Wa Sarabyin: Anhte Hkam La Lu Ai Chyeju Kumhpa Ni Hpe Mai Kaja Lam A Matu Jai Lang Ra Ai

November 15, laban shani na “Madu A Lamu Kasa Akyu Hpyi” ngut ten Wa Sarabyin Francis gaw dai shani hti ang ai Kabu Gara Shiga kaw na “Mayam Marai Masum Hpe Gumhpraw Arang Ap Dai Ai” ga shadawn hpe sumru woi da let anhte hkam la lu ai chyeju kumhpa ni hpe mai kaja lam a matu jai lang ga ngu saw shaga da ai.

Yesu Madu ndai ga shadawn hpe shi hkaw tsun ai mungga ni hta na shi a nni nkri hkam, si hkam nna bai hkrungrawt na lam a shawng kaw tsun da ai rai nga ai.

Ga shadawn hta na hkrun lam hkawm ai madu, shi a masha marai masum hpe jaw da ai gumhpraw amount gaw grai law ai rai nga ai. Shanhte hta nga ai atsam hte maren jaw da ai mung rai nga ai.

“Karai Kasang anhte hpe dai hte maren galaw ai re. Karai Kasang gaw anhte hpe hkrak tup chye ai wa re. Anhte hta langai hte langai atsam n bung ai hpe mung chye ya ai. Langai hpe mung hkra machyi na n ra sharawng ai Karai Kasang rai nga ai. Dai majaw, Karai Kasang gaw anhte hta nga ai atsam hte maren jaw ya ai re.

Madu bai du wa ai shaloi, mayam ni yawng gaw shi hte hkrum na matu hte ap da hkrum ai chyeju atsam (gumhpraw) bai madun na matu tsun wa ai. Marai lahkawng gaw, kaja ai apu asi hpe hpaw madun dan ma ai rai nna madu mung shan hpe shakawn ai. Masum ngu na wa chyawm gaw madu bai wa jang shi hpe mara shagun na myit tsang nna shi hpe ap da ai chyeju atsam hpe makoi da ai majaw nta kaw na gawt shale kau hkrum mu ai.

Wa Sarabyin Francis gaw ndai ga shadawn hpe yawng a matu sumru la mai ai lam tsun da ai rai tim, Hkristan masha ni hpe madun shadum ya nga ai.

Kanu Nawku Hpung gaw matsan mayan ni hpe ta ladawn garum ya na matu n gun jaw matsun da ai hte maren, Matsan Masha ni a matu masat dingsat ai Mungkan Nhtoi hta ndai ga shadawn gaw grai nan htuk manu ai ga shadawn rai nga ai lam mung tsun da ai.

Anhte yawng gaw langai hte langai n bung pre ai chyeju atsam ni hpe lu da ga ai. Ndai chyeju atsam ni gaw anhte a prat hta mai kaja ai lam galaw let Karai Kasang hte nau na ni hpe daw jau nga ra ga ai.

Grau nna matsan masha ni a matu ahkyak la galaw ap nawng nga ra ga ai. Matsan masha ni hpe yu lakawn ra ga ai. Mare kaba ni hta nga ai ni pyi kawsi hpang garan hkrum nga ma ai. Anhte yak hkak ai ni hpe mu nga ninglen n mu jahpai jahpai chye ga ai. Matsan ai ni dai kaw nga taw ma ai hpe chye nna kaga shara de yu chye ga ai. Matsan masha hpe lata ladawn ya mu. Shi gaw Hkristu nan re.

Yesu Madu hkum nan anhte hpe matsan masha ni hte shaga chye na matu sharin ya ai. Shi hkum nan mung matsan masha ni a matu du sa ai re.

Myit tau chye ai tsaw ra ai lam hpe sharin hkam la ga. Anhte a matu kasi tai ya nga ai Chyoi Pra Hkun sek Maria kaw na sharin la ga. Maria gaw Karai Kasang kaw na Chyeju Kumhpa rai nga ai Madu Yesu hpe hkum nan hkap la lu ai raitim shi a matu n kyem da ai. Mungkan ting a matu Shi a kasha Yesu Madu hpe jaw kau ai ngu Wa Sarabyin Francis laban shani na Madu a Lamu Kasa Akyu Hpyi ngut ten mungga htawn da ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-at-angelus-we-must-use-our-gifts-for-good.html

 

Add new comment

2 + 1 =