Wa Sarabyin: “Du Sa Ladaw” Gaw Myit Mada Ai Lam Hpe Jaw Ya Na Matu Shaga Taw Ding Yang Rai Nga Ai

image from Vatican website

Du Sa Ladaw a shawng na laban shani San Peter Nawku Htingnu hta Cardinal ningnan ni hte rau Misa Hkungga nawng jau ngut ai hpang “Madu A Lamu Kasa” akyu hpyi ngut ten, Wa Sarabyin Francis Hpung masha ni hpe myit mada lam jaw ai Du Sa Ladaw a lam tsun sanglang da ya ai.

Ndai Du Sa Ladaw gaw Nawku Daw Jau Shaning a ningnan hpang ai nawku daw jau shaning ningnan mung rai nga ai.

Madu Yesu a Hkye Hkrang La Labau hte seng ai prat hpe myit dum let nawku daw jau magam hpe nawku hpung masat da ai rai nga ai. Nawku Hpung gaw kanu langai zawn, Madu Yesu hte hkrum shaga lu na matu lam lajang ya nga ai.

Du Sa Ladaw gaw Nawku Daw Jau shaning a ahkyak dik ai ladaw langai rai nga ai. Dai gaw Hkristmas ladaw a matu shajing shachyip ai aten rai nna, myit mada shara jaw ya ai aten rai nga ai.

Madu Karai Kasang hpe hkrang shapraw ya ai hpe myit mada ai re, ngu San Pawlu madi madun da ai re.

San Pawlu gaw Korintu hpung masha ni hpe Madu Yesu hte hkrum shaga lu na matu ahkrak tawn hkan sa ra ai lam shadum da ai. Yesu Madu gaw hpang jahtum shani hta mungkan ga de du sa na rai nna, shani shagu aten shagu hta mung chyeju hpring ai hte du sa na ra ai. Dai zawn du sa ai gaw anhte a makau grupyin masha ni hku du sa na rai nga ai, ngu tsun shadum da ai.

Anhte a Karai Kasang gaw anhte kaw du sa ai Karai Kasang re. Shi anhte hpe myit htum myit hten na hku galoi mung n galaw ai. Shi gaw anhte a mara mahkra gun la kau ya na matu labau hta grai nan htuk manu ai aten manu dan ai hku du sa ai.

Karai Kasang gaw anhte a masin salum chyinghka hpe sa akawk taw nga ai. Covid -19 tsin-yam hkrum nna myit ru myit tsang nga ai masha ni a matu Wa Sarabyin Francis myit n pyaw ya ai lam mung tsun da ai. “Karai Kasang gaw anhte hpe garum shingtau ya nga ai hte anhte hpe makawp maga ya ai wa re ai majaw, shi hpe myit mada myit kaba hte ala nga ga,” ngu n gun jaw da ai.

N-sin chyip aten hta Karai Kasang anhte hpe tam mu nna n gun jaw garum ya na hpe myit mada let shi hpe kam myit kaba hte ala nga ga. Karai Kasang gaw shinggyim masha ni a labau shagu hta galoi mung nga nga ai. Hkristu Madu gaw shinggyim masha ni a myit mada shara bandung de du lu hkra jahkum shatsup ya ai. Karai Kasang gaw anhte hte rau nga nga ai; anhte hpe garum ya na matu anhte a makau hta rau hkawm nga ai.

Karai Kasang gaw anhte hpe galoi nkau da ai. Anhte a prat hkrun lam a lachyum hpe tam mu la shangun ai hte shani shagu na prat hta anhte ni yak hkak jam jau ai aten ni hta n gun jaw ya na matu anhte hpe manang tai ya nga ai.

Laru kaba, hka leng kaba lapran Karai Kasang gaw anhte hpe shi a lata ladawn nna shalawt ya nga ai re ngu Wa Sarabyin Du Sa Ladaw laban langai sha ni na “Madu a Lamu Kasa Akyu Hpyi ngut aten mungga htawn da ai hpe Vatican kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-at-angelus-advent-is-a-continuous-call-to-hope.html

 

Add new comment

10 + 9 =