Wa Sarabyin: Nu Maria Gaw Akyu Hpyi Ai Hta Kasi Kaja Madun Ai Kanu Re

Nu Maria gaw akyu Hpyi ai hta shakut shaja ai rai nna, akyu hpyi ai hta kasi kaja madun ai kanu mung rai nga ai ngu November 18, bat 3 ya shani, hpung shawa masha ni hte hkrum shaga ai shaloi, Wa Sarabyin Francis tsun da ai.

“Dai ni na aten hta tim Hkawnset Maria gaw akyu hpyi shakut shaja ai kanu re.”

Maria, ramprat ten hta Nazareth mare gaw zim zam rai nga ai. Karai Kasang hte hkrum shaga ai hpang shi hpe sasana magam galaw na matu lit shatsam hkrum ai.

Shi a hkritung hta Yesu hpe gun da ai aten kaw nna nan, Maria gaw chyeju hte hpring sai hpe dum chye sai raitim, shi hkawm sa ra na laklai shaga la hkrum ai lam hta yak hkak jam jau na lam ni hpe hkrak n chye na re.

Teng ai lam langai gaw, Maria hta shagrit shanem ai masin salum hpe madu da ai. Karai Kasang lam madun ya na; lam woi ya na; lam lajang da ya na hpe Maria myit mada nga na re. Madu Yesu hpe gara hku lam woi ningshawng ya nna makawp maga bau kaba la na gaw Kawa Karai Kasang lam madun ya na hpe shi hkam sha let lam woi lai wa ai rai nga ai.

Lamu kasa Gabriel shiga sa shana ai aten gaw Maria akyu hpyi nga ai aten rai nga ai. Shi a shagrit shanem ai lam gaw kaba la nga ai. “Ngai nang e nga nga nngai” ngu ai ga gaw mungkan masha yawng hpe kabu shagun ga nan rai nga ai.

Kam sham myit hte madat mara ai gaw hkye hkrang la ai labau hta Karai Kasang a yawsin ai lam hpe hpaw ya ai.

Tinang hkum nan galaw lu ai hpe hpaw tsun dan ai hta grau ai akyu hpyi ga gaw n nga sai.

“Madu e, nang ra sharawng ai gaw hpa rai kun, galoi aten hta rai na kun, gara hku ra sharawng ai kun?”

Yak hkak jam jau lam ni hte hpring ai nhtoi ni hta myit htum ai lam n nga ai sha, teng man ai lam hpe hkap la, yin la cheye ai kamsham myit kaba ai masha ni gaw masa lam hta hkan nna Karai Kasang a chyeju tai let shagrit shanem ai tsawra myit hte daw jau lu ai.

N sim n sa ai lam ni hpe gara hku shazim la lu ai hte gara hku jahtuk la lu ai hpe chye lu hkra akyu hpyi ra ga ai.

Hkawnset Maria gaw kasha Yesu a si hkam ai hte bai hkrungrawt ai hta akyu hpyi let shang lawm ai a majaw shi a prat hta yak hkak jam jau lam ni kade law ai raitim, hkam jan lu ai.

Akyu hpyi nna chye na la ai Karai Kasang a shaga la ai lam hta hkawm sa ai rai yang, yawng hpe hkap la lu na re. Karai Kasang ngai kaw na hpa ra ai kun?

Karai Kasang ngai na lagaw lahkam htawt shagu hta nga nga ai hpe ga sadi jaw jang gaw ngai hta tsang shara n nga sai majaw Nang Madu myit ra ai hta hkan na jing jing rai nngai ngu hpyi gwi hkra, sharin la ra ga ai.

Karai a Kanu gaw Nawku Hpung a Kanu rai nga ai. Maria gaw shangai wa ai nawku hpung hte galoi mung rau akyu hpyi nga ai. Chyoi Pra ai Wenyi a hpung dagu hte rau nga nga ai majaw Karai a Kanu gaw Nawku hpung a kanu mung tai nga ai.

San Luka tsun ai hte maren Maria gaw yawng mayawng hpe manu shadan ai hte shi a myit masin hta aru yu nga chye ai wa rai nga ai. Yawng mayawng hpe shi a salum hta jahtum da nna akyu hpyi let dai hpe jahtuk shatsawm la chye ai wa rai nga ai.

Kanu ngu ai gaw yawng mayawng hpe zin hkang da chye ai rai nna, Karai Kasang hte hkrum shaga na matu gun sa chye ai rai nga ai. Maria a salum ningsang gaw Karai Kasang ra sharawng ai hpe shagrit shanem hkam sharang ai hte hkap la nna tsawm htap ai hku jahtuk da chye ai Kanu langai a masin salum nan rai nga ai.

Anhte mung Kanu Nu Maria a kasi hpe kachyi mi sha pyi, hkan nang lu ai rai yang gaw grai nan tsawm htap ai prat hpe madu lu na ga ai.

Hkawnset Maria a akyu hpyi shakut ai kasi hte Karai Kasang kaw kam-hpa kam-sham ai nga-sat nga-sa lam a kasi gaw anhte a prat matu kasi kamang re ai, ngu Wa Sarabyin Francis hpung shawa masha ni hpe sharin shaga da ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-general-audience-catechesis-prayer-mary.html