rai nga ai Karai Kasang hpe chyeju dum shakawn ga law! Hpa majaw nga yang Shi gaw sumsing lamu lahta tang hta e wenyi hte seng ai shaman chyeju lam shagu hpe jaw ya nga mani ai,” (Ehpesu 1: 3).

Anhte hta rawng nga ai Hkristu a hkrang bung sumla hpe hkrak tup shaprai kau lu ai mara gaw n nga ai. Kade kaba ai mara rai tim, Karai Kasang anhte hpe jaw ya ai Hkristu Madu a hkrang bung sumla hpe shaprai kau ya n lu ai.

Mara gaw hkrang bung sumla hpe n mu mada lu hkra myi le le kau lu na re; raitim, Karai Kasang a matsan dum lama ai myit hpe gaw la kau, jahten kau n lu ai.

Mara lu ai wa mara hta kade na hkra hkawm nga ai raitim, Karai Kasang gaw shi a hpang jahtum aten du hkra myit galu kaba ai hte hkram sharang ya nga ai. Dai zawn myit galu kaba ya ai gaw dai mara lu ai wa a myit masin salum hpaw wa nna galai shai wa na matu rai nga ai.

Karai Kasang gaw kawa kaja, kanu kaja zawn rai nga ai. Shanhte gaw shanhte a kasha shut hpyi ai lam kaning re galaw ai raitim, shi hpe tsaw ra ai gaw galoi mung htum ngu, n nga ai.

Mara kaba shut ai rai tim, Karai Kasang gaw anhte hpe matut tsaw ra ding yang rai nga ai. Anhte hpe myit mada shara matut jaw ding yang rai nga ai. Kaja ai lam hta hkawm sa na matut Karai Kasang anhte hpe saw shaga nga ai.

Karai kasang gaw anhte rai nga ai hpe hkap la ya ai. Raitim, anhte rai nga ai hpe galoi n kau da ai. Anhte hpe shading sharai ya na matu jing jing rai nga ai.

Zacchaeus hte seng nna Chyum laika hta rawng ai hpe Wa Sarabyin Francis shingdaw dan da ai. Zacchaeus gaw mara lu ai wa rai nga ai ngu shawa masha yawng chye na da ma ai. Yesu Madu shi a nta de sa nna mara lu ai ni hte rau shat rau sha ai. Shi hte rau mara lu ai ni hpe shaman ya ai hte mara mung dat ya ai. Yesu Madu hpe hkap hkalum la ai Zacchaeus shaman chyeju hkam la lu ai rai nna, shi a myit masin hpe jasan jaseng hkam la mayu ai myit rawng wa ai. Yesu hkum nan shi a myit masin salum hpe shatsawm lai ya ai rai nga ai.

Yesu Madu gaw shi hpe ra taw nga ai masha hkum shagu a myit masin salum hpe shatsawm ya ai. Hpang jahtum jeyang na nhtoi hta, San Mahte ka da ai hte maren, kawsi hpang gara, singu krin, hkyuk htawng rawng masha, machyi masha ni hta Yesu Madu a hkrang bung sumla nga nga ai lam Yesu Madu hkum nan tsun wa na ra ai.

Mungga jahtum ginchyum dat hta anhte shinggyim la sha, num sha ni Karai Kasang hpe shagrau sha-a ai gaw anhte hkum nan shi kaw na shaman chyeju hkam la lu na matu rai nga ai. Dai majaw anhte akyu hpyi ga ni hte shi hpe chyeju dum chyeju htang chyeju shakawn let nawku daw jau nga ga. Akyu hpyi ga gaw kabu pyaw lam hte dum hprang lam ni hpe jaw ya ai re.

Karai Kasang gaw anhte hkum hpe anhte hkum nan tsaw ra chye na aten hpe la nga ai. Anhte hkum hpe anhte hkum nan tsaw ra chye jang she, anhte hkum nan Karai Kasang ra sharawng ai hta galai shai wa lu na rai ga ai. Karai Kasang gaw anhte ni mara hta naw nga nga ai aten kaw nna nan anhte hpe tsaw ra nga ai re, ngu Wa Sarabyin, December 2, bat 3 ya shani, shawa masha ni hte hkrum shaga ai shaloi htawn tsun da ai mungga hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-12/pope-francis-general-audience-prayer-blessing.html